Paunak 29 - Tedim Bible

¹ Kihilh napi-in a mang nuam lote bawlphat zawh nawn loh dongin kisia ding uh hi.

² Midikte in gam a uk ciangin gammite lungdam uh a, migilote in a uk ciangin a gammite thum uh hi.

³ Pilna a deih mi in a pa lungdamsak a, numei paktat tawh a kikhawl mi in a neihsa teng lawnmang hi.

⁴ Thumanin a gamta kumpi in a gam kipsak a, sum bek a ngaihsun kumpi in a gam siasak hi.

⁵ A man lopi-in mi khat mawkphatna pen a awk nadingin thangsiahna ahi hi.

⁶ Migilote amau mawhna sungah awkcip a, midikte ahihleh suakta-in lungdam uh hi.

⁷ Midikte in mi cimawhte a’ ding thu khual uh a, migilote in tua bang thukhualna thei lo uh hi.

⁸ Thu a khual lote in khua sungah buaina lianpi piangsak a, mipilte in tua buaina daisak thei hi.

⁹ Mipil khat in mihai khat tawh zumah thu nei leh mipil pa tungah hehin zahko a, phattuamna piang tuan lo hi.

¹⁰ Mi a that nuamte in a thuman mi mudah a, midikte in a thuman mi hu uh hi.

¹¹ Mihai pa a hehna bangin kam pau-in gamta gawp a, mipil pa ahihleh ki-ipin a hehna damsak hi.

¹² Kumpipa in zuauthu saangin na sem leh a nuai-a ulian khempeuh zong zuaugenin nitum ding uh hi.

¹³ Mizawng pa le mi bawlsia pa a kibatna uh khat om hi. Topa in a nih tuakun mittang guan hi.

¹⁴ Kumpipa in mizawngte’ thu a manin khensak leh a ukna kip tawntung ding hi.

¹⁵ Ciangduai le tai-na in pilna guan a, a kikhahkhong ta in a nu maizumsak hi.

¹⁶ Migilote ulian suak leh siatna khang semsem a, ahi zongin midikte in amau’ mit mahmah tawh a gilo uliante’ zakiatna mu ding uh hi.

¹⁷ Na ta thuhilhin tai lecin ama hangin na kipak ding a, na lung hong kimsak ding hi.

¹⁸ Pasian’ lamlahna a kizuih lohna gamah gam sung mite phengtat gawp uh hi. Pasian’ thukham a zui mite ahihleh a lungdam uh hi.

¹⁹ Kama hilh lel tawh silate pil zo lo a, a theih hangun hong mang tuan lo hi.

²⁰ Thu ngaihsun loin a pheng paupau mipa sangin mihai pa a dingin lametna omzaw lai hi.

²¹ Sila khat a neu tung a kipan limtakin na khoi hangin a tawpna-ah nang hong hehsak veve ding hi.

²² A heh pahpahte in kitotna piangsak a, a heh baihte khial thei tawntung hi.

²³ A kiphasakte in niamkhiatna thuak ding a, a kiniamkhiatte in pahtawina ngah ding hi.

²⁴ Guktakna sungah a kipawl mipa ama a dingin thusia zongpa ahi hi. A guktakna pulak leh amah gim kipia ding a, genkhia kei leh lah Pasian in samsia veve ding hi.

²⁵ Midangte kihtakna in hong lunghimawhsak a, Topa muanna in hong lungmuangsak hi.

²⁶ Mi khempeuh in gam ukte’ maipha ngah ding hanciam ciat uh a, ahi zongin Topa’ kiang pan bekin thutang kingah hi.

²⁷ Midikte in migilote mudah uh a, migilote in midikte mudah uh hi.