Thuhilh-sia 10 - Tedim Bible

Haina Thaman

¹ A sisa thote in paknamtui bung sungah a om paknamtui uihsak thei a, haitatna themno khat in pilna lianpen susia thei hi.

² Mipilte a manin a gamtat ding a ngeina hi a, mihaite a sia-in a gamtat ding a ngeina ahi hi.

³ Mihaite lampi-ah a paikawm nangawnin hai tat uh a, a haina uh mi khempeuh theisak uh hi.

⁴ Nang tungah gam ukpa a heh leh na nasep za taisan pah kei in. Dai tak-a om hithiatna in khialhna lianpi maisak thei hi.

⁵ Hih leitungah a thuman lo gam ukte’ piansak ka muhte:

⁶ Mihaite, zalianpi kipia a, mihaute kiniamkoih suk hi.

⁷ Sakol tungah silate tuang a, miliante, sila bangin a khe-un pai uh hi.

⁸ Gum a tote gum sung mahah kia ding a, mi’ phung a phelsakte gul in tu ding hi.

⁹ Suang a tokhiate suang mah in liamsak ding a, sing a ekte sing ehna mahah liam ding hi.

¹⁰ I hei mawlnapi-in i tat kei leh nakpitakin sat kul a, ngaihsut masak ding pilhuai zaw hi.

¹¹ Gul khimthei napi i khim kei leh a kimanna om tuan lo hi; gul in hong tu veve ding hi.

¹² Mipilte’ kampauna in pahtawina ngahsak a, mihaite’ kampauna in amau mah siasak hi.

¹³ Thugen a kipat ciangun bangtumlo teng tawh kipan pah malam uh a, gitloh vai teng tawh a thugen a khum lel uh hi.

¹⁴ Mihaite in thu gengenin ciakciak uh hi. Mailam a thupiang ding kuamah in thei lo a, a sih khit-a thupiang ding a hong gen thei om lo hi.

¹⁵ A inn zuatna ding lampi a thei lo mihai luate bek, a inn lam zonna-in gim ding uh hi.

¹⁶ A kumpipa mi’ cih bangbangin gamta lel a, zankhuavak-in zune makai a a nei, gam khat peuhpeuh in lungkhamna thuak hi.

¹⁷ A kumpipa in lungsim khentatna nei thei a, a makaite in annek tuidawn a hun thei a, amau ki-uk thei-in zu a kham lo makai a nei, gam khat peuhpeuh a hampha gam ahi hi.

¹⁸ Thadah lua-in a inn vang nangawn a hu nuam lo mipa, a inn keh ding a, a inn nangawn in puklawh ding hi.

¹⁹ An in lung damsak a, zu in lung nuamsak hi. Sum in ahihleh na khempeuh a kicingsak hi.

²⁰ Na lungsim nangawnah kumpipa gensia kei in. Kuama zak lohna mun na lupna tung nangawnah mihaute samsia kei in. Thopi in na thugen teng na puakkha ding hi.