Sawltak 19 - Tedim Bible

Paul in Efesa khua-ah Thu Hilh

¹ Korin khua-ah Apollos a om laitakin Paul khual hong zinin Efesa khua hong tung hi. Tua khua-ah thu um mi pawlkhat tawh kimu a,

² “Thu na up uh ciangin Kha Siangtho na ngah uh hiam?” ci-in a dot leh, “Kha Siangtho a omlam nangawn ka za nai kei uh hi,” ci-in a dawng uh hi.

³ Tua ciangin Paul in, “Tua ahihleh na kituiphumna dan uh bangci bang ahi hiam?” ci-in a dot ciangin, “Tuiphumpa Johan’ thugen bang pawl ahi hi,” ci-in a dawng uh hi.

⁴ Tua ciangin Paul in, “Johan’ hilh tuiphumna pen mawhna a kisik mite a’ ding ahi hi. Amah in Israel mite kiangah, ‘Keima nunga hong pai ding pa Jesuh um un,’ ci-in gen hi,” a ci hi.

⁵ Amaute in hih thu a zak uh ciangin Topa Jesuh’ minin tui a kiphum uh hi.

⁶ Paul in amaute tungah a khut a ngakkhit ciangin amaute tungah Kha Siangtho hong tung hi. Amaute in pau lamdang hong paupah uh a, Pasian’ thu zong a gen uh hi.

⁷ Tua mite sawm le nih a pha uh hi.

⁸ Tua ciangin Paul in kikhopna inn sungah hangtakin kha thum sung thu hilh a, mite in Pasian’ Ukna thu a upzawh nadingun nakpitakin a gen hi.

⁹ Ahi zongin mi pawlkhat in kin hetloin um nuam lo uh a, mipi’ zakin Topa’ thu paiziate gensia gawp uh ahih manin Paul in amaute nusia-in thu um mite paikhiatpih a, Tirannas in thugenna-in a neih innpi sungah nisimin thugenna hun a zang hi.

¹⁰ Hih bangin kum nih sung tawntung thu gen niloh ahih manin Asia gam sunga om Jew mi le Gentail mi khempeuh in Topa’ thu a za uh hi.

Skeva’ Tapate in Dawi Hawlkhiat Sawm

¹¹ Pasian in Paul’ tungtawnin nalamdang lianpipi a bawl hi.

¹² Ama zat mainul ahi a, a puante ahi zongin cinate kiangah a kipaipih ciangin a natnate uh damin, a sunga om dawite zong a taikhia uh hi.

¹³ Dawi hawlkhia-in a vak kawikawi Jew mi aitawi pawlkhat in zong Topa Jesuh’ min zangin dawi hawlkhiat ding a sawm uh hi. Amaute in dawite kiangah, “Paul in a gengen Jesuh’ min tawh thu kong pia uh hi,” a ci uh hi.

¹⁴ Siampi lianpen Skeva’ tapa sagihte in tu-a bang danin na sem uh hi.

¹⁵ Ahi zongin dawite in amau kiangah, “Jesuh ka thei uh a, Paul zong ka thei uh hi. Note kua na hi uh hiam?” a cihkhit uh ciangin,

¹⁶ dawilutna mipa in amaute buan gawpin zogawp ahih manin, a liam a bai, puan keksa-in tua mipa’ inn panin a taikhia uh hi.

¹⁷ Efesa khua-a om Jew mi le Gentail mi khempeuh in hih thu za-in lau mahmah uh a, Topa Jesuh’ min nakpitakin a kiphat semsem hi.

¹⁸ Thu a um midang tampi tak zong hong pai uh a, mipi’ zakin a gamtatnasate khempeuh uh hong pulak uh hi.

¹⁹ Ai a san ngei mi tampi tak in zong a aisanna laibute uh hong paipih uh a, mi khempeuh’ muhin a haltum uh hi. Tua laibu mante a gawm uh ciangin ngun peek then nga man bang ahi hi.

²⁰ Tu-a bang danin Topa thu nakpitakin hong khangin hong kizel semsem hi.

Efesa khua-ah Buaina

²¹ Hih bang thuteng a piankhit ciangin Masedonia gam le Akhaia gamah Paul zinin Jerusalem-ah paisuak ding a ngaihsun hi. Tua khit ciangin Rom khua-ah zong pai ning, a ci hi.

²² Tua ahih manin amah a huh Timoti le Erastas, Masedonia gamah paisak a, amah in Asia gam sungah tawlkhat hun a zang hi.

²³ Tua hun laitakin Topa’ thu hangin Efesa khua-ah buaina lianpi khat a hong piang hi.

²⁴ Demetrias min nei ngunseek mipa khat in Artemis nusian biakna inn lim ngun tawh bawl a, tua nasepna in amah le a naseppih mite a dingin hauhna lianpi a piangsak hi.

²⁵ Tua ahih manin amaute’ sep bang a sem midang khempeuh kaikhawmin, “Lawmte aw, hih nasepna hangin a hau ihihna thu na thei uh hi.

²⁶ Nomau mahmah in hih Paul’ thugen khempeuh za-in na thei uh hi. Amah in mihingte’ bawl pasian-te pen pasian hi het lo hi, ci-in thu hilh a, hih Efesa khua le Asia gam sung khempeuhah mi tampi tak a umsak hi.

²⁷ Tua ahih manin i nasepna a siatkhak ding lauhuai hi. Tua bek hi loin, Asia gam sung mi le leitung mi khempeuh in a biak Artemis nusian biakna innpi a mawkna hong suahkhak ding, le a liatna teng a maimankhak ding nak lauhuai mahmah hi,” a ci hi.

²⁸ Mihonte in hih thu a zak uh ciangin heh mahmah uh a, “Efesa khuamite’ Artemis lianpen hi,” ci-in awngkekgawp uh hi.

²⁹ Khuasung khempeuhah tua buaina hong kizel a, mihonte in Paul tawh a kikhawl Masedonia mi Gaias le Aristarkhas manin mihon kikhopna innpi-ah a kai uh hi.

³⁰ Paul zong tua innsung mihonte mai-ah thugen dingin painuam a, ahi zongin thu um mite in a pai ding a phal kei uh hi.

³¹ Paul’ lawm ahi tua gam a ulian pawlkhatte in Paul kiangah kamtai paisak uh a, hih kikhopna munah hong kilak het kei in, ci-in nakpitakin a khosak uh hi.

³² Tua innpi sungah mihonpi buai ngeingai uh a, mi a tamzaw in a paina thu uh thei lo uh ahih manin, pawlkhat in thu khat genin awnggawp uh a, adang pawlkhat in a thu tuampi khat na awng leuleu uh hi.

³³ Jew mite in mihonpi mai-ah Alexander hong dingsak uh ahih manin, mi pawlkhat in hih thupiang ama hang hi, ci-in ngaihsun uh hi. Alexander in mihonte a gamdaih nadingin a khut hong van a, a mawh lohna uh thu a gen dingin hong kipan hi.

³⁴ Ahi zongin Jew mi ahih lamtak a theih uh ciangin, “Efesa khuamite’ Artemis lianpen hi,” ci-in a kituakin nai nih sung a awng uh hi.

³⁵ A tawpna ciangin khuasung lai-at pa in mihonte a gamdaih nadingin khozo a, “Efesa khuapi mite aw, Efesa khuapi pen, a lian mahmah Artemis biakna innpi le van panin a hong kia biakna suang a kem khuapi ahihna thu mi khempeuh in a theihsa ahi hi.

³⁶ Hih thu pen kuamah in hong nial thei lo ding hi. Tua ahih manin gamdai takin om unla, a kilawm lo na khat peuhpeuh gamta kei un.

³⁷ Hih mite in i biakna inn lah bangmah cih lo, i nusian zong bangmah gensiatna nei lo napi-in hih lai-ah na hong paipih uh hi.

³⁸ Tua ahih ciangin Demetrias le a pawlte in mi khatpeuh tungah lungkim lohna nei uh ahihleh thu sit ni ding hun om a, thukhen uliante zong om uh ahih manin tuate mai-ah thu kineih ta uh hen.

³⁹ Ahi zongin hih thu-ah lungkimzo nai lo na hih uhleh zong a ngeina cingin a kikhop uh ciangin gen ding ahi hi.

⁴⁰ Tuni-a thupiang hangin eite buaina piangsak, ci-in hong kimawhsak khak ding lauhuai hi. Hih bangin buaina a om nading bangmah a thu om lopi hi a, i siksan ding bangmah thu om het lo hi,” a ci hi.

⁴¹ Hih thuteng a genkhit ciangin mihonte a ciahsak hi.