Sawltak 7 - Tedim Bible

Stefen A Kihutna

¹ Tua ciangin siampi lianpen pa in Stefen kiangah, “Tu-a amaute’ gen bang takpi mah ahi hiam?” ci-in a dot ciangin

² Stefen in, “Ute pate aw, ka thugen hong ngai un. I pupi Abraham, Haran khua-ah a tenma, Mesopotamia gamah a om lai-in, ama kiangah a minthang Pasian kilang a,

³ ‘Na gam na lei, na beh na phungte kiang panin paikhia inla, nangma tungah kong lah ding gamah pai in,’ ci hi.

⁴ Amah zong Khaldea gam panin paikhia-in Haran khua-ah teng hi. A pa a sih khit ciangin Pasian in tu-a na tenna uh hih gamah amah na lalsak leuleu hi.

⁵ Pasian in Abraham tungah ama aituam dingin leitang khutpeek cia nangawn pia lo napi-in, amah le a suan a khakte tungah hih gam a piak nading thu a ciam hi. Pasian in tua thuciamna a piak laitakin Abraham in ta nei nai lo hi.

⁶ Tua bang hinapi-in, Pasian in Abraham kiangah, ‘Na suan na khakte gam dangah tengin salin om ding uh a, kum zali sung nakpitakin gimna thuak ding uh hi.

⁷ Ahi zongin sila-in a nei gam mite tungah thu ka khen ding a, na suan na khakte tua gam panin paikhia-in hih lai gamah kei hong bia ding uh hi,’ ci hi.

⁸ Tua ciangin Pasian in Abraham tungah kiciamna limin vun-atna ngeina na pia hi. Tua ahih manin Abraham in a tapa Isaac a suahzawh nipikal khat khit ciangin a vun at a, Isaac in a tapa Jakob’ vun at leuleu a, Jakob in eite’ pupite ahi a tapa sawm le nihte’ vun na at leuleu hi.

⁹ “I pupi dangte in Josef na haza uh a, mi tungah na zuakin, a leite in Egypt gamah sal dingin a na zuaksawn uh hi. Ahi zongin Pasian in i pupi Josef na huh a,

¹⁰ a thuakna khempeuh panin na honkhia hi. Egypt kumpipa Faro’ mai-ah Josef a tun ciangin Pasian in ama tungah pilna le a deihhuai gamtat hoih na guan hi. Tua ahih manin Faro in ama khutnuai-ah a gam a uksawn ding le a kumpi innsung khempeuh a van dingin a koih hi.

¹¹ Tua ciangin Egypt gam le Kanaan gam khempeuhah kialpi tung a, mi khempeuh in haksatna thuak uh ahih manin i pupite in zong annek ding muzo nawn lo uh hi.

¹² Tua ahih manin Egypt gamah an om hi, ci-in Jakob in thu a zak ciangin i pupite ahi a tapate a khatveina na na paisak hi.

¹³ A nihveina a pai uh ciangin a sanggamte tungah i pupi Josef na kipulak a, tua hun a kipanin Faro in zong Josef innkuansung thu na thei hi.

¹⁴ Tua ciangin Josef in a pa Jakob kiangah mi sawl a, amah a kipan a innkuan mi khempeuh Egypt-ah a pai nadingun a gensak hi. Tua hun laitakin Jakob innkuan mi sawmsagih le nga pha uh hi.

¹⁵ Tua ahih manin Jakob zong Egypt gamah pai a, amah a kipan i pupite khempeuh tua gamah a si uh hi.

¹⁶ Amau’ luanghawmte, Shekhem khua-ah kipua a, Abraham in Hamor-te beh tung panin han dingin sum tawh a lei leitangah kiphum hi.

¹⁷ “Pasian in Abraham tungah a thuciamna a tunsak ding a nai kuan ciangin Egypt gamah ei mite tampi tak na pha ta uh hi.

¹⁸ A tawpna-ah Josef a thei lo kumpi dang khat, Egypt gam sung a uk dingin hong kipan hi.

¹⁹ I mipihte na khemgawpin na khelbawl a, a ta ngeekte uh a sih nadingin inn panin mun dangah a koihkhia sak hi.

²⁰ Hih hunin naungek melhoih mahmah khat na suak hi. Inn-ah kha thum sung kikem a,

²¹ inn panin a kikoihkhiat ciangin Faro’ tanu in a ta dingin la a, ama tapa bang teekteek mahin bawlin a khansuah hi.

