Piancilna 2 - Tedim Bible

¹ Tua ahih ciangin vantung, leitung, le a sunga omte khempeuh kiman khin hi.

² Ni sagih ma-in Pasian in a nasepte zo khinta a, ama hihsa nasep khempeuh panin ni sagih ni-in a tawlnga hi.

³ Tua ahih ciangin Pasian in ni sagih ni thupha pia-in siangthosak hi. Bang hang hiam cih leh piansak nasepna ama nasep khempeuh panin tua ni-in Pasian a tawlnga hi.

Eden Huanah Mi

⁴ Hihte pen, a kipiansak lai-a vantung le leitung tangthu ahi hi. Topa Pasian in leitung le vantungte a bawl hi.

⁵ Topa Pasian in leitungah guah zusak nai lo a, leitang a kho ding mi om lo ahih manin gam sung kungnote lei sungah om nai lo a, lo sung ankungte pokhia lo hi.

⁶ Tua ciangin leitung panin meiilum kaaito-in, lei maitang khempeuh a buah hunin

⁷ Topa Pasian in leilak pana leivui tawh mihing bawl a, a nak sungah nuntakna hu sang suk hi. Tua mi pen leitung nuntakna a nei mihing hong suak pah hi.

Eden Huan

⁸ Topa Pasian in nisuahna lamah Eden huan khat bawl hi. Tua lai munah ama bawlsa mipa koih hi.

⁹ A deihhuai, nek dinga a hoih singkung nam khempeuh, huan laizangah nuntakna singkung, le a pha le a sia theihna singkung, lei sung panin Topa Pasian in posak hi.

¹⁰ Huan sung a kawtsak dingin Eden nawkin gun khat hong luang a, tua mun panin gun hong kikhenin li hong pha hi.

¹¹ A masa pen gun a min Pishon hi a, kham a omna, Havilah gambup kimkotah a luang pen ahi hi.

¹² Tua gam a khamte hoih hi. Tua munah bedolak singnai le onik suang om hi.

¹³ A nihna gun min Gihon hi a, Kush gam kimkotah a luang pen ahi hi.

¹⁴ Assiria gam nisuahna lamah a luang a thumna gun min Hiddekel ahi hi. A lina gun pen Eufratis gun ahi hi.

¹⁵ Topa Pasian in mipa la-in, Eden huan kho-in a kem dingin a koih hi.

¹⁶ Topa Pasian in mipa thu pia a, “Na ut utin huan sung singkung gah khempeuh na ne thei ding hi.

¹⁷ Ahih hangin a pha le a sia theihna singkung gah pen na ne kei ding hi. Bang hang hiam cih leh tua na nek ni-in na si ding hi,” a ci hi.

¹⁸ Tua ciangin Topa Pasian in, “Mipa amah guak a om ding hoih lo hi. Ama a’ ding a kituak a huh ding ka bawlsak ding hi,” ci hi.

¹⁹ Tua ahih ciangin Topa Pasian in gam sung ganhing khempeuh le huih lak vasa khempeuh lei tawh bawl a, mipa in tuate bang a ci hiam ci-in a theihna dingin mipa kiangah tuate a paipih hi. Nuntakna a nei khempeuhte pen mipa’ cih bangbang a min hi pahpah hi.

²⁰ Mipa in ganhing namte khempeuh, huihlak vasate khempeuh le gam sung ganhing khempeuh min a vawh hi. Ahih hangin mipa a’ dinga a kilawm, amah a huh ding khat zong om lo hi.

²¹ Tua ahih ciangin Topa Pasian in mipa ihmut suak mahmah sak a, ama ihmut kalin a nakguhte khat la-in tua mun pen satak tawh a dimsak hi.

²² Topa Pasian in mipa’ tung panin a lakkhiat nakguh pen numei khatin bawl a, mipa kiangah tua nu a paipih hi.

²³ Tua ciangin mipa in, “Tu petpetin hih pen keima guhte le keima sate ahi hi. Amah pen mipa sung panin a kilakhia ahih manin ‘Numei’ kici ding hi,” a ci hi.

²⁴ Tua thu hangin pasal in a nu le a pa nusia-in a zi tawh kigawm a, amau tegel pum khat a bang uh hi.

²⁵ Mipa le a zi a guaktangin om uh a, maizum lo uh hi.