Paunak 8 - Tedim Bible

Pilna A Hoihna le Sauvei A Kimanna

¹ Ngai un! Pilna in hong sam a, thungaihsut theihna hong kiko hi lo ahi hiam?

² Lamdung mualtung tengah, lamka citeng mun khempeuhah ding a,

³ khuapi lutna lampi gei-ah, mi omna kongpi tualah hong kiko a,

⁴ “Mi khempeuh tungah ka hong thum a, leitung a om mi khempeuh ka hong sam hi.

⁵ Ngaihsut kicing nai lote aw, na lungsim uh khanghamsak un. Mihaite aw, thu ngaihsun un.

⁶ Ngai un, thu manpha kong gen ding hi; ka gen khempeuh thuman vive ahi hi.

⁷ Ka thugente a man bekbek hi a, zuauthu ka deih kei hi.

⁸ Ka gen khempeuh ahi vive hi a, zuauthu, thukawi om het lo hi.

⁹ Thungaihsun theite a dingin telnop mahmah a, thu mutheite a dingin siang mahmah hi.

¹⁰ Ngun sangin kong thuhilhnate deihzaw unla, kham hoihpen sangin thutheihna deihzaw un.

¹¹ “Suangmanpha sangin pilna ahi keimah ka hoihzaw a, kei tawh na hong tehpih theih ding uh a manpha dang om lo hi.

¹² Pilna ahi keimah in thuthuk muhtheihna ka nei a, thu a telin theihna le a kilawm ngaihsut theihna ka nei hi.

¹³ Topa zahtakna pen thusia muhdahna hi a, kiphatsakna le kihihsakna, gamtatsia le thuzuau ka mudah hi.

¹⁴ Thu geelin ka semkhia a, thu theihtelna nei-in, kei ka thahat hi.

¹⁵ Kumpite in a gammite a ukna ding, mi ukte in ngeina man a zat theih nadingin keimah in ka huh hi.

¹⁶ Leitung a om mi ukte khempeuh in keima huhna bek tawh ukzo uh a, milian mi thupite in keima huhna bek tawh vaihawmzo uh hi.

¹⁷ Kei hong itte ka it a, kei hong zong peuhmahte in hong mu uh hi.

¹⁸ Piakkhiat theih ding hauhna le minphatna, daupaina le ma tutsak zawhna a kicingin ka nei hi.

¹⁹ Keima kiang panin na ngahte uh ngun hoihpen sangin hoihzaw a, kham hoihpen sangin zong hoihzaw lai hi.

²⁰ Thuman lampi ka zui a, thutang lampi ka tawn hi.

²¹ Kei hong itte ka hausak a, a inn dimin neihlelam ka pia hi.

²² “Topa in kei hong piangsak masa pen a, tangtawnga ama sep lak pan a masa pen ka hi hi.

²³ Tangtawng pek lai-in kei hong bawl a, leitung a om ma-in hong bawl masak pen ka hi hi.

²⁴ Tuipite a om ma-in kei ka suakkhin a, kei’ suah hunin lui tuite om nai lo hi.

²⁵ Mual liante a kibawl ma-in kei ka suakkhin a, mual neute a kibawl mapekin kei ka om khinta hi.

²⁶ Leitung khempeuh a bawl ma, lei themkhat bek nangawn a bawl mapekin kei ka om khinta hi.

²⁷ Amah in vantung bawlin tuipi kimkotah vanpi mong ding a bawl laitak,

²⁸ amah in vantungah meiite kipsakin tuipi tuinakte a bawl laitak,

²⁹ tuipi tuite in ama cihna ban a khengin a luan loh nading thu a piak laitak ka om a, leitung bulpi a phuh laitak kei ka om hi.

³⁰ Na geel siampa bangin amah tawh kikhawlin keimah pen nisimin ama lungdamna ka hi a, ama kianga om nuamsa-in,

³¹ leitungah ka lungdam a, mihingte lakah nuam ka sa hi.

³² “Tate aw, tu-in ka thugen hong ngai unla, kong gente zui le-uhcin lungdamna na ngah ding uh hi.

³³ Hong kihilhnate zui-in pilna ngah unla, thudon loin ommawk kei un.

³⁴ Ka thugenna a ngai, nisimin ka kong gei-ah omin, ka inn-ah a ngak mipa in lungdamna ngah ding hi.

³⁵ Kei hong mu mi in nuntakna a mu hi a, Topa’ mai-ah maipha ngah ahi hi.

³⁶ Ahi zongin kei hong mu lo mi, amahmah a kisusia hi a, kei hong mudah peuhmah, a si nuam ahi hi,” hong ci hi.