Zekhariah 3 - Tedim Bible

Kamsangpa in Siampi Lianpen pa Joshua A Muhna

¹ Topa in maang hong musak a, Topa’ vantungmi mai-ah siampi lianpen pa Joshua’ mawhna a zong dingin a kiangah Satan zong a om ka mu hi.

² Topa’ vantungmi in Satan kiangah, “Satan aw, Topa in nang hong mawhsak hi. Jerusalem a it Topa in nang hong mawhsak hi. Hih Joshua pen meikhuk sung panin a kiteenkhia singkhuah tawh kibang hi,” a ci hi.

³ Joshua ahihleh vantungmi mai-ah ding a, puan a nin mahmah a silh hi.

⁴ Vantung mi in ama sawltak van midangte kiangah, “Hih mipa’ silh a puan ninte suahkhiatsak un,” ci-in thu a pia hi. Tua ciangin vantungmi in Joshua kiangah, “Na mawhna teng kong paihkhiatsak khin a, tu-in na silh dingin puan thak ka hong pia ding hi,” a ci hi.

⁵ Tua ciangin a sawltak van mite thu pia a, Joshua’ lu tungah dial siangtho a khipsak ding uh a sawl hi. Topa’ vantungmi tua munah a din sung mahin, amaute in zong Joshua, dial siangtho khimsakin, tua khit ciangin puan siangtho zong a silhsak uh hi.

⁶ Tua ciangin Topa’ vantungmi in Joshua kiangah limtakin thu gen a,

⁷ Vanglian Topa in hih bangin ci hi: “Ka thukhamte zui-in kong sawl thute na sep leh, ka biakinn sung le biakinn huang sungteng na uk ding a, hih ka kianga om vantung mite’ thu ka ngaih bangin nangma thu zong ka hong ngai ding hi.

⁸ Tua ahih ciangin siampi lianpen pa Joshua aw ngai in: Ama siampipih ahi no a dangte in zong ngai un. Note pen mailam thuhoihna ding lim na hi uh hi. Sing bangin A Sel a kici min nei khat kong paisak ding hi.

⁹ Joshua’ omna mai-ah, mai sagih a nei suang khat ka koih hi; tua suang tungah lai ka gelh ding a, ni khat sungin hih gammite’ mawhna ka paihkhiatsak ding hi.

¹⁰ Tua ni ciangin note khempeuh in leenggui le theikungte hau-in nuam na sa ding uh a, na vengte ciat un hong nekpihin hong lungdampihna dingun na sam ding uh hi, Vanglian Topa in ci hi,” a ci hi.