Zekhariah 4 - Tedim Bible

Meivakkhuam le Oliv Kungte

¹ Kei tawh a kiho vantungmi mah hong paikik a, a ihmu kimlai a kiphong bang keekin kei hong khanglosak hi.

² Amah in, “Bang na mu hiam?” ci-in hong dong hi. Kei zong, “Kham tawh a kibawl meivakkhuam khat ka mu hi. Tua meivakkhuam in meivak sagih nei a, meivaktui koihna ding hai khat zong a khuam dawnah om hi. Tua meivak sagihte in meivakkhau nei ciat uh hi.

³ Meivakkhuam gei-ah oliv kung nih zong om a, meivakkhuam lang tuakah om uh hi,” ci-in ka dawng hi.

⁴ Tua ciangin kei zong vantungmi kiangah, “Sia aw, hihte bang a cihnopna ahi hiam?” ci-in ka dot ciangin

⁵ amah in, “A cihnopna thei lo na hi hiam?” ci-in hong dawng a, kei zong, “Sia aw, ka thei kei hi,” ci-in ka dawngkik hi.

⁶ Tua ciangin vantungmi in kei kiangah, “Topa in Zerubbabel tungah hih bangin thu gen hi: Galkap tam neihna hang hi lo, nangma vangliatna hang zong hi lo, keima tung panin na ngah vangliatna bek tawh na ma na tunzo ding hi.

⁷ Thuhaksa pente nangawn in na ma hong khaktan zo lo ding hi. Biakinn na lamkik ding a, mite in, ‘Hoih mahmah hi,’ ci-in a ot ngeingai laitakin a khupna suang na ciang ding hi, hong ci hi,” a ci hi.

⁸ Topa in kei tungah thu hong gen hi.

⁹ Amah in, “Zerubbabel in biakinn bulpi phut khin a, biakinn lam zong a zo ding hi. Tua ciangin ka mite in, amaute kiangah nang kong sawlna thu hong thei ding uh hi.

¹⁰ A maa uh a telh loh manun ka mite lungkia uh a, ahi zongin Zerubbabel in biakinn lam nasep a makaihna a muh uh ciangin a lung uh damkik ding hi,” hong ci hi. Vantung mi in, “Meivak sagihte pen, leitung khempeuh a etna Topa’ mittang sagih ahi hi,” hong ci hi.

¹¹ Tua ciangin kei zong ama kiangah, “Meivakkhuam pang tuak a om oliv kung nihte bang a cihnopna ahi hiam?

¹² Oliv thau a luankhiatna kham tuizawl nihte’ gei-a om oliv hiang nihte bang a cihnopna ahi hiam?” ci-in ka dong hi.

¹³ Amah in, “Thei lo na hi hiam?” ci-in hong dong a, kei zong, “Sia aw, thei kei ing,” ci-in ka dawng hi.

¹⁴ Tua ciangin amah in, “Leitung khempeuh’ Topa’ na a sem dingin Pasian in teelin sathau a nilh mi nihte a cihnopna ahi hi,” hong ci hi.