ROM (Romans) 11 - Tedim Bible

Israel Mi Tawmkhat Omlai Tei

¹ Tua ahihleh Pasian in ama mi Israel-te nialin nusia mangkhin ahi hiam? Tua bang hi dek lo hi. Kei mahmah zong Abraham’ suan Israel mite ka hi a, tua sung panin Benjamin’ suan ka hi hi.

² Pasian in tanglai panin a teelsa mite nusia lo hi. Elijah in Israel mite mawhsakin Pasian kiangah nakpitakin thu a genna Lai Siangtho sungah a kigelh thei lo na hi uh hiam?

³ Tua sungah, “Topa aw, Israel mite in na kamsangte thatin nangma biakna taute phelin susiagawp uh a, kei bekbek ka omlai hi. Kei nangawn thah hong sawm lai uh hi,” ci-in kigelh hi.

⁴ Ahi zongin Pasian in, “Baal milim a bia nai lo mihing tulsagih ka nei lai hi,” ci-in a dawng hi.

⁵ Tua mah bangin tuhunin zong Pasian in ama hehpihna tawh a teelsa mi tawmkhat omlai hi.

⁶ A teelna ah mite’ nasepna bulphuhin a teel hi loin ama dikna hangin a teel hizaw hi. Pasian in mihingte’ nasepna bulphuhin a teel hileh Pasian’ dikna pen dikna kici thei lo ding hi.

⁷ A thu omzia taktak hih bang ahi hi. Israel mi a tamzaw in a hanciamciam uh ngah lo uh hi. Pasian’ teel mi tawmkhat bek in ngah uh a, adangte in Pasian’ sapna thudon lo uh hi.

⁸ Tua ahih manin Lai Siangtho sungah, “Pasian in thu a ngaihsun thei lo, khua a phawk thei loin amaute bawl a, amaute in tuni dongin khua mu thei lo, khua za thei loin a om uh hi,” ci-in a kigelh hi.

⁹ Tua ciangin David in zong, “Amaute in a pawi bawlnate uh awklawh uh hen la, kiat lawhin gimna ngahlawh uh hen!

¹⁰ Khua a muh loh nadingun a mit uh taw hen la, lungkhamna vangik lelin awn tawntung ta uh hen!” ci-in a gen lai hi.

Pasian in Gentail mite Honkhia

¹¹ Jew mite a puk uh ciangin sia paisuak ahi uh hiam? Sia paisuak lo uh hi. Amau’ mawhna hangin Gentail mite in hotkhiatna ngah uh hi. Gentail mite in hotkhiatna a ngah pen Jew mite in enna lungsim a neihtheih nading uh deihna ahi hi.

¹² Jew mite’ mawhna pen leitung khempeuh thupha ngahna suak a, amau’ gitnat lohna pen Gentail mite’ hamphatna suak ahihleh Jew mi khempeuh in hotkhiatna a ngahkim uh ciangin bangzahin hoihkan ding ahi hiam?

¹³ Tu-in no Gentail mite tungah thu ka hong gennuam hi: No Gentail mite a dingin sawltak ka sep sungteng ka nasep a thupi mahmahin ka ngaihsun ding hi.

¹⁴ Bang hang hiam cih leh ka mipihte in note hong entheih nading uh piangsak thei-in, tua manin amaute pawlkhat in hotkhiatna a ngah nading uh piangsakzo kha dingin ka kilamen hi.

¹⁵ Amaute a kinialna hangin Pasian tawh leitung mi khempeuh kipawl theihna piang ahihleh amaute a kisan’ hun ciangin a sisate nangawn a hinkikna hong hita ding hi.

¹⁶ Anlum a ki-em masa sung panin a themkhat Pasian biakna-in a kipiak ciangin a anlum buppi zong Pasian-a’ mah hi pah a, singkung khat’ zung zong Pasian a kipiak ciangin a hiang khempeuh zong Pasian-a’ mah ahi hi.

¹⁷ A kiciing oliv kung a hiangte kisatkhia-in gamlak oliv hiangte tawh kipeh hi. No Gentail-te pen tua gamlak oliv hiangte tawh a kibang na hi uh a, Jew mite’ hamphatna teng a ngahkhawm na hi uh hi.

¹⁸ Tua ahih manin oliv hiang a kisatkhia tawh a kibang Jew mite simmawhbawl kha kei un. Note na kiphatsak theih nading uh a thu om lo hi. Note pen a hiang tawh a kibang lel na hi uh a, note in a zungpi a hingsak hi loin, a zungpi in note a hong hingsak ahi zaw hi.

