Piancilna 6 - Tedim Bible

Mihing A Gitlohna

¹ Leitungah mite tam dingin hong kipanin, amau’ sung panin tanute hong suah ciangin,

² vana om mite in leitung mite’ tanute hoihsa uh ahih manin a deih bangun amaute zi-in a la uh hi.

³ Tua ciangin Topa in, “Mihingte sungah ka Kha om paisuak nawn lo ding hi. Bang hang hiam cih leh mihingte a mawh hi khinta a, kum za le kum sawmnih sung kisik nading hun kipia lai bek ding hi,” a ci hi.

⁴ Vana om mite in leitung mihing tanute luppihin, amaute in ta a neih hun laitak hitaleh tua khit hitaleh, amau’ suanlekhak Nefilim a kici mite leitungah om hi. Hih mite pen tang lai-a mi thahat, mi minthangte ahi uh hi.

⁵ Leitungah mihing a gitlohna a liatna le mihing lungsim ngaihsutna peuhmah a sia ahih ngitngetna thu Topa in mu hi.

⁶ Leitungah mihing a bawl pen Topa khial kisa a, tua thu in ama lungsim dahsak hi.

⁷ Tua ahih ciangin Topa in, “Ka piansaksa mihing, ganhing, a bokvak ganhingte le huih lak vasate, leitung panin ka phiatkhia ding hi. Bang hang hiam cih le amaute ka bawl ka khial hi,” a ci hi.

⁸ Ahih hangin Noah in Topa’ maipha mu hi.

Noah in Teembaw Bawl

⁹ Noah’ tangthu hih bang ahi hi. Noah a thuman mi khat hi a, ama khangah paubaang lo hi. Noah pen Pasian tawh kikhawl hi.

¹⁰ Noah in tapa thum, Shem, Ham, le Jafeth a nei hi.

¹¹ Tu-in Pasian’ muhna-ah leitung sia a, leitungah ngongtatna kidim hi.

¹² Pasian in leitung en a, a kisiagawp mu hi. Bang hang hiam cih leh leitungah mi khempeuh a sia-in a gamta lo kuamah om lo hi.

¹³ Pasian in Noah’ kiangah, “Mi khempeuh beisak ding ka khentat zo hi; bang hang hiam cih leh amau’ hangin leitungah ngongtatna kidim hi. En in, leitung tawh amaute ka susia khawm ding hi.

¹⁴ Nang a dingin noah-taak sing tawh teembaw khat bawl in. Teembaw sungah a deite bawl inla, a sung le a pua kultal tui tawh zut in.

¹⁵ Na bawl nading dan hih bang ahi hi: Teembaw a sauna pi zali sawmnga, a zaina pi sawmsagih le nga, a sanna pi sawmli le nga hi ding hi.

¹⁶ Teembaw a dingin kongkhak khat bawl inla, tua tung pi khat le alang ciangah zawh bawl in. A pangah teembaw kongkhak bulh in. A dawl nuainung, a dawl nihna le a dawl thumnate bawl in.

¹⁷ Bang hang hiam cih leh, en in, leitungah a om nuntak husanna a nei khempeuh a susia dingin leitungah tuiciin ka tungsak ding hi. Leitung a om khempeuh si ding hi.

¹⁸ Ahih hangin nang tawh ka thuciamna ka kipsak ding hi. Teembaw sungah nang na hong pai ding hi. Nang, na tapate, na zi le na tapate’ zite tawh na paikhawm ding uh hi.

¹⁹ Nuntakna a nei khempeuh nang tawh a nungta dingin nam khatah nih ciat teembaw sungah na paipih ding hi. Tuate pen a nu le a pa hi ding hi.

²⁰ Vasate amau’ nam ciatin, ganhingte amau’ nam ciatin, leilakah a bokvak ganhingte peuhmah amau’ nam ciatin, a suakta dingin nam khatah nih ciat nang kiangah hong pai ding uh hi.

²¹ A kine an nam khempeuh zong la inla khol in. Tuate pen nang le amaute a dingin an ding ahi hi,” a ci hi.

²² Noah zong tua bangmahin gamta a, Pasian’ thupiak khempeuh a hih hi.