1 Corintio 1 - Tachi Ak'õre Pedea

Nãɨ k'art'ade Pablopa naa bɨda

¹ Mɨ Pablopɨ. Tachi Ak'õrepa ichia k'ɨ̃riana pẽra mɨ t'ɨ̃sima Jesucristopa peeda pamẽrá. Tachi ũpẽa Sóstene mɨ ome bɨma.

² Mɨa nãɨ k'art'a bɨruma chi ẽpẽrarã Tachi Ak'õrenepemarã Corinto p'uurudepema pae. Jesucristodepa Tachi Ak'õrepa mãra awara bɨsima ichi pae pia p'ananamẽrá. Ara mãɨ jĩra ichia tuacha jõma Tachi Chipari Jesucristoa ɨt'aa chiidipataɨrã awara bɨsima. Ichi ãchi Chiparipɨ mãɨnepa Tachi Chiparipɨ.

³ Taipa k'ɨ̃ria p'anɨma Tachi Pajãnepema Ak'õrepa, Tachi Chipari Jesucristo pida ãchi piadepa mãra k'aripa p'ananait'a ne k'ɨ̃risiawẽa p'ananamẽrá.

Pablopa ũpẽarã k'orea Tachi Ak'õrea sõpia bɨade ada

⁴ Mãra Jesucristo ome p'anɨ pẽra Tachi Ak'õrepa ichi sõpiadepa k'aripa bɨma. Mãɨpuru mɨa Tachi Ak'õrea ɨt'aa chiidirucha mãra k'orea sõpia bɨade aparima.

⁵ Jesucristo ome p'anɨ pẽra Tachi Ak'õrepa mãrá jõma teasima pia oodamẽrá. Ichi pedea p'ue k'awa jaratea p'ananaipɨ mãɨnepa ichi k'orea p'ue minachia k'awa p'ananaipɨ.

⁶ Jõma Tachi Ak'õrepa mãrá teadapa unupi bɨma chi Cristo k'orea pedea taipa jarateadada piarãpɨ.

⁷ Mãrapa Tachi Chipari Jesucristo ununai k'orea nɨ p'anɨmisa, Tachi Ak'õrepa ichi Jaoredepa tea bɨt'a jõma uru p'anɨma.

⁸ Mãɨpa Tachi Ak'õrepa mãra chaarea uru baipɨ aba nãɨ ewari jõrunea. Mãɨya Tachi Chipari Jesucristo cherude mãra k'orea k'achia pedeadaiwẽa p'ananaipɨ.

⁹ Tachi Ak'õrepa ara ichia jara bɨ jĩra ooipɨ. Ichia mãra t'ɨ̃sima ichi Warra Tachi Chipari Jesucristo ome ará p'ananamẽrá.

Ũpẽarã ãchi k'ɨ̃risia k'ak'awá k'ɨ̃risia p'anana k'orea

¹⁰ Ũpẽarã, Tachi Chipari Jesucristodepa mɨa mãrá chichupuria idiruma ará pia tuananamẽrá. K'ɨ̃risia k'ak'awá tuananaiwẽa p'anɨma, mãɨpari k'ɨ̃risia abaɨde ará pia tuananai p'anɨma.

¹¹ Ũpẽarã, mãɨya jara bɨma ũpẽawẽra Cloé tiidapemarãpa mɨá jarasida pẽra mãra k'ĩruu pedea tuanapataɨt'a.

¹² Pia jaraideepara, waapẽarã mãranepemarãpa jarapatama: «Mɨ Pablodé». Waapẽarãpa jarapatama: «Mɨ Apolodé». Waapẽarãpa jarapatama: «Mɨ Pedrodé». Mãɨnepa waapẽarãpa jarapatama: «Mɨ Cristodé».

¹³ Mãɨyara ¿Cristo chok'ará bɨk'ãra? ¿Mɨ mãra k'orea k'urusude barijira bɨsidak'ãra? ¿Mãra mɨ t'ɨ̃nepa porochoasidak'ãra? ¡Mãɨyawẽma!

¹⁴ Mɨa mãranepema mi aba pida porochoadawẽ pẽra arapá bɨma. Mɨa Crispo mãɨnepa Gayot'u porochoasima.

¹⁵ Mãɨya abaɨ pida p'ue jaraiwẽma mɨ t'ɨ̃nepa porochoasiade ait'a.

¹⁶ Ichiaba mɨa ũpẽa Estép'ana tiidapemarã sida porochoasima. Ãchi awara, waapẽarã porochoasira mɨa mãɨ arí k'awawẽa bɨma.

¹⁷ Cristopa mɨ peé pasima ẽpẽrarã porochoa bamẽrá, mãɨpari peesima chi pedea pia ichi k'orea jarateamẽrá. Nãɨ ĩjũanepema k'ɨ̃risiadepa jarateawẽma, Cristo k'urusude piuda ara ichi pari piuda jĩra beepiemaapa.

