Piancilna 7 - Tedim Bible

Tuiciin

¹ Tua ciangin Topa in Noah kiangah, “Nang le na innkuanpih mi khempeuh teembaw sungah pai un. Bang hang hiam cih leh hih khang mite sung panin nang bek a thuman na hihna ka hong thei hi.

² Ganhing siangtho nupa kop sagih, ganhing a siang lo nupa kop khat,

³ huih lak vasate zong nupa kop sagih, leitungah amau’ nam a manthan loh nadingin la in.

⁴ Bang hang hiam cih leh ni sagih sungin sun sawmli le zan sawmli sung leitungah guah ka zusak ding hi. Ka bawlsa nuntakna a nei peuhmah leitung panin ka phiatkhia ding hi,” a ci hi.

⁵ Noah in zong Topa’ thupiak khempeuh a hih hi.

⁶ Leitungah tuiciin a tun lai-in Noah kum zaguk pha hi.

⁷ Tuiciin a pelh dingin Noah, a tapate, a zi le a tapate’ zite teembaw sungah pai uh hi.

⁸ Ganhing siangthote, a siang lo ganhingte, vasate, leitung a a bokvak peuhmah,

⁹ a nupa kopin Pasian in Noah a thupiaksa bangin teembaw sungah Noah tawh pai uh hi.

¹⁰ A ni sagih ni-in leitungah tuiciin tung hi.

¹¹ Noah’ nuntak kum zaguk kum, a kha nihna, tua kha ni sawm le sagih ni-in vana om a thuk mahmah tuikhukte puakkhamin, vantung tawlette kihong hi.

¹² Sun sawmli le zan sawmli sung leitungah guah zu hi.

¹³ Tua ni teekteekin Noah le a tapate Shem, Ham, Jafeth, le Noah’ zi le a tapate’ zi thumte, amau tawh teembaw sungah a tum uh hi.

¹⁴ Amaute le gamsa peuhmah amau’ nam ciat, innsa khempeuh amau’ nam ciat, leitungah a bokvak peuhmah amau’ nam ciat, le vasa peuhmah amau’ nam ciat, vasa namkim amau’ nam ciatin a tum uh hi.

¹⁵ Nuntak husanna a nei khempeuh a nupa kop ciatin Noah tawh teembaw sungah a pai uh hi.

¹⁶ Pasian in Noah tungah a thupiakna bangin nuntakna a nei khempeuh teembaw sungah a lut khit ciangin Topa in Noah kong a khaknelh hi.

¹⁷ Leitungah tuiciin ni sawmli sung omden hi. Tui tam semsem a, teembaw laamto-in, leitung’ tungah khangin sangto lai hi.

¹⁸ Tui khangto-in leitungah tam mahmah hi. Tui tungah teembaw laam hi.

¹⁹ Leitungah tui khangkhang ahih manin mual lian a sangte khempeuh tuumcip hi.

²⁰ Mual liante tungah tui omto lai a, tuate tungah pi sawmnih le nih thuk-in tuumcip hi.

²¹ Leitungah a nungta khempeuh, vasate, innsate, gamsate, a hon honin leitungah a hon om ganhingte khempeuh le mi khempeuh a si uh hi.

²² Leitungah a om, nuntakna hu a nei peuhmah a si uh hi.

²³ Mihing, ganhing, a bokvakte le huih lak vasate, leitung a om nuntakna a nei peuhmah amah in phiatkhia hi. Leitung panin amaute kiphiatkhia hi. Noah le amah tawh teembaw sunga a omteng bek a suakta uh hi.

²⁴ Ni za le ni sawmnga sung leitungah tui om hi.