Siampi Laibu 3 - Tedim Bible

Thunuama Piakna

¹ “Mi khat’ biakna pen thunuama biakna ahih a, amah in a nu hitaleh a pa hitaleh bawnghon lak panin a piak leh, amah in Topa’ mai-ah a sitbaang lo pia ding hi.

² Tua ciangin amah in a biakna ganhing lu tungah a khut nga-in kikhopna buk kongah go ding a, tua ciangin Aaron’ suan siampite in biakna tau kimkot tungah a si theh ding uh hi.

³ Thunuama biakna panin Topa’ tungah mei tawh biakna-in a gilpi tuam a thaute le a sungkuate’ tunga a om a thau khempeuh tawh,

⁴ a kawnga om a kal nihte a thau le a kalte tawh a lakkhiat khop ding ahi a sintuamte pia ding uh hi.

⁵ Tua ciangin Aaron’ suante in mei tunga om sing tunga meihal biakpiakna tau tung mahah hal ding uh hi. Tua pen Topa a dingin a gim namtui, mei tawh kihal biakna ahi hi.

⁶ “Topa’ tungah thunuama a piak ding ama biakna pen tuu le keel honte sung panin a nu hitaleh a pa hitaleh ganhing khat ahihleh, amah in a sitbaang lo pia ding hi.

⁷ Amah in biak nadingin tuuno khat a piak leh, Topa’ mai-ah pia ding a,

⁸ a biakna ganhing lu tungah a khut nga-in kikhopna buk mai-ah go ding hi. Tua ciangin Aaron’ suante in biakna tau kimkot tungah a si theh ding uh hi.

⁹ Tua ciangin thunuama biakna panin Topa’ tungah meihal biakna-in a thau, a nungguh ciangah a ki-attan a mei thau buppi le a gilpi tuam a thaute le a sungkuate tunga om a thau khempeuh tawh,

¹⁰ a kawnga om a kal nihte a thau tawh, a kalte tawh a lakkhiat khop ding ahi a sintuamte pia ding uh hi.

¹¹ Tua ciangin siampipa in Topa’ tungah mei tawh kihal an tawh biakna-in biakna tau tungah hal ding hi.

¹² “Ama biakna keel ahihleh, amah in Topa’ mai-ah pia ding a,

¹³ a lu tungah a khut nga-in kikhopna buk mai-ah go ding hi. Tua ciangin Aaron’ suante in biakna tau kimkot tungah a si theh ding uh hi.

¹⁴ Tua ciangin Topa’ tungah mei tawh kihal biakna-in piak dingin a gilpi tuam a thau le a sungkuate tunga om a thau khempeuh tawh,

¹⁵ a kawnga om a kal nihte a thau tawh, a kalte tawh a lakkhiat khop ding ahi a sintuamte pia ding uh hi.

¹⁶ Tua ciangin siampipa in a gim namtui dingin mei tawh kihal an tawh biakna-in biakna tau tungah hal ding hi. A thau khempeuh Topa-a’ ahi hi.

¹⁷ Tua pen na khang tawntungun na tenna khempeuh uhah note in a thau le sisan na nek loh nadingun a tawntungin ngeina kip hi ding hi,” a ci hi.