Paunak 27 - Tedim Bible

¹ Zing ciang hun ading kima-sialh kei in. Tuhun le tua hun kikalah a piang ding thu bangmah na thei kei hi.

² Midangte in hong phat lohbuang nangmah kiphattawm kei in. Khual mite in hong phat lohbuang nangma kamin kiphattawm kei in.

³ Suangtum le sehnel gik mahmah a, ahi zongin mihaite’ piansak lungkhamna gikzaw lai hi.

⁴ Hehna le sinsona siahuai a, ahi zongin hazatna siahuaizaw lai hi.

⁵ Itna i seel bawl sangin a langtangin taina hoihzaw hi.

⁶ I lawmte in hong liamsak hangin i hoihna ding a hong deihsakna hizaw hi. I galte in hong ngawng kawina pen hong lehbawlna ahi hi.

⁷ A gilvah mipa in khuaizu nangawn duh nawn lo a, a gilkial mipa in a kha an nangawn limsa hi.

⁸ Inn panin gamlapi-ah a zinkhia mipa a bu panin a leengkhia vasa tawh kibang hi.

⁹ Sathau namtui le paknamtui in lung nuamsak a, lawmte’ limbawlna in tha hatsak hi.

¹⁰ Na lawmte daangkoih kei inla, na pa’ lawmte dong nangawn lawm bawl in. Na lungkham ciangin na sanggampa va ko kei in. A gamla-ah a om i sanggampa sangin a nai-ah a om i vengpa kimangzaw hi.

¹¹ Ka ta aw, pil in; tua hileh ka lungdam ding a, kei hong mawhsak nuamte in bangmah hong cih thei lo ding hi.

¹² Mipilte in a lauhuai thu muthei-in pelh uh a, mi mawkmawkte in phusuakin thuak uh hi.

¹³ Mi khat in gamdang mi khat’ leiba a lohsak dingin kam a ciam leh a ciam bangin ama neihsa kilaksak takpi ding hi.

¹⁴ Mi khat in a kituak lopi-in midang khat limbawl lualiang leh amah in a sia lamin na ngaihsun zaw hi.

¹⁵ Phun bekbek a thei zi pen theu hun mel a nei lo guahciin tawh kibang hi.

¹⁶ Tua bang numeite kikho thei lo a, a kikham thei lo huihnung, le i khutin sathau i tawi nop tawh kibang hi.

¹⁷ Sik in sik mah hiamsak thei a, mi in midang pilsak thei hi.

¹⁸ Theikung a cing pa in a theigah ne a, a tapa a kem pa in pahtakna ngah hi.

¹⁹ Tui sung en leeng eima maitang i muh bangin i lungsim en leeng eima pianzia kilang hi.

²⁰ Mihingte’ lungsim pen misite’ gam tawh kibang a, tamlua cih hun nei thei lo hi.

²¹ Ngun le khamte meikhukah kize-et a, mihing ahihleh phatna tawh kize-et hi.

²² Mihai khat a sih dek dongin na satsat hangin a hai ngei mahin hai veve lai ding hi.

²³ Na tuuhonte hoihtakin thei inla, na bawnghonte hoihtakin kem in.

²⁴ Bang hang hiam cih leh neihsa kip tawntung lo a, hauhna pen a khangkhangin kizom suak lo hi.

²⁵ Lopate ki-atmang khin a, ahi zongin a no hong selkik hi. Mualtungah a po lopa hing khempeuh ki-atin inn-ah kipua a,

²⁶ tuute in na puan ding hong guan a, na keeltal mante lo ciing khat man tawh kikim hi.

²⁷ Na keelnawite ahihleh na innkuan annek ding, le na nasem numeite’ nuntak nadingin kicing ding hi.