Cristo, Tachi Ak'õre k'ɨ̃risia k'awa mãɨnepa jua chaarea

¹⁸ Chi ẽpẽrarã t'ɨpɨ urua nɨbɨdea wãnai p'anɨrãmá, Cristo k'urusude piuda k'orea paritua pedea bɨ jĩra bɨma. Maamina tachit'u, chi Tachi Ak'õrepa k'aripapataɨrãpa k'awa p'anɨma mãɨ pedeapa Tachi Ak'õre jua chaarea k'awapi bɨt'a.

¹⁹ Tachi Ak'õre pedeade nãɨya bɨ bɨma: «Chi ãarea k'ɨ̃risia k'awa berã k'ɨ̃risiat'a mɨa piawẽa bɨ unupiipɨ. Chi k'ɨ̃risia k'awa berãpa oo k'ɨ̃ria p'anɨt'a itu oopiiwẽma».

²⁰ Piarã Tachi Ak'õrepa nãɨ ĩjũanepema k'ɨ̃risia piawẽa bɨ k'awapisima. Mãɨpuru ¿chi minachia k'awa berã k'ãasãasidama? ¿Chi Moisepa bɨda jarateapataɨrã k'ãasãasidama? ¿Chi nãɨ ewaride k'ɨ̃risiadepa pedeapataɨrã k'ãasãasidama?

²¹ Tachi Ak'õrepa ichi k'ɨ̃risiadepa oodadepa, ara ichi k'awapi bɨma. Maamina nãɨ ĩjũanepemarãpa ara ãchi k'ɨ̃risiadepa ichi k'awadak'ama. Ara mãɨ taipa jarateapataɨ k'ɨ̃risia newẽa bɨ jĩra bɨmina, Tachi Ak'õremá pia basima, mãɨnepa jõma chi ichide ĩjãauta k'aripait'a.

²² Chi judiorãpa Cristode ĩjãanai k'orea, ẽpẽrarãpa ne p'ue oodak'apɨ́ unu k'ɨ̃riapatama. Judiorãwẽpa chi nãɨ ĩjũanepema k'ɨ̃risiat'a jɨrɨpatama.

²³ Maamina taipa Cristo k'urusude piuda jaratea p'anɨma. Mãɨ pedea judiorãpa pia ũrinak'ama. Judiorãwẽpa mãɨ piawẽa bɨ k'ɨ̃risiapatama.

²⁴ Maamina Tachi Ak'õrepa judiorã mãɨnepa judiorãwẽ t'ɨ̃sima Cristodepa k'aripai k'orea. Mãɨrãpa k'awa p'anɨma Tachi Ak'õrepa Cristodepa ichi jua chaarea mãɨnepa k'ɨ̃risiat'a unupisit'a.

²⁵ Ẽpẽrarãmá Cristo k'urusude piuda pẽra Tachi Ak'õre ne k'awawẽa bɨma mãɨnepa jua chaareawẽa bɨma. Maamina ne atua bɨ jĩra bɨmina Tachi Ak'õre jõma nãɨ ĩjũanepemarã k'aepẽra atepe k'awa bɨma. Mãɨnepa jua chaareawẽa bɨ jĩra bɨmina jõma nãɨ ĩjũanepemarã k'aepẽra atepe jua chaarea bɨma.

²⁶ Ũpẽarã, k'ɨ̃risiat'ɨ Tachi Ak'õrepa mãra jɨrɨ ataside sãmaasã́ p'anasidaɨt'a. Ẽpẽrarãmá, chok'ará mãranepema ne k'awa p'ananaé pasima, chi minachia k'awa p'anɨrã p'ananaé pasima, mãɨnepa chi atepe p'anɨrãnepa t'õnaé pasima.

²⁷ Mãɨpuru chi k'ɨ̃risia k'awaa berãmá mãra ne atua bepɨ. Maamina Tachi Ak'õrepa chi ne atua berã jɨrɨ atasima mãɨ k'ɨ̃risia k'awaa berã p'eradamẽrá. Tachi Ak'õrepa chi jua chaareawẽa berã jɨrɨ atasima mãɨ jua chaarea berã p'eradamẽrá.

²⁸ Nãɨ ĩjũanepemarãpa chi mĩa chupuria k'edeade apataɨ mãɨnepa ãchia itu bɨpataɨ Tachi Ak'õrepa jɨrɨ atasima. Mãɨya chi atepewẽa berã jɨrɨ atasima chi atepe berã mĩa chupuria bɨi k'orea.

²⁹ Mãɨpuru abaɨ pida ara ichi k'orea Tachi Ak'õre k'ĩrari p'ue pia pedeawẽma.

³⁰ Mãawẽa Tachi Ak'õrepa mãra Jesucristo ome ará bɨsima. Mãɨya Cristodepa Tachi Ak'õrepa ichi k'ɨ̃risia tachiá k'awapisima. Ichia tachi jĩp'a bɨsima, ara ichi pae pia bɨsima, mãɨnepa nemietaadepema k'aripasima.

³¹ Mãɨpuru Tachi Ak'õre pedeade nãɨya bɨ bɨ jĩra tachia oodai p'anɨma: «Abaɨpa ara ichi k'orea pia pedeaipɨra, Tachi Chipari k'orea pia pedeai bɨma».