Piancilna 44 - Tedim Bible

Hai Mang

¹ Tua ciangin amah in a innsung nasempa thu pia a, “Hih mite’ van sungah amau’ puakzawh zahzah an guang inla, amau’ sum ciat a van gong ciat uhah koih in.

² Ka ngun hai pen an lei nadinga a sum tawh a moipen’ van gongah koihsak in,” a ci hi. Amah in Josef’ gen bangin a hih hi.

³ Zingsang khuavak phetin a late uh tawh mite kisawlkhia hi.

⁴ Amaute a pai khit, ahih hangin khuapi panin a nai lai-in, Josef in ama innsung nasempa kiangah, “Kithawi inla, mite va delh in. Amaute na phak ciangin amaute kiangah, ‘Bang hangin a hoih pen a sia tawh hong thuk na hi uh hiam? Bang hangin ka topa’ ngun hai gu na hi uh hiam?

⁵ Ka topa in hih hai sung panin dawnin, hih tawh amah in thu thei hi lo ahi hiam? Hih bangin na gamtat manun na khial uh hi,’ va ci in,” a ci hi.

⁶ Amah in amaute a phak ciangin amaute kiangah hih thute a gen hi.

⁷ Amaute in ama kiangah, “Bang hangin ka topa in thu hih bang hong gen na hi hiam? Na nasemte, tua banga gamta ding hi dek peuhmah lo hi.

⁸ En in, ka van gong uha ka muh uh sumte, Kanaan gam panin nang kiangah kong puak kik uh hi. Tua ahih teh na topa’ inn panin ngun hitaleh kham hitaleh bangci guk ding ka hi uh hiam?

⁹ Na nasemte’ sung pan tua hai a kimuhna penpen kithat hen; kote zong ka topa’ sila ka hi ding uh hi,” a ci uh hi.

¹⁰ Amah in, “Na cih bang uh hi ta hen: A kimuhna penpen pa ka sila hi ding a, no a dangteng mawh na baang kei ding uh hi,” a ci hi.

¹¹ Tua ciangin a milipin a van uh leilakah ngasuk uh a, a milipin a van uh suah hi.

¹² Amah in zong a, a hampen panin kipanin a moipen tawh tawp a, Benjamin’ van sungah a hai kimu hi.

¹³ Tua ciangin amaute in a puan uh balkekin, a late uh a van suan ciatin, khuapi-ah hong kileh kik uh hi.

¹⁴ Judah le a sanggamte, Josef’ inn-ah a tun ciangin, amah tua lai mahah na omlai hi. Ama mai leilakah amaute kun uh hi.

¹⁵ Josef in amaute kiangah, “Note’ gamtatna a bangci gamtat ahi hiam? Kei bang ahi mi in thu ka theihna thei lo na hi uh hiam?” a ci hi.

¹⁶ Judah in, “Ka topa tungah hong bangci gen ding ka hi uh hiam? Bang thu gen ding ka hi uh hiam? Tua ahih kei leh ko bangci kiphel theih ding ka hi uh hiam? Pasian in na nasemte’ mawhna mukhia hi. En in, kote le hai a kimuhna pa zong, ka topa’ sila ka hi uh hi,” a ci hi.

¹⁷ Ahih hangin amah in, “Tua bangin hi dek lo ding hi. Hai a kimuhna mipa bek ka sila hi ding hi. No a dangte ahihleh, na pa’ kiang uhah nuamtakin ciah un,” a ci hi.

Judah in Benjamin Ngen

¹⁸ Tua ciangin ama kiangah Judah hong paito-in, “Ka topa aw, hong thum ing. Na nasempa, nang tungah kam khat thu hong gensak inla, na nasempa tungah na hehna hong sosak kei in. Bang hang hiam cih leh nang pen Faro mahmah tawh a kibang na hi hi.

¹⁹ Ka topa in a nasemte nong dong a, ‘Pa hitaleh sanggam pasal dang hitaleh na nei uh hiam?’ nong ci hi.

²⁰ Kote in ka topa uh kiangah, ‘Kote in a teek pa khat le a teek zawhin a neih sanggam pasal moilai khat ka nei uh hi. Ama sanggampa si a, a nu’ tate sung pan amah bek omlai hi. A pa in amah it mahmah hi,’ kong ci uh hi.

²¹ Tua ciangin nangmah in na nasemte kiangah, ‘Ka mit tawh amah ka muh theih nadingin kei kiangah amah hong tonpih suk un,’ nong ci hi.

²² Kote in ka topa uh kiangah, ‘Tangvalpa in a pa nusia thei lo ding hi. Bang hang hiam cih leh a pa nusia leh a pa si ding hi,’ kong ci uh hi.

²³ Tua ciangin nangmah in na nasemte kiangah, ‘Note tawh na sanggam uh a moipen hong paisuk khop kei leh ka mai nong mu nawn kei ding uh hi,’ nong ci hi.

²⁴ “Tua ahih ciangin na nasem ka pa uh kiangah ka ciahkik uh ciangin ka topa’ thugente ama kiangah ka gen uh hi.

²⁵ Ka pa un, ‘Paikikin eite a’ ding an tawm va lei un,’ hong cih ciangin

²⁶ kote in, ‘Ka paisuk kei ding uh hi. Ka sanggam moipen uh ko tawh hong paikhawm leh ka paisuk bek ding uh hi. Bang hang hiam cih leh ka sanggam moipen uh ko tawh hong pai kei leh mipa’ mai ka mu kei ding uh hi,’ ka ci uh hi.

²⁷ Tua ciangin na nasem ka pa un kote kiangah, ‘Ka zi in kei tawh tapa nih a neih na thei uh hi.

²⁸ Khat in kei hong nusia khin a, amah kibalzan khin taktak hi, ka ci hi. Tua hun a kipan amah ka mu nawn kei hi.

²⁹ Hih a khat zong kei kiang panin na lak uh a, ama tungah siatna a tun leh, dahna tawh ka sam kangte Leinuai-ah na paipih suk ding uh hi,’ hong ci hi.

³⁰ “Tua ahih ciangin tu-in, na nasem ka pa uh kiangah ka ciah uh ciangin, tangvalpa kote tawh hong ciah kei leh, ama lungsim khempeuh tangvalpa’ tungah om ahih manin,

³¹ kote tawh tangvalpa a ciah lohna a muh ciangin amah si ding hi. Na nasemte in na nasem ka pa uh’ sam kangte dahna tawh Leinuai-ah ka paipih ding uh hi.

³² Bang hang hiam cih leh na nasem keimah pen tangvalpa a dingin ka pa’ tungah a kikham ka hi a, ‘Nang kiangah amah kong ciahpih kik kei leh tua mawhsakna nangma muhna-ah ka nuntak tawntungin ka thuak ding hi,’ ka ci hi.

³³ Tua ahih ciangin tu-in kong thum hi. Ka topa’ sila dingin tangvalpa’ tangin na nasempa hong omsak inla, a sanggamte tawh tangvalpa ciahkiksak in.

³⁴ Bang hang hiam cih leh tangvalpa kei tawh hong ton kei leh ka pa kiangah bangci ciahkik thei ding ka hi hiam? Ka pa’ tungah a tung ding siatna ka thuakzo kei ding hi,” a ci hi.