Paunak 22 - Tedim Bible

¹ Hauhna sangin min hoihna deihhuai zaw a, kham le ngun sangin mi’ hong thusimna deihhuai zaw hi.

² A hau a zawng a kilamdanna om lo a, a nih tuakun Topa’ bawlsa ahi uh hi.

³ Mipilte in a lauhuai thu mu thei-in pelh uh a, mi mawkmawkte in phusuakin thuak uh hi.

⁴ Kiniamkhiat-a Topa zahtakna thaman in hauhna, minthanna, le khansauna ahi hi.

⁵ Migilote’ lampi-ah thang kisiahin so kidawh a, mipilte in tua lampi pelh uh hi.

⁶ Naupang khat a neulai-in lampi man tawnsak lecin a teek dongin lampial nawn lo ding hi.

⁷ Mihaute in mizawngte uk a, leitawi a late pen a piate’ sila a suak hi.

⁸ Thuman lo khaici a vawhte in lungkhamna tuak uh a, amau’ hehna ciangduai amau’ tung mah tukik ding hi.

⁹ A cingh mi in mizawngte an pia a, amah in thupha ngahkik hi.

¹⁰ Mi kiphasakte hawlkhia lecin kitotna le kisimmawhna bei pah ding hi.

¹¹ Kamsiamna in kumpipa’ lawm hong suaksak a, ahi zongin Topa in lungsim takpi a deih hi.

¹² Topa in thuman mite kem a, ahi zongin thuzuau gente a lawnthal hi.

¹³ Mi thadahte a inn-ah lumlum a, “Pua pial lehang humpi’n hong hih kha’n teh,” ci uh hi.

¹⁴ Numei tungah mawhna pen thangzak bang hi a, tua thangah a awkte tungah Topa a heh hi.

¹⁵ Naupangte a hai gamtat a ngeina hi a, deihtakin pangbetna in mihoih suaksak thei hi.

¹⁶ Hauhnop manin mihaute letsong pia leeng kizawnlawh a, hauhnop manin mizawngte’ neihsa laksak lehang zong kihauhlawh tuan lo hi.

Thupiakte le Hilhkholhna Sawmthumte

¹⁷ Na bil uh hong ngatin mipilte’ thugen ngai unla, ka hong hilh pilna thute na lungsim uhah lutsak un.

¹⁸ Na lungsim uhah ciingin zang thei le-uhcin, na lung uh dam tawntung ding hi.

¹⁹ Tua hileh Topa muanin na nei ding uh a, tuni-in note’ phattuamna ding kam a pau ka suak ding hi.

²⁰ Thuhilhna le pilna thu nam sawmthum hih lai-ah note a dingin ka gelh a,

²¹ thuman a kan dingin note hong sawlte’ tungah thuman bang hiam cih na genkik theih nadingun thuman na theih nading uh ka deihna ahi hi.

-1-

²² Bangmah hong cih zo lo ding cihna hangin nuamtak sa-in mizawngte’ neihsa mawk suh kei unla, zumah khia-in mawk bawlsiat kei un.

²³ Bang hang hiam cih leh Topa in amaute panpih ding a, amau a bawlsiate tungah phu a laksak ding hi.

-2-

²⁴ A hehbaih mite tawh kipawl kei unla, a lungtom mite tawh kikhawl kei un.

²⁵ Amau’ hoih lohnate na zuihkhak loh nadingun na kidop kei uhleh note in zong na awklawh kha ding uh hi.

-3-

²⁶ Midangte’ leiba lohsak dingin kamciamin leiba tavuan lakha kei un.

²⁷ A leiba lohsakzo kei le-uhcin na lupna nangawn uh hong kidawhkhiatsak ding hi.

-4-

²⁸ Na pu na pate’ phuhsa gisuang cikmah hunin khin kei un.

-5-

²⁹ A nasepna-ah a siam mahmah mi na theikha uh hiam? Amah in mi mawkmawkte’ na sem lo ding a, kumpite’ na sem ding hi.