Sawltak 9 - Tedim Bible

Saul A Kikheelna

¹ Tua hun sungteng Saul in Topa’ thu a um mite thah dingin a hanciamna zomlai hi. Siampi lianpen pa kiangah pai a,

² Topa’ thu a zui mi numei pasal a muh peuhpeuh manin Jerusalem khua-ah a ciahpih theih nadingin Damaskas khua-a Jew mi kikhopna inn ukte kiangah a lah dingin lai a ngen hi.

³ Damaskas khua a zuan dingin pai a, a tun dektak ciangin thakhat thu-in van panin ama kimkotah a hong taangzaih khat a om hi.

⁴ Saul, leilakah puksuk a, tua laitakin awging khat in ama kiangah, “Saul, Saul aw, bang hangin kei hong bawlsia na hi hiam?” a ci hi.

⁵ Saul in, “Topa aw, kua na hi hiam?” ci-in a dot ciangin, “Nangmah in na hong bawlsiat Jesuh ka hi hi.

⁶ Ahi zongin tho-in khuapi sungah lut in; tua lai panin na gamtatna dingteng hong kigen ding hi,” a ci hi.

⁷ Saul tawh a tonkhawm mite in a awging a zak uh hangin kuamah mu lo uh ahih manin lamdangsa lua-in pau thei lo liangin a om uh hi.

⁸ Saul zong leilak panin thoto a, a mit a hah hangin khua mu thei lo hi. Tua ahih manin a kikholhpihte in a khutin lenin Damaskas khua-ah a paipih uh hi.

⁹ Ni thum sung khua mu thei loin, anletui zong a ne kei hi.

¹⁰ Tua laitakin Damaskas khua-ah Ananias min nei thu um mi khat a om hi. Amah in maang mu a, a maang sungah Topa in, “Ananias aw,” ci-in a sam hi. Ananias in, “Topa aw, ka om hi,” ci-in a dawng hi.

¹¹ Tua ciangin Topa in Ananias kiangah, “Kithawi-in Kongzing Tang gei-a Judas inn-ah va pai inla, Tarsas khuami Saul min nei mi khat va kan in. Tua Saul in thu ngen a,

¹² khua a muhkik theih nadingin Ananias min nei mi khat hong pai-in ama lu tungah a khut a ngakna thu, a maang muhna sungah a mu hi,” a ci hi.

¹³ Ahi zongin Ananias in, “Topa aw, hih mipa in Jerusalem khua-a om nangma mite a bawlsiatna thu khempeuh, mi tampi tak in kei tungah hong gen khinzo uh hi.

¹⁴ Tu-in zong nangmah a hong bia mi khempeuh a mattheih nadingin siampi liante tung panin thu a ngahkhit ciangin Damaskas khua-ah a hong tung ahi hi,” a ci hi.

¹⁵ Ahi zongin Topa in Ananias kiangah, “Gentail mite, kumpite, le Israel mite tungah keima min a kitheisak ding, keima na a sem dingin teelkhin ka hih manin ama kiangah va pai in.

¹⁶ Keima hangin a thuak ding thu khempeuh zong, kei mahmah in ama tungah ka gen ding hi,” a ci hi.

¹⁷ Tua ahih manin Ananias zong pai a, inn sungah a lutkhit ciangin Saul lu tungah a khut nga a, “Sanggam Saul aw, hih lai-ah nong pai lai-in nangma tungah a hong kilang Jesuh mahmah in kei hong sawl hi. Nangmah in khua muthei kikin, Kha Siangtho tawh na kidim theih nadingin nangma kiangah a hong paisak ahi hi,” a ci hi.

¹⁸ Tua laitakin Saul’ mit panin ngasalip tawh a kibang na pawlkhat kia a, khua a mukik thei hi. Saul zong tui kiphumpah a,

¹⁹ an a nekkhit ciangin a tha hong hatkik hi. Damaskas khua-ah a om thu um mite tawh tawlkhat sung a omkhawm hi.

Saul in Damaskas Khua-ah Thu Hilh

²⁰ Kikhopna innte-ah va pai-in, “Jesuh pen Pasian’ Tapa ahi hi,” ci-in thu hilh ding a kipan hi.

²¹ Ama thuhilh a za mi khempeuh in lamdangsa uh a, “Pasian a bia mi peuhpeuh, Jerusalem khua sungah a that pa hi lo ahi hiam? Hih lai-ah zong thu um mite manin siampi liante kiangah a ciahpihkik dingin a hong pai hi lo ahi hiam?” a ci uh hi.

²² Ahi zongin a thuhilhna-ah Saul hong siam semsem a, Jesuh pen Khrih hi, ci-in teltakin lakthei ahih manin, Damaskas khua-a om Jew mite in a nial nading uh om thei lo hi.

Jew Mite Kiang Panin Saul Suakta

²³ Tuazawh ni tampi khit ciangin Jew mite kikaikhawmin Saul thahsawm uh a,

²⁴ ahi zongin Saul in amah a kisawm lamtak na phawk hi. Jew mite in Saul a thahtheih nadingun a sun a zanin khua kongpi-ah a pang uh hi.

²⁵ Ahi zongin Saul’ nungzuite in zanin khuakulh tungah kahtohpihin kulh pualamah bawm tawh a khaisuk uh hi.

Jerusalem Khua-ah Saul Pai

²⁶ Jerusalem khua-ah Saul pai a, thu um mite tawh kipawl dingin a vaihawm hi. Ahi zongin amaute in Saul pen thu um dingin na ngaihsun zo lo uh ahih manin na kihta mahmah uh hi.

²⁷ Tua ciangin Barnabas in Saul hong huh a, sawltakte kiangah Saul a va paipih hi. Lam a pai laitakin Saul in Topa a muhna thu, Topa in Saul kiangah a thugennate, le Damaskas khua-ah Saul in hangtakin Jesuh’ min tawh thu a hilhnate khempeuh sawltakte kiangah a gensak hi.

²⁸ Tua ahih manin Saul zong sawltakte tawh kikhawl a, Jerusalem khua sungah vak kawikawi-in, Topa’ min tawh hangtakin thu a hilh hi.

²⁹ Grik pau a zang Jew mite tawh zong thu genkhawmin kisel uh a, amaute in Saul thah dingin a vaihawm uh hi.

³⁰ A lawmte in hih thu a phawk uh ciangin Sisaria khua-ah Saul paipihsuk uh a, tua lai panin Tarsas khua-ah a ciahsak uh hi.

³¹ Tua ahih manin Judea gam, Galilee gam, le Samaria gam sunga om pawlpite in bawlsiatna thuak nawn loin nuamtakin om uh a, Topa zahtakna tawh gamta uh ahih manin Kha Siangtho huhna tawh a mi khangin a kibehlap uh hi.

Aineas Kidamsak

³² Peter khualzinin pai kawikawi a, khatvei Lydda khua-a teng Pasian’ mite kiangah a hawh hi.

³³ Tua khua a tun ciangin a khutlekhe a zaw, kum giat sung tawntung lupna ngakin a om, Aineas kici mi khat a mu hi.

³⁴ Peter in tua pa kiangah, “Aineas aw, Jesuh Khrih in nang hong damsak hi; tho-in na lupna zial in,” a ci hi. Amah zong thakhatin thoto pah hi.

³⁵ Tua khua-a teng mi khempeuh le Sharon zanglei-a teng mi khempeuh in Aineas mu uh ahih manin Topa a um uh hi.

Dorkas Kihingsak Kik

³⁶ Joppa khua-ah Pasian’ thu a um, Tabitha min nei numei khat a om hi. (Tua nu’ Grik min pen Dorkas hi a, sakhi a cihnopna ahi hi.) Tua nu a tawntungin a hoihin gamta-in mizawngte a huh hi.

³⁷ Tua laitakin amah a ci na-in a si hi. Amah a silkhit uh ciangin inndei tungnungah a sial uh hi.

³⁸ Joppa khua le Lydda khua kigamla lo ahih manin, Joppa khua-a teng thu um mite in Lydda khua-ah Peter om hi, ci-in thu a zak uh ciangin Peter kiangah mi nih sawl uh a, “A manlang theithei-in ko kiangah hong pai in,” ci-in a samsak uh hi.

³⁹ Peter zong kithawi-in a samte tawh paikhawm pah a, tua khua a tun ciangin inndei tungnungah a na paipihto pah uh hi. Tua lai-ah a na om meigong numei khempeuh in Peter na umcih uh a, Dorkas a hin lai-in amaute a dingin a bawlsak puanakte le puantungsilhte, a kahkawmun Peter kiangah a lak uh hi.

⁴⁰ Peter in innsung panin amaute khempeuh a pusuahsak khit ciangin khukdinin thu a ngen hi. Tua ciangin misi nu lamah kihei a, “Tabitha aw, tho in,” a cih ciangin a mit hong hak a, Peter a muh ciangin a tuto hi.

⁴¹ Peter in a khut khakin a dingtosak hi. Tua ciangin thu um meigong numeite a kipanin thu um khempeuh samkikin amaute kiangah Dorkas a nungta-in a lak hi.

⁴² Joppa khuasung khempeuhah hih thu kitheikim a, mi tampi in Topa a um uh hi.

⁴³ Joppa khua-ah ni tampi sung Peter tamlai a, savunnim nasepin a nei Simon a kici mipa tawh a omkhawm hi.