Thuhilh-sia 12 - Tedim Bible

¹ Na lungkham hun ding a hong tun ma, “Nuntak nuamsa kei ing,” na cih ma hun, na khangno lai-in nang hong Piangsak pa phawk in.

² Lungkham hun i cih in: Nang a dingin nitaang, khataang, aksi taangte a dialh hun, meiipi kai a then’ nawn loh hun,

³ na muan na suan a thahat na khut, na baan, na khete, a thaneem hun, an hai nadingin na hatang tawmlua ta-in na mit maangin, limtakin khua na muh theih nawn loh hun,

⁴ khuasung gamlumnate na bil in za thei nawn loin, ansukna gingte na zak theih phat nawn loh hun, la kisate za thei nawn loin vasa ham nangawn in hong phawnzawh nawn loh hun,

⁵ keen sangte-ah pai ngam nawn loin, lam pai ding a haksat hun, na samte hong kangin, na khangno thahatna beita-in na tha a kiam hun ding ahi hi. Eite in a tawntung inn ding a zuan ding ihi a, khuasung lampi-ah kahna awging kiza ding hi.

⁶ I ngun meivak khaina a khau kitatin, i kham meivak kia-in kitam ding a, i tuikhaina khau kitatin, i tuikhaina beel kitam ding hi.

⁷ I pumpi, lei suakkik ding a, i nuntakna a hong pia Pasian’ kiangah i kha ciahkik ta ding hi.

⁸ Thugen Siampa in, “A kimanna a om lo, a mawknapi, na khempeuh a mawknapi ahi hi,” a ci hi.

Mihing’ Tavuan Bulpi

⁹ Thugen Siampa, mipil ahih banah, amah in ama theihteng mite tungah a hilh hi. Amah in paunakte limtakin sin a, a man ahihna thu hoihtakin entel hi.

¹⁰ Thugen Siampa in a zaknophuai kammal khawm a, ama gelh kammalte a man taktak ahi hi.

¹¹ Mipilte’ thugente pen tuucingte in tuu hawlna-in a zat ciangkhut hiam tawh kibang hi. Tua thute pen eite khempeuh tuucin bangin a hong Cing Pasian’ piak ahi hi.

¹² Ka ta aw, na phawk ding thudang khat omlai hi. Lai gelhin a bu-a bawlna in bei hun nei thei lo a, lai tam sin luatna in pumpi gimsak hi.

¹³ Hih thute khempeuh banah gen ding thu khat bek om hi. Mihing hong kipiansakna a thu bulpi pen in: Pasian zahtakna le a thupiakte manna ahi hi.

¹⁴ A pha hitaleh a sia hitaleh a simthamin i hih simte nangawn i hihna khempeuhah Pasian in thu hong khen ding hi.