¹⁹ Note in, “Eite tawh hong kipeh theih nadingin a hiangte a kisatkhia ahi hi,” na cinuam ding uh hi.

²⁰ Tua pen thuman ahi hi. Amaute in a up lohna hangun a kisatkhia hi a, note in na upna hangun amaute’ munah a om na hi uh hi. Tua ahih manin kiphatsakna lungsim nei kei unla, lamdangsakna tawh om khikhe zaw un.

²¹ Pasian in oliv hiang ngeite dawm lo ahihleh note hong dawm tuan lo ding hi.

²² Hih thu-ah Pasian a migit mahmahna le a khauh mahmahna i mu hi. A khial mite tungah khauh mahmah a, ama migitna a kizop paisuak theih nadingin na up paisuak nak-uhleh note tungah hong migi mahmah hi. Ahi zongin na zop paisuak kei uhleh note zong hong kisatkhia ding hi.

²³ Tua ciangin Jew mite in zong a lungsim uh kheelin Pasian a up uhleh Pasian in a pehkik theih nading vangliatna nei ahih manin amaute zong amau’ mun ngei mahah pehkik ding hi.

²⁴ Note pen na pianngei uh gamlak oliv kung panin hong kisatkhia-in note’ pianngei ahi lo a kiciing oliv kung tungah hong kipehthei ahihleh a kiciing oliv kung panin a kisatkhia tawh a kibang Jew mite pen Pasian in amau omna ngei-ah a pehkik ding olzaw mahmah lai ding hi.

Israel Mite A Ngei A Batkikna

²⁵ Sanggamte aw, note in na theih dingun ka deih thusim khat om hi. Thei le-uhcin, “A pil mahmah hi hang,” na kici nawn kei pah ding uh hi. Tua thu in: Israel mite in a up nop lohna pen a tawntung ding thu hi lo hi. Pasian kiangah Gentail mite a pai dingzah in Pasian a zuat hun ciang dong ding bek ahi hi.

²⁶ Tua hi a, Lai Siangtho sungah a kigelh mah bangin Israel mite khempeuh in hotkhiatna ngah ding uh hi. Lai Siangtho in, “Zion panin Honpa hong pai ding a, Jakob’ suanlekhakte sunga om gitlohna khempeuh maisak ding hi.

²⁷ Amaute’ mawhna ka maisak ciangin hih ka thuciamna ka pia ding hi,” ci-in gen hi.

²⁸ Jew mite in Lungdamna Thu um loin Pasian’ gal ahihna pen no Gentail mite’ hamphat nading hi a, ahi zongin Pasian’ teelna tawh kisai-in a pupite uh tungah a thuciamna huhau-in Pasian’ pawlte mah hi lai veve uh hi.

²⁹ Bang hang hiam cih leh Pasian in a teel mite le thupha a piak mite tawh kisai-in a thu dokkik lo hi.

³⁰ No Gentail mite in a beisa hunah Pasian’ thu na mang kei uh a, ahi zongin Jew mite’ thuman lohna hangin tu-in Pasian’ hehpihna na ngah uh hi.

³¹ Tua mah bangin amaute’ thuman lohna hangin note in Pasian’ hehpihna na ngahna uh pen Jew mite in zong Pasian’ hehpihna a ngahkik theih nading uh ahi hi.

³² Bang hang hiam cih leh Pasian in mi khempeuh tungah hehpihna a piaktheih nadingin a thuman lohna hangun mi khempeuh thongkia a bangsak hi.

³³ Tua ahih manin Pasian’ hong hehpihna nakliat mahmah a, a pilna le a thu theihnate nakthuk mahmah hi. Ama thukhennate kua’ gentheih ding hi lo a, a nasepna ziate kua’ telzawh ding hi lo hi.

³⁴ Tua ahih manin Lai Siangtho in, “Kua in Topa’ lungsim thei ding a, kua in ngaihsutna va pia thei ding ahi hiam?

³⁵ Amah in hong thukkik theih nadingin kuamah in ama tungah thupha va bawl ngei lo hi,” na ci hi.

³⁶ Bang hang hiam cih leh na khempeuh ama piansak hi a, na khempeuh ama hang le ama minthan nading bekin a om ahi hi. Mi khempeuh in Pasian phat tawntung ta hen! Amen.