Paunak 19 - Tedim Bible

¹ Zuau genin mihai hihna sangin citakin zawn’ khiukheuna hoihzaw hi.

² Thuthei lopi-in lawpluatna hoih lo a, mawk nawhtatna in lungkhamna piangsak thei hi.

³ Mi pawlkhat in amau’ haitatna hangin gimna a ngah hinapi-in Topa ngawhin mawk heh uh hi.

⁴ Mihaute in lawm mu thuahthuah a, mizawngte in a neihsun teng nangawn khahsuahsuah uh hