Piancilna 4 - Tedim Bible

Kain le Abel

¹ Tu-in mipa in ama zi Eve luppih a, amah gai-in Kain nei a, “Topa’ huhna tawh mi khat ka ngah khin hi,” ci hi.

² Tua ciangin a sanggampa Abel nei leuleu hi. Tu-in Abel, tuu kem pa hi a, Kain, lo khopa ahi hi.

³ Tua hun sungin Kain in lei pana piang gah piakna Topa’ tungah paipih a,

⁴ Abel in a tuuhon tacilte le a sa limcite paipih hi. Topa in Abel le ama piakna thusim a,

⁵ ahih hangin Kain le ama piakna thusim lo hi. Tua ahih ciangin Kain heh mahmah a, a mai sia hi.

⁶ Topa in Kain tungah, “Bang hangin nang heh a, bang hangin na mai sia ahi hiam?

⁷ Limtakin hih lecin, nang hong kisang lo ding ahi hiam? Limtakin na hih kei le nang hong hih nuamin mawhna in hong buk a, nang hong uk nuam hi. Ahih hangin nang in tua mawhna na zawh ding ahi hi,” a ci hi.

⁸ Kain in a sanggampa Abel kiangah, “Gamlakah vak ni,” ci hi. Amaute gamlakah a om ciangin Kain in a sanggampa Abel a that hi.

⁹ Tua ciangin Topa in Kain tungah, “Na sanggampa Abel koi-ah om ahi hiam?” a ci hi. Amah in, “Ka thei kei hi. Kei, ka sanggam a kem pa ka hi hiam?” ci hi.

¹⁰ Topa in, “Bang hangin hici gamtat na hi hiam? Na sanggampa’ sisan, leilak panin kei tungah hong kiko hi.

¹¹ Na sanggampa’ sisan a hup dingin a kam a ka leitang tungah tu-in nang hong kisamsiat hi.

¹² Lo na khawh ciangin nang a dingin an hong piangsak nawn lo ding hi. Nang pen a galtai, leitung a a vakvai na hi ding hi,” a ci hi.

¹³ Kain in Topa’ tungah, “Keimah gim hong kipiakna, ka thuak zawh ding hi lo hi.

¹⁴ En in, tuni-in nangmah in leitung panin kei nong hawlkhia a, nang kiang panin kei nong notkhia hi. Kei pen a galtai, leitungah a vakvai ka hi ding a, kei hong mu peuhmah in hong that ding hi,” a ci hi.

¹⁵ Tua ciangin Topa in ama kiangah, “Tua bang hi lo ding hi. Khatpeuh in Kain a thah le tua pa tungah a zah sagihin kithuk ding hi,” a ci hi. Amah a tuakpeuh in a thahkhak loh nadingin Topa in Kain’ tungah ciaptehna khat a koih hi.

¹⁶ Tua ciangin Topa’ omna panin Kain paikhia-in Eden nisuahna lam Nod gam sungah a teng hi.

Kain’ Suanlekhakte

¹⁷ Kain in a zi luppih a, amah gai-in Enok a nei hi. Kain in khuapi khat sat a, tua khuapi min dingin ama tapa’ min tamin Enok a phuak hi.

¹⁸ Enok sung panin Irad suak a, Irad pen Mehujael’ pa ahi hi. Mehujael pen Methushael’ pa hi a, Methushael pen Lamek’ pa ahi hi.

¹⁹ Lamek in zi nih nei hi. A khat’ min Adah hi a, adang khat’ min Zillah ahi hi.

²⁰ Adah in tapa Jabal nei hi. Amah pen puanbukte sungah tengin ganhing a neite’ pianna pupi ahi hi.

²¹ A sanggampa’ min Jubal hi a, laiza lasakna le tamngai tumte khempeuh’ pianna pupi ahi hi.

²² Zillah in Tubalkain nei a, sumngo le sik nazat khempeuh a bawlte’ pianna pupi ahi hi. Tubalkain’ sanggamnu pen Naamah ahi hi.

²³ Lamek in a zite kiangah, “Adah le Zillah aw, ka aw ngai un. Lamek’ zite aw, ka thugen ngai un. Kei hong liamsak manin mi khat, kei hong sat manin khanglai mi khat ka that khin hi.

²⁴ Kain a kithah manin a zah sagihin kithukkik ahihleh, Lamek a kithah manin a zah sawmsagihin kithukkik taktak ding hi,” a ci hi.

Seth’ Suanlekhakte

²⁵ Adam in a zi luppih leuleu hi. Amah in tapa khat nei a, a min Seth ci hi. Bang hang hiam cih leh, “Kain in Abel that ahih manin Abel’ tangin Pasian in kei a dingin naupang khat hong sehsak hi,” amah in ci hi.

²⁶ Seth in zong tapa khat nei a, ama min Enosh ci hi. Tua hun a kipanin mite in Topa bia-in a min lawh ding kipan ta uh hi.