Piancilna 8 - Tedim Bible

Tuiciin Beina

¹ Ahih hangin Pasian in Noah le amah tawh teembaw sungah a om gamsate le innsate khempeuh a phawk hi. Pasian in leitungah huih nungsak a, tui a kiam hi.

² Tui thukte le vantung tawlette kikhak a, vantung pana guahte kikhawlsak hi.

³ Leitung panin tuite kiamkiam hi. Ni za le ni sawmnga a phak ciangin tuite kiam khinta hi.

⁴ Kha sagihna, tua kha ni sawm le sagih ni-in Ararat mualtungah teembaw kinga hi.

⁵ A kha sawmna ciang dong tuite kiamkiam lai hi. Kha sawmna, tua kha ni khat ni-in mual dawnte kidawk hi.

⁶ Ni sawmli a cin ni ciangin Noah in ama bawlsa teembaw tawlet hong a,

⁷ va-ak khat khah hi. Leitung panin tuite a keu mateng leeng kawikawi hi.

⁸ Tua ciangin, leitungah tuite a kiam khin nai hiam cih a theihna dingin amah in vakhu khat khah hi.

⁹ Ahih hangin, leitung khempeuhah tuite omlai-in, a khawl nading mu lo ahih manin teembaw-ah hong ciahkik hi. Tua ahih ciangin amah in a khut zanin a vakhu man a, teembaw sungah paipih hi.

¹⁰ Amah in ni sagih sung ngakin, teembaw panin a vakhu khah leuleu hi.

¹¹ Nitak ciangin ama kiangah a vakhu hong ciahkik a, oliv teh a tukkhiat thak khat a mukah petin hong tunpih hi. Tua ahih ciangin leitung panin tuite kiam khinta hi, ci-in Noah in a thei hi.

¹² Tua ciangin ni sagih sung ngak leuleu-in a vakhu khah hi. Tua vakhu pen ama kiangah hong ciahkik nawn lo hi.

¹³ Noah a khan kum zaguk le a kum khatna, a kha masa, tua kha ni masa ni-in leitung panin tuite keu hi. Noah in teembaw khuhna lakhia a, khuadak hi. Lei maitang na keu ta hi.

¹⁴ A kha nihna, tua kha ni sawmnih le sagih ni-in leitung keu hi.

¹⁵ Tua ciangin Pasian in Noah kiangah,

¹⁶ “Nang le na zi, na tapate le na tapate’ zite, teembaw sung panin paikhia un.

¹⁷ Nang tawh a omkhawm nuntakna a nei khempeuh - vasate, ganhingte le leitung a a bokvak peuhmah - leitungah tampi suakin, pungin leitungah a tam theih nadingin paikhiatpih in,” a ci hi.

¹⁸ Tua ahih ciangin Noah paikhia a, a tapate le ama zi le a tapate’ zite mah tawh paikhia khawm hi.

¹⁹ Ganhing khempeuh, a bokvak khempeuh, vasa khempeuh, leitung a a gamtang khempeuh a innkuan kuanin teembaw panin a paikhia uh hi.

²⁰ Tua ciangin Noah in Topa a’ ding biakna tau khat lam a, a siangtho ganhing khempeuh le a siangtho vasa khempeuh lak pan khat ciat la-in, biakna tau tungah meihal biakna a pia hi.

²¹ Topa in a namtui gimnam a zak ciangin, a lungsim sungah, “Mihing’ gamtatna hangin leitang ka samsia kik ngei nawn kei ding hi. Bang hang hiam cih leh mihing’ lungsim ngaihsutna pen a tangval lai panin a gi lo hi mawk hi. Tu-a ka hih bangin nuntakna a nei khempeuh zong ka susia ngei nawn kei ding hi.

²² Leitung a omlai tengin, lo pawi hun le anlak hun, a vot le a sa, khuakhal le phalbi, sun le zan bei lo ding hi,” a ci hi.