Sawltak 12 - Tedim Bible

James Kithat, Peter Thongkia

¹ Hih hun pawl laitakin Herod Kumpipa in pawlpi mite pawlkhat bawlsiat ding kipan hi.

² Johan’ u James pen namsau tawh thatsak hi.

³ Hih bangin thahna hangin Jew mite a lungdamna a theih ciangin Peter zong mansak leuleu hi. (Hih pen Silngo Sawh loh Anlum Pawi hunsung ahi hi.)

⁴ Peter a kimat khit ciangin thongah kikoih a, galkap li ciat a om galkap pawl lite in a cin dingin ki-ap hi. Herod in Paisan Pawi a ven’ ciangin mipi mai-ah Peter thu sit dingin a ngaihsut ahi hi.

⁵ Tua ahih manin thong sungah Peter kikhum a, ahi zongin pawlpi mite in lungsim takpi tawh ama a dingin Pasian kiangah thu a ngetsak uh hi.

Thong panin Peter Kisuaktasak

⁶ Herod in Peter thu sit dingin a lakkhiat ding ma a zan sungin, Peter a khut nih tuakin sikkhau kikhihin a langtuakah galkapte in lenin tua galkap nih kikalah kilumsak a, tua banah thongcingte in a kongah cing lai uh hi.

⁷ Thakhatthu-in Peter gei-ah Topa’ vantungmi khat hong omin thong sung khempeuh khua a vak hi. Vantung mi in Peter’ liangko lokin phong a, “Manlangin tho in,” a ci hi. Thakhatin Peter’ khut panin a sikkhaute kitolkhia hi.

⁸ Tua ciangin vantungmi in, “Na kawng hoihtakin gakin na khedap bulh in,” ci-in a gen bangin Peter zong a gamta hi. Tua ciangin vantungmi in, “Na puan silh inla hong zui in,” a cih mah bangin,

⁹ thong sung panin Peter in amah zui-in a paikhia hi. Ahi zongin tua vantungmi’ gamtatna pen ahi takpi mah ahi hiam cih thei lo ahih manin maang a mu-in kingaihsun hi.

¹⁰ Thongcingte’ vilna mun a khatna le a nihna a khenkhit uh ciangin khuapi sung lut nading sik kibawl thong kongpi a tung uh hi. Tua kongpi pen ama thu-in hong kihongtawm a, amaute a paikhia uh hi. Khuasung lampi-ah a pai laitakun thakhatin vantungmi in Peter guak a nusia hi.

¹¹ Tua ciangin Peter in khua phawk a, “Maang a mu ka kisak leh a takpi na hi mawk! Topa in a vantungmi kei kiangah hong sawl a, Herod in hong gimsak nading le Jew mite in gimna hong thuaksak nading panin kei hong honkhia hi,” a ci hi.

¹² Hih thu a phawk khit ciangin Johan Marka nu Mary’ inn-ah a pai hi. Tua lai-ah mi tampi kikhawmin thu a na ngen uh hi.

¹³ Peter in inntual kongpi hong kiu a, a en dingin nasem numei Roda va pai hi.

¹⁴ Peter hi, ci-in a aw-in a theih ciangin nuamlua ahih manin inntual kong nangawn hong loin inn sungah va tai a, inntual kongah Peter ding hi, ci-in a va gen hi.

¹⁵ Amaute in, “A hai hi teh!” na cihsan lel uh hi. Ahi zongin amah in, “Peter a om taktak mah hi,” a cih teitei ciangin amaute in, “Amah a cing vantungmi hi ding hi,” ci-in a dawng uh hi.

¹⁶ Tua sungtengin Peter in a kong mah hong kiukiu lai a, a tawpna-ah a hon uh ciangin Peter ahihlam thei uh ahih manin lamdang a sa mahmah uh hi.

¹⁷ Amaute a pau nawn loh nadingun Peter in a khut van a, thong sung panin Topa in amah a paikhiatpihna zia teng a gen hi. Tua ciangin, “James le pawlpi midangte kiangah hih thu na gen un,” ci-in a vaikhak khit ciangin mundangah a paikhia hi.

¹⁸ Zingsang khua a vak ciangin Peter bangci ahi hiam, ci-in thongcingte lakah buaina lianpi hong om hi.

¹⁹ Peter a zon nadingun Herod in thu pia a, ahi zongin mu zo lo uh hi. Tua ahih manin thongcingte thu kisit a, thah dingin thu a khen nadingun thu a pia hi. Tua ciangin Judea gam panin Sisaria khua-ah Herod paisuk a, tua lai-ah tawlkhat sung a om hi.

Herod’ Sihna

²⁰ Taia khuamite le Sidon khuamite tungah Herod heh mahmah ahih manin Herod tawh a kimu dingin hih khua nih mite hong paikhawm uh hi. A masa-in kumpi innsunga ulian nasem ahi Blastus a pawlmat phot uh hi. Hih khua nihte’ annek tuidawn pen hih kumpipa’ gam panin a ngah uh ahih manin Blastus makai sakin Herod kiangah va pai-in kilem nading thu a va gen uh hi.

²¹ Kumpipa in a thugen hun ding a ciamkholh ni a tun ciangin a kumpi puan silhin a kumpi tokhom tungah tu a, mite tungah thu a gen hi.

²² Mite in a thugen a zak uh ciangin, “Hih thugen pen mihing hi loin pasian ahi hi,” ci-in a awng uh hi.

²³ Herod in mite, Pasian phatsak loin amah phatsak ahih manin thakhatin Topa’ vantungmi in Herod cinasak a, a hut in amah netumin a si hi.

Barnabas le Saul

²⁴ Ahi zongin Pasian’ thu kizelin a khang semsem hi.

²⁵ Barnabas le Saul in a nasep a man khit uh ciangin Jerusalem khua panin ciahkik uh a, Johan Marka zong a ciahpih uh hi.