Zefaniah 1 - Tedim Bible

Topa’ Heh Thukna Ni

¹ Amon’ tapa Josiah, Judah gam kumpi ahih laitakin, Topa in Zefaniah’ tungah hih thu a pia hi. Zefaniah’ pa Kushi hi a, Kushi’ pa Gedaliah hi a, Gedaliah’ pa Amariah hi a, Amariah’ pa pen Kumpi Hezekiah ahi hi

² Topa in hih bangin thu gen a, “Leitung a om na khempeuh ka susia ding hi.

³ Mihing le ganhing, vana leeng vasa le tui sunga ngasa, a vekpi-in ka susia ding hi. Migilote ka susia ding a, leitung a om mihing khempeuh ka susia ding hi. Topa ahi keimah in hih thu ka gen khin hi.

⁴ “Judah gammi khempeuh susia mangin, Jerusalem khuami khempeuh ka sumai ding hi. Baal milim biakna a them banglai khempeuh le tua milim na a sem siampite ahi a, keima siampite ahi zongin, a vekpi-in ka sumai ding hi.

⁵ Innkhum zangah kahto-in, ni, kha, le aksi a bia mi khempeuh ka susia ding a, keimah hong bia-in, keima tungah thuman ding gen napi-in, Milkom pasian’ min tawh a kiciam teiteite zong, ka susia ding hi.

⁶ Lam pialin, kei hong zui nawn lote, thudong dingin kei kiangah hong pai nawn lote, ka susia ding hi,” a ci hi.

⁷ Topa Pasian’ mai-ah gamdai takin om un! Topa’ ni hong naita hi. Topa in biakna-a sa gawh bangin a mite a go dingin kithawi a, a gawh ding mite siansuah khin hi.

⁸ Topa in hih bangin thu gen a, “Tua bangin mite a kigawh ni-in, uliante le kumpipa’ tapate, le gamdangte’ ngeina a zuite khempeuh, gim ka pia ding hi.

⁹ Lawki mite bangin biakinn sungah a lamte, khemna le thahna tawh a ngah uh vante tawh, a topa uh’ inn a dimsakte khempeuh, tua ni mahin gim ka pia ding hi,” a ci hi.

¹⁰ Topa in hih bangin thu gen a, “Jerusalem khua-a om Ngasa Kulh kongpi-ah mite’ kikona na za ding uh a, tua khuapi Veng Nihna sungah mite’ kahna le mual neute tungah a puak zaizai na za ding uh hi.

¹¹ Khuapi Veng Nuainung sungah a teng mite aw, hih bang gamlumna na zak uh ciangin kapin thum un. Bang hang hiam cih leh sumbukte khempeuh si ding uh hi.

¹² “Tua laitakin Jerusalem khuasung meivak tawh ka zong ding a, thuphawk loin, a ngeina bangun omcip a, ‘Topa in a pha hitaleh a sia hitaleh bangmah bawl ngei lo hi,’ a ci mite, gim ka pia ding hi.

¹³ Amau’ neihsa khempeuh kisut ding a, a innte uh kisuksiatsak ding hi. Inn a lam hangun a sungah teng kha lo ding uh a, leenggui a suan hangun a leenggahzu dawn kha lo ding uh hi,” a ci hi.

¹⁴ Topa’ ni hong naita a, nai mahmahin hong tung hathat hi. Tua Topa’ ni hong tun ciangin galhang pente nangawn cimawhin kap ding uh hi.

¹⁵ Tua ni pen heh mahmah ni, lungkham sinkham ni, tuahsia-in kisuksiat gawp ni, khua zingin mai mial ni, meiipi kai-in huihpi nun’ ni,

¹⁶ galdona ding peengkul a kitum ni, kulhnei khuapite le a tausangte a kisimna-in galkapte a kiko ni hi ding hi.

¹⁷ Topa in hih bangin thu gen a, “Mihingte tungah lungkhamna lianpi ka tungsak ding a, amaute in mittaw bangin khua a zawt ding uh hi. Keima tungah amaute hong khial uh ahih manin, a sisan uh tui bangin kithehthang ding a, a luanghawm uh leilakah muatcip ding hi,” a ci hi.

¹⁸ Topa’ heh thuk ni hong tun ciangin a ngun le a khamte un amaute honkhia zo lo ding hi. Ama hehna meikuang in leitung khempeuh kangtum ding a, thakhat thu-in leitung a teng mi khempeuh a sumai ding hi.