²² Egypt gam sunga pilna om khempeuh ama tungah kihilh a, thugenna le nasepna-ah milian mahmah khat a suak hi.

²³ “Amah kum sawmli a phak ciangin Israel’ suan a mipihte lakah painopna lungsim a nei hi.

²⁴ Tua bangin a mipihte lakah a va pai ciangin Egypt mite khat in a Israel mipihte khat a bawlsiatna mu a, a mipih pa a hutna-in Egypt mipa a satlum hi.

²⁵ Amah pen eite hong honkhia dingin Pasian in a zat ding mipa hi, ci-in a mipihte in a thei ding sa a, ahi zongin a mipihte in na thei lo uh hi.

²⁶ A zing ciangin Israel mi nih a kilai mu leuleu a, amaute a phelh dingin kipanin, ‘Lawmte aw, minam khat hi lo na hi uh hiam? Bang hangin khatlekhat tuaci kibawl na hi uh hiam?’ ci hi.

²⁷ A lawmpa a bawlsia pa in Moses sawnkhia-in, ‘Kote a hong uk ding le thu a hong khen dingin kua in nang hong koih ahi hiam?

²⁸ Zan-a Egypt mipa na thah bangin kei zong a hong thatnuam na hi hiam?’ a na ci hi.

²⁹ Moses in hih thu a zak ciangin Egypt gam panin taikhia-in Midian gamah ten ding kipan a, tua gamah tapa nih a nei hi.

³⁰ “Tua gamah kum sawmli a ten khit ciangin, Sinai Mual tung gamlakah sawlpang lak a meikuang sungah vantungmi khat ama kiangah hong kilang hi.

³¹ Moses in a muh ciangin lamdangsa a, a nai takin a muhtheih nadingin sawlpang kuang kiangah a va pai hi. Ahi zongin Topa’ awging za a,

³² ‘Kei pen na pu na pate uh ahi Abraham, Isaac, le Jakob-te’ Pasian ka hi hi,’ a na ci hi. Moses zong lau-in linggawp a, en ngam lo hi.

³³ Tua ciangin Topa in Moses kiangah, ‘Na dinna mun pen a siangtho leitang ahih manin na khedap suah in.

³⁴ Ka mite in Egypt gamah bawlsiatna a thuaknate teltakin ka mukhin hi. Amaute’ tauna awging ka za a, amaute a honkhia dingin a hong paisuk ka hi hi. Hih lai-ah hong pai in; Egypt gamah nang ka hong paisak ding hi,’ na ci hi.

³⁵ “Moses pen Israel mite in deih loin, ‘Kote a hong uk ding le thu a hong khen dingin kua in hong koih ahi hiam?’ a cih pa uh ahi hi. Ahi zongin Moses pen sawlpang kuang sung pan ama kiangah a kilang vantungmi’ huhna tawh ukpa le honkhia pa ahi dingin Pasian in a sawl pa ahi hi.

³⁶ Amah in Egypt gam le San Tuipi-ah lim le na lamdangte bawlin, Egypt gam panin Israel mite paikhiatpih a, gamlakah kum sawmli sung amaute a makaih hi.

³⁷ Hih Moses pen Israel mite tungah, ‘Pasian in kei hong sawl mah bangin, i mipihte sung mah panin note a’ ding kamsang khat hong sawl ding hi,’ a ci pa ahi hi.

³⁸ Amah pen Israel mite tawh gamlakah a om pa hi a, Sinai Mual tunga ama kiangah thu a gen vantungmi le i pute tawh a kikhawlpa ahi hi. Eite tungah hong gensawn dingin Pasian kiang panin a tul ngei lo thu a ngah ahi hi.

³⁹ “Ahi zongin i pute in ama thu na mang nuam loin, amah na nawlkhin uh a, Egypt gamah ciahkik nopna lungsim na nei uh hi.

⁴⁰ Tua ahih manin amaute in Aaron kiangah, ‘Egypt gam panin eite a hong paikhiatpih tua Moses tungah bang thu piang hiam cih thei lo ihih manin, eite’ mai-ah i paisak ding milim pasian pawlkhat hong bawlsak in,’ ci uh hi.

⁴¹ Tua ahih manin amaute in bawngno tawh a kibang lim khat bawl uh a, ganhing tawh tua milim bia-in, amaute’ bawltawm pasian hangin lungdamin pawi a na bawl uh hi.

^42-43 Tua ahih manin kamsangte laibu sungah, ‘Israel mite aw, gamlakah kum sawmli sung, gan go-in biakna na piakte uh kei tunga nong piak uh hi lo hi. Note in na puak uh puanbuk pen Molok pasian milim puanbuk le note’ aksi pasian Refan’ puanbuk ahi hi. Tuate pen na biak dingun note’ bawltawm milim ahih manin Babylon khuapi khen pekah salin ka hong paisak ding hi,’ ci-in a kigelh mah bangin Pasian in amaute nungngat a, vana om aksite a bia dingin amaute a sawlkhia hi.

⁴⁴ “Gamlakah a omlai-un i pute in Pasian’ ompihna puanbuk nei uh a, Pasian in Moses tungah a gensa, a lim ding a lahsa bang teekteekin a kibawl ahi hi.

⁴⁵ Tua khit ciangin i pute in amau’ pate tung panin a ngah uh tua puanbuk pen amau’ ten nading gam a la dingin a kuan uh ciangin na pua uh a, Pasian in amaute’ mai-ah tua gam mite hawlkhiatsak ahih manin tua gam a luah uh ciangin a puanbuk zong a na tunpih uh hi. Tua ahih manin David’ hun ciang dong tua puanbuk na om hi.

⁴⁶ David in Pasian’ maipha ngah ahih manin, Jakob Pasian a dingin biakinn khat a vaihawm sak nadingin Pasian kiangah a ngen hi.

⁴⁷ Ahi zongin Pasian a dingin biakinn a lamsak pen David hi loin a tapa Solomon ahi hi.

^48-50 Ahi zongin kamsangpa in, ‘Topa in hih bangin ci hi: Vantung pen keima tokhom hi a, leitung zong ka khe ngakna mun ahi hi. Kei a’ ding bang biakinn hong lamsak thei ding a, ka om nading koi lai mun hi thei ding ahi hiam? Hih nate khempeuh keima bawlsa hi lo ahi hiam, ci hi,’ ci-in a gen mah bangin mihingte’ lamsa inn sungah a Lianpen Pasian a teng hi lo hi.

⁵¹ “Na lungsim uh khauh mahmah a, lawki lungsim paii-in, Pasian’ thu-ah bilngong na bang uh hi. I pu i pate mah bangin Kha Siangtho thu na mang nuam kei uh hi.

⁵² I pu i pate in kamsang a bawlsiat loh khat beek om lo hi. Pasian’ deihna bangin a gamta a Nasempa a hong pai nading thu a genkhol Pasian’ kamtaite na that uh a, tu-in note in tua nasempa lehhekin na that leuleu uh hi.

⁵³ Note in vantungmi tungtawnin Pasian’ hong piak thukham ngah napi-in na mang nuam kei uh hi,” a ci hi.

Suang tawh Stefen a Kidenna

⁵⁴ A kikhawm uliante in Stefen’ thugen a zak uh ciangin nakpitakin heh uh a, a ha uh gawisan uh hi.

⁵⁵ Ahi zongin Stefen ahihleh Kha Siangtho tawh kidimin vantung lam ento a, Pasian’ minthanna vang le Pasian’ taklamah Jesuh a ding mu ahih manin,

⁵⁶ “En un! Vantung kihong a, Pasian’ taklamah Mihing Tapa a ding ka mu hi,” a ci hi.

⁵⁷ Ahi zongin amaute in a bil uh humsanin nakpitakin kiko-in Stefen bawhhuan uh a,

⁵⁸ khua pualamah kaikhia-in suang gol pipi a khiat uh hi. Hih thu-ah teci pangin Stefen a deng mite in a puantungsilh uh suahin Saul a kici tangval khat kiangah lawnin a kemsak uh hi.

⁵⁹ Tua bangin suang a khiat thuahthuah laitakun Stefen in thu ngen a, “Topa Jesuh aw, ka kha hong la in,” a ci hi.

⁶⁰ Tua ciangin amah kunin nakpitakin kiko a, “Topa aw, hih mite’ mawhna na maisak in,” a cih khit ciangin a si ta hi.