Paunak 26 - Tedim Bible

¹ Tuk laitak a vuk kia le anlak huna guahzu bangin mihaite a dingin pahtawina a kilawmna om lo hi.

² Thu om lopi a hong kisamsiatna pen bangmah a hong cih thei lo, khawlna mun mel a nei lo, a leengsuk a leengto phialphiah tawh kibang lel hi.

³ Sakolte sat ding kisam a, late kamkaih kisam a, mihaite zong sat ding a kisam ahi hi.

⁴ Mihaite’ thudotna dawngdawng lecin nang zong amau mah bangin a hai na hi hi.

⁵ Mihaite a pilin a kingaihsut khak loh nadingin amau’ haina tawh kizui-in dawng zaw in.

⁶ Mihai khat kamtai-in a zang pa pen ama khe mah a sattantawm, siatna a zong pa ahi hi.

⁷ Khebai pa’ khe a kimanna om loin a kikhai mawk bangin mihaite a dingin paunak in bangmah man nei lo hi.

⁸ Saili kuangah sailungtang khihcip lehang phattuamna a om loh bangin mihaite pahtawina zong a mawkna ahi hi.

⁹ Mihaite in paunak thuhilhnate a paukhiat ciangin zukham pa in a khut a ling om a khei dingin a kipan tawh kibang lel hi.

¹⁰ Mihai a tuahkhak peuh tha cial a a nei pa pen a tuahkhak peuh a ban kap thal tawipa tawh kibang hi.

¹¹ Ui in a luak a zuatkik bangin mihaite zong a haitat ngei bangin ta kik zel hi.

¹² A pil lo kimlai a pil a kisapa sangin mihaite a dingin lametna omzaw lai hi.

¹³ Thadahpa in, “Lampi-ah humpinelkai om! Kongzingah humpinelkai om!” ci-in lumlum hi.

¹⁴ Kongkhak pen kawmhek tungah a kiheihei lel bangin mi thadahpa a lupna tungah kiheihei hi.

¹⁵ Thadahpa in a khutin ankuang sawksuk a, a kamah a bahtoh kik ding nangawn gim zungzung kisa hi.

¹⁶ A kilawmin thu a dawngthei mihing sagih sangin mi thadahpa a ngaihsutna-ah pil kisa zaw hi.

¹⁷ Eite tawh a kisai lo kitotna sunga kiphumna pen ui ommuang khat a bil-in i kaihsak tawh kibang hi.

¹⁸ A vengte a khem khit ciangin ka ciamnuihna hi, a ci pa pen

¹⁹ sihtheihna gu a baang thaltang tawh a kap pa tawh kibang hi.

²⁰ Sing om kei leh mei mit a, gensiatna om kei leh kitotna bei hi.

²¹ Meihol in mei-am ding piangsak a, sing in mei kuangsak a, migilo in kitotna piangsak hi.

²² Gensiatna pen a lim mahmah an tawh a kibang hi a, mihingte’ sungtawng pekah tumsuk pahpah hi.

²³ Tungtham beka kam khum pauna pen cimbeng kizut leibeel tawh kibang hi.

²⁴ A simtat mi in a kampi bek tawh thuhoih gen a, a lungsimah zuauthu bek om hi.

²⁵ A lungsimah a deihhuai lo thu sagih tak om ahih manin kam khum takin a pau manin umkha kei in.

²⁶ Ama hoih lohna a ip nop hangin mi khempeuh in ama gitlohna thei veve hi.

²⁷ Mi siahna-in gum a tote amau’ gum tawhna sung mahah lehkiat zawsop uh a, mi a dengkha dingin suang a khukte amau’ suang khuk mah in amau mah lehden kha zaw hi.

²⁸ Zuaugenna in midik kimlai a mawh bangsak a, tungtham beka thugenna in siatna bek piangsak hi.