Zefaniah 3 - Tedim Bible

Jerusalem A Mawhna le A Nopsakkikna

¹ Ama mite mah nengniamin, thumang loin a tatsia, Jerusalem khuapi in gimna ngah ding hi.

² Topa’ thu ngai nuam lo a, a thuhilhna sang nuam lo hi. Topa muang nuam lo a, a Pasian naih nuam lo hi.

³ A uliante, humpinelkai gilkial bang a, a thukhente, keivom gilkial bang uh hi. Zingsang khuavak mateng a saguh nek a nusia nuam lo, a huaiham gamsate tawh kibang uh hi.

⁴ A kamsangte kihisak uh a, kamsang citak hi lo uh hi. A siampite in a siangtho nate ninsak uh a, amau angsung ding bek a khualna-un Pasian’ thukham lehhei uh hi.

⁵ Ahi zongin tua khuapi sungah Topa omin, a thuman na bek sem a, a khialin gamta ngei lo hi. Zingsang simin mihingte tungah pelh ngei loin thutang lak hi. Ahi zongin tua lai-a mihing thuman lote, a sia-in gamta teitei uh a, maizumna mel theithei lo uh hi.

⁶ Topa in hih bangin thu gen a, “A kiphasak mite ka nilkhia a, a gal panmunte uh ka susia hi. A kongzing lampite uh ka kinusiacipsak a, tua lampi kuamah in tawn nawn lo hi. A khuapi uh kisia gawpin kinusia a, a sungah kuamah om nawn lo hi.

⁷ Tua ahih manin ka mite in kei hong zahtakin ka thuhilhna ngai ding uh a, mangngilh lo ding uh hi, ci-in ka ngaihsun hi. Ahi zongin a gamtatsiat ngei bangun gamtalai veve uh hi,” a ci hi.

⁸ Topa in hih bangin thu gen a, “Tua ahih ciangin minamte ka mawhsak ni hun dong kei hong ngak phot dih un. Minamte le kumpi gamte kaikhawmin, ka hehna ka thuaksak ding, ka lungsim ka khensat khin hi. Ka hehluatna meikuang tawh leitung khempeuh kangtum ding hi.

⁹ “Tua ciangin minamte’ lungsim ka hei ding a, amaute in keima tung bekah thu hong ngenin, lungsim kikhatin ka na hong sem ding uh hi.

¹⁰ A gamlapi Ethiopia gam pekah a om, a kithehthang ka mite nangawn in biakna hong puak ding uh hi.

¹¹ Tua hun ciangin ka mite in kei nong lehdona hangun maizumna ding bangmah om nawn lo ding hi. Note lak panin a kiphasak, a kihisak mite ka hawlkhia ding a, Jerusalem khua-a ka mual siangtho tungah kei nong lehdo nawn kei ding uh hi.

¹² Note lakah a kiniamkhiat, mineute bek, ka suaktasak lai ding a, keima tungah huhna hong ngen ding uh hi.

¹³ Israel mi a omlai sunte, midangte tungah gilo nawn lo ding uh a, zuauthu gen nawn loin, mi khem ding zong ngaihsun nawn lo ding uh hi. Amaute cithei-in lungmuangin om ding uh a, kuamah kihta nawn loin om ding uh hi,” a ci hi.

¹⁴ Zion tanu aw, nakpitakin la sa inla, Israel aw, lungdamin kiko in. Jerusalem tanu aw, na lungsim khempeuh tawh lungdam in.

¹⁵ Topa in na galte hong phiatkhiatsak khin a, hong langpang khempeuh hong hawlkhiatsak khin hi. Topa ahi Israel kumpipa nang tawh hong om a, na launa ding bangmah om nawn lo hi.

¹⁶ Tua ni ciangin Jerusalem khuapi kiangah, “Zion khuapi aw, lau kei in. Na khut thazawsak kei in,” kici ding hi.

¹⁷ Topa na Pasian un note hong ompih a, ama vangliatna in hong gualzosak hi. Note tungah Topa lungkim ding a, ama hong itna tawh hong thakbawl ding hi. Note’ hangin Topa lungdamin la sa ding a,

¹⁸ pawi hun sungah mi a lungdamte bang ding hi. Topa in hih bangin thu gen a, “Note a dingin a lauhuai thu ka beisak khin a, na mindaina teng uh kong paihkhiatsak khin hi.

¹⁹ En un, tua hun ciangin no a hong bawlsiate gim ka pia ding a, a khebaite honkhia-in, a kipaikhiatpih mite ka ciahpihkik ding hi. Amau’ maizumna uh minthanna ka suaksak ding a, mi khempeuh in amaute a phat ding uh hi.

²⁰ Tua hun ciangin, a kithehthang na mite uh kong kaikhawm ding a, leitung mi khempeuh in note hong phat ding uh hi. A tawpna-ah note na cithei kik ding uh hi,” Topa in ci hi, a ci hi.