Paunak 28 - Tedim Bible

Migilo le Mithuman

¹ Kuama delh lohpi-in migilote taimang a, mithumante ahihleh humpinelkai bangin a hang uh hi.

² Gam sung mite a hoih loh ciangin a banbanin gam uk kumpi tampi nei uh a, ahi zongin mipil thungaihsun theite in gam sung thahatsakin kipsak uh hi.

³ Mizawngte a bawlsia aana a nei mipa pen lo-a ante a susiagawp guahzu tawh kibang hi.

⁴ Thukham a zui lo mite in migilote pakta uh a, thukham a zui mite ahihleh migilote tawh kilem lo uh hi.

⁵ Mi siahuaite in thutang cihmel thei lo uh a, Topa a biate in ahihleh a kicingin a thei uh hi.

⁶ Hau napi-in lungsimkawi mi hihna sangin zawng napi-in paubaan neih lohna hoihzaw hi.

⁷ Thuhilhna a mang mite ta pil hi a, lawm gilo tawh a kikhawl mi in a pa mindaisak hi.

⁸ A meet a pung lakna tawh a hau mipa pen mizawngte a hehpih mipa a dingin sum a zonsak hi lel hi.

⁹ Mi khat in thukham a zuihnop kei leh ama thungetna nangawn Pasian in zakthadahhuai sa hi.

¹⁰ A diktat mi khat siatsak ding a hanciam pa pen ama tawhsa gum sung mahah kia ding hi. A dik mipa in gamh hoih luah ding a, migilo pa in bangmah luah lo ding hi.

¹¹ Mihau pa pen amah pil kisa a, ahi zongin a zawng mi pil pa in a hau pa’ haina phawkkhia veve hi.

¹² Mihoihte in vangliatna a ngah ciangin mi khempeuh lungdam uh a, migilote a liat ciangin adangte in gimna thuak uh hi.

¹³ A khialhna a im mite a dau pai lo ding a, a mawhna pulakin a kikheel mite in hehpihna ngah ding uh hi.

¹⁴ Topa a zahtak tawntungte pen mi nuamsa hi a, a lungkhauh mite in lungkhamna tuak ding uh hi.

¹⁵ Mizawngte a uk migilo pa pen humpinelkai gilkial le vompi halungvei tawh kibang hi.

¹⁶ Ngaihsut siamna a nei lo gam ukpa a gilo kumpi hi ding a, thuman tawh ngah ding bek a deih mipa in sauveipi uk ding hi.

¹⁷ Mi thatin a khial pa in ama hankhuk ding a to ahi hi. Ama hankhuk tawh kho kei in.

¹⁸ Thumanin a gamta mite lungmuangin om ding uh a, a zuautat mite ahihleh puk ding uh hi.

¹⁹ Nakpi takin lo a khopa hau mahmah a, bangmahin a kimang tum lo na a sempa zawng mahmah hi.

²⁰ A citak mipa in thupha tampi ngah ding a, a hau baih nuam mipa in gim tuak pelmawh ding hi.

²¹ Mi langbawlna hoih lo a, ahi zongin letsong neucik khat hangin thukhente gamta khial thei zel hi.

²² A huaiham mi in a hauh nadingin huai mengmeng a, a tawpna-ah a zawn’ ding lamtak phawkkha lo hi.

²³ Mi khat tai-in thuhilh lecin tungthama phatna sangin a tawpna-ah lungdamzaw ding hi.

²⁴ A nu a pa’ neihsa laksakin, “Khialhna hi kei,” a ci pa pen guta mah hi veve hi.

²⁵ A huaiham mi in kitotna piangsak a, Topa a muang mite mihau hi ding hi.

²⁶ Ei le ei kimuanna haina hi a, mipilte’ hilhna zuihna pen lungmuanna ahi hi.

²⁷ Mizawng a huhte cimawh ngei lo ding a, huhna a pia nuam lote in samsiatna ngah ding hi.

²⁸ Migilote a liat ciangin midangte bucip uh a, amaute a zakiat ciangin midikte in ukkik ding hi.