Solomon la 8 - Tedim Bible

¹ Ka nu’ sung pana piang ka sanggampa hi lecin kei ka ut hi. Tua hileh, lamkalah hong tuak taleng zong kong tawptawp ding a, kuamah in phamawh sa lo ding hi.

² Keima pianna ka nu’ inndei sungah nang kong paipih ding a, tua lai-ah nong kawi ding hi. Tua lai-ah leenggahzu lim, mang kawlsing tui, kong tulh ding hi.

³ A veilam khut hong khamsak a, a taklam khutin hong kawi hi.

⁴ Jerusalem nungakte aw, ko’ kingaihna nong suknawi loh nadingun kei tungah hong kiciam un.

Dawng Gukna Nungakte

⁵ Gamlak panin a lawmpa tawh khut kilensa-in a hong paikhia kua ahi hiam? Nangmah na pianna mun, na nu in hong neihna mun, epel kung nuai panin nang kong phong hi.

Nungak

⁶ Kei simloh kuamah ngai kei inla, kei simloh kuamah kawi kei in. Itna zong sihna zahin thahat a, ngaihna zong sihna zahin khauh hi. Itna, mei bangin kuangkhia a, meikuang lianpen a suak hi.

⁷ Tui tampi nangawn tawh kisumit zo lo a, tui sungah i phumcip hangin mitzo tuan lo hi. Mi khat in a neihsa sum khempeuh tawh itna a lei dingin hong kithawi leh kinuihsan lel ding hi.

Nungak’ Sanggamte

⁸ Sanggam numeino khat ka nei uh a, a nawite neu mahmah hi. Tangval khat in hong hel zenzen leh ka sanggamnu uh bangci huh ding ka hi uh hiam?

⁹ Amah khua umna kulh hileh, ngun kibawl tausang tawh ka hu ding uh a, amah kulhkongpi hileh, taamtak singpekte tawh ka dal ding uh hi.

Nungak

¹⁰ Kei, khuakulh ka hi a, ka nawite, a tausang ahi hi. Limtakin kei hong kihutna ka ngaihno in thei ding hi.

Tangval

¹¹ Baalhamon a kici munah Solomon in leenggui lo khat a nei hi. Amah in tua lo a kho dingin losapte sawl a, a lo-a piangte’ man dingin losapte khat in ngun dangka tulkhat ciat a piak ding uh ahi hi.

¹² Keimah in keima aituam leenggui lo khat ka nei hi. Solomon aw, na ngun dangka tulkhat la inla, lokhote’ tungah amau’ tanh ding a zah nih pia in.

¹³ Huan sunga om ka ngaihno aw, ka lawmte in hong ngai dide ahih manin nangma aw zong, hong gingsak dih in.

Nungak

¹⁴ Ka ngaihno aw, sanang bangin, paknamtui kung a pona mun mualtung a om sakhitalno bangin kei kiangah hong pai in.