Paunak 4 - Tedim Bible

Pilna A Phattuamna

¹ Tate aw, na pa uh’ hong hilhnate ngai unla, thu na teltheih nadingun limtakin ngaihsun un.

² Bang hang hiam cih leh kong hilh thute thuhoih ahi hi. Kong hilhte khempeuh limtakin ciamteh un.

³ Kei zong tapa khat neihsun ka hi a, naupangno khat ka hih lai-in

⁴ ka pa in thu hong hilh a, “Ka thugente ciamteh inla, mangngilh kei in. Kong gen bangin gamta in; tua hileh na nungta ding hi.

⁵ Pilna le thu ngaihsut theihna na neihna ding hahkat in. Kong gen thute mangngilh kei inla, hoihtakin ngaihsun in.

⁶ Pilna nusia kei in; tua hileh siatna panin nang hong hu ding hi. Pilna deih in; tua hileh lungmuang takin na om nadingin hong kem ding hi.

⁷ Pilna na ngahna ding a thupi masa pen hi a, na neih khempeuh na beilawh zongin na zon ding ahi hi.

⁸ Pilna deih in; mi lianin hong bawl ding hi. Limtakin pom in; pahtawina hong ngahsak ding hi.

⁹ Pilna in pahtawina le minthanna nangma tungah hong tungsak ding hi,” hong ci hi.

¹⁰ Ka ta aw, ka thugente limtakin zui in. Tua hileh na khansau ding hi.

¹¹ Na pilna ding lampi kong hilhzo a, na gamtatna ding zia kong genzo hi.

¹² Hoihtakin gamta lecin nang hong nawngkaisakzo ding bangmah om lo ding a, na tai hangin zong na pukkha kei ding hi.

¹³ Hong kihilhnate lencip inla, khahsuah kei in. Na nuntakna ding ahih manin limtakin zui in.

¹⁴ Migilote tawh kikhawl kei inla, amau’ gamtatnate zui kei in.

¹⁵ Amau’ gamtat bangin gamta peuhmah ke’n! Gitlohna peel in! Paisan inla, na maban sem in.

¹⁶ Migilote in a sia khatpeuh a sep mateng uh lum thei lo uh a, mi khatpeuh a sukzawh mateng uh ihmu thei lo uh hi.

¹⁷ Gitloh gamtatna, annek bangin nuamsa uh a, ngongtatna, tui dawn bangin a ngaihsun uh hi.

¹⁸ Ahi zongin thuman mite’ zuih lampi ahihleh sun dong a taang pha semsem zingsang khuavak tung tawh kibang hi.

¹⁹ Migilote’ lampi ahihleh zan khuamial bangin mial a, amaute a tuksak, a suihkhakte nangawn mu thei lo uh hi.

²⁰ Ka ta aw, ka thugente don inla, ka kammalte ngai in.

²¹ Na kiang panin paikhiasak kei inla, na lungsimah ciamteh in.

²² Bang hang hiam cih leh tua thu a zuite in nuntakna le cidamna-in a nei uh hi.

²³ Na lungsim ngaihsutnate nuntakna nak hi a, na neihsa a manpha pen bangin na kep ding ahi hi.

²⁴ A man lo thu gen ngei kei inla, zuauthu le a kiza khial thei ding kammalte zang het kei in.

²⁵ Kisuanna nei hetloin om liuliau inla, maizumin kuncip kei in.

²⁶ Na khatpeuh na sepna thu theitel in. Tua hileh na nasep peuhpeuh maavang ding hi.

²⁷ Siatna peelin a manin gamta inla, thuman lampi panin themcik zong pialkha kei in.