Sawltak 1 - Tedim Bible

Kha Siangtho Kikham

^1-2 Lawm Theofilas aw, Lai ka hong gelh masakna sungah Jesuh in nasep a kipat tung a kipanin vantungah amah a kilaktoh hun ciang dong, a thuhilhna le a septe khempeuh cingtakin ka gelh hi. Ama sawltak dingin a teelsa mite, Kha Siangtho tungtawnin thu a vaikhak khit ciangin vantungah amah kilato hi.

³ Ama sih khitzawh ni sawmli sung amaute tungah tam veipi kilang a, amah a nungta taktak ahihna teltakin a kithei ahi hi. Amaute in amah mu uh a, Pasian’ Ukna thu amaute tungah a gen hi.

⁴ Amaute tawh a omkhawm laitakin amah in amaute kiangah, “Jerusalem khua panin paikhia kei unla, note kiangah ka hong gensa ka Pa’ hong kamciam thu na ngak un.

⁵ Johan in tui sungah mite phum a, ahi zongin a sawt loin Pasian in Kha Siangtho tawh note hong kidimsak ding hi,” ci-in thu a pia hi.

Vankahna

⁶ Tua bangin Jesuh tawh a omkhawm laitakun sawltakte in Jesuh kiangah, “Topa aw, tutungin Israel minamte tungah ukna aana na piakik ding hiam?” ci-in a dot uh ciangin

⁷ Jesuh in, “Ka Pa in ama thu tawh a sehsa hun le nite, cik ciangin hong tung ding cih thu note’ theih ding thu hi lo hi.

⁸ Ahi zongin note tungah Kha Siangtho hong tun ciangin vangliatna tawh na kidim ding uh a, Jerusalem khuasung, Judea gam sung, Samaria gam sung, le leimong dongin note in keima thu na gen ding uh hi,” ci-in a dawng hi.

⁹ Hih thu a genkhit ciangin amaute’ muhtangpi mahin vanah Jesuh kilato a, meiipi in liah ahih manin amah mu thei nawn lo uh hi.

¹⁰ Tua bangin Jesuh a kilaktoh ciangin amaute in vantung lam enenin a om laitakun amaute kiangah puanpak a silh mi nih hong dingvat a,

¹¹ “Galilee mite aw, bang hangin vantung lam enin ding niloh na hi uh hiam? Note kiang panin vantungah a kilato hih Jesuh pen, vantungah a paitoh na muh uh bang teekteek mahin khatvei hong paisuk kik ding hi,” a ci uh hi.

Judas A Laih Ding pa Kiteel

¹² Tua ciangin Jerusalem pan tai lang bang a gamla tua Oliv Mual tung panin Jerusalem-ah sawltakte a ciahkik uh hi.

¹³ Jerusalem a tun uh ciangin amauteng, Peter, Johan, James le Andru, Filip le Thomas, Bartholomew le Matthai, Alfeas’ tapa James, Simon (gam khual pa), le James’ tapa Judas a tunna uh inn dei-ah a kahto uh hi.

¹⁴ Numeite, Jesuh’ nu Mary, le Jesuh’ naute tawh thungen khawm dingin a kikhawm zelzel uh hi.

¹⁵ Tua khit a sawt loin thu um mi zakhat le sawmnih bang a kikhop khawm laitakun Peter hong dingin thu hong gen a,

¹⁶ “Lawmte aw, Jesuh a mante lam a lak Judas thu, Kha Siangtho in David’ kam panin a genkholhna Lai Siangtho sung thu a tun ding kisam hi.

¹⁷ Judas pen eite tawh na a semkhawm dingin a kiteelkhia ahih manin eima pawl mi ahi hi.

¹⁸ (“Tu-in hih mipa in a gitloh gamtatna thamanin a ngah sum tawh amah in lo khat lei a, tua lo sungah kia-in a si hi. Amah kitamzan a, a sungkua khempeuh kithehkek hi.

¹⁹ Jerusalem khuasunga teng mi khempeuh in hih thu za uh a, amau’ pau-in tua lo pen ‘Akeldama,’ ci uh hi. Akeldama a khiatna in, ‘Mi Thahna Lo,’ a cihna ahi hi.)

²⁰ “Bang hang hiam cih leh Late Laibu sungah, ‘Ama tenna mun gamdai hen la, tua munah kuamah teng kei hen,’ kici a, tua banah, ‘Ama nasep midang khat in sem ta hen,’ ci-in kigelh hi.

^21-22 “Tua ahih ciangin Topa Jesuh’ thawhkikna thu teci pangin a hong genpih dingin Judas tangin mi khat i lak ding kisam hi. Tua mipa pen Johan’ tuiphum kipat hun a kipanin Jesuh vanah a kilaktoh hun ciang dong, Jesuh’ nasepna khempeuhah eite tawh a omkhawm mi khat ahih ding kisam hi,” a ci hi.

²³ Tua ciangin amaute in Josef (min dang nih a nei, Barsabbas le Justas zong a kici pa) le Matthias a pulak uh hi.

^24-25 Tua ciangin amaute in thu ngen uh a, “Mihing khempeuh’ lungsim sung thu a thei Topa aw, ama om nadingin a kilawm munah a om dingin sawltak nasep panin a hong paisan Judas tang dingin, hih mi nih sung panin na teel penpen hong hilh in,” a ci uh hi.

²⁶ Tua ciangin a teel nadingun lai ai san uh a, Matthias in ngah ahih manin sawltak sawm le khatte tawh a kisim khawm pah hi.