Solomon la 7 - Tedim Bible

Tangval

¹ Kumpi mel a pua a ngaihbaang nungak aw, na khete le na khedap kilawm mahmah! Na phei le na tanzumte sing suih siamte’ suih bang hiuhiau!

² Na kalkawm pen leenggahzu lim tawh a kilawi lo hai bangin uk kiukeu hi. Na kawng pen unok pak tawh a ki-um buhlom hen tawh kibang hi.

³ Na nawite pen a takhawm helhel sakhi peeng, a omkhawm hialhial sanang nih tawh kibang hi.

⁴ Na ngawng, saiha tausang tawh kibang hi. Na mitte pen Heshbon khuapi kulh gei-a om tuilite tawh kibang hi. Na nak pen Damaskas khuapi lam a nga Lebanon tausang bangin hoih hiuhiau hi.

⁵ Na lutang pen Karmel Mual bangin kitawito a, na samphekte san hiuhiau a, a etlawmna in kumpipa’ mit la vangvang hi.

⁶ Itluat aw na ngaihbaang a, na mel kong muh nuam zungzung hi.

⁷ Tuum kung bangin na etlawm a, na nawite pen, nisuh gah a bawk pha mahmah tawh a kibang hi.

⁸ Tuum kung tungah kahto-in a gah ka lo ding hi. Na nawite kei a dingin leenggah bawk tawh kibang a, na gimnam epel min bangin namtui hi.

⁹ Na kam, leenggahzu bangin khum zungzung hi. Ka ngaihno tungah leenggahzu khum luang hen la, a muk a ha tawk kim hen.

Nungak

¹⁰ Ka ngaihno a’ ka hi a, amah in kei hong deih hi.

¹¹ Ngaihno aw, gamlakah paikhia-in leenggui lo-ah va giak ni.

¹² Zingsangin tho baihin leengguite a sel nai hiam, leengguite a pak nai hiam, mang kawlsing kungte a pak nai hiam, i en ding hi. Tua lai munah kong itna letsong ka hong pia ding hi.

¹³ Tua lai-ah zawl-ai kung a namtui gim na za ding a, singgah lim namcin i kong gei-ah a om hi. Ngaihno aw, a gah a lui le a thak nang a dingin na duhduh kong koihsak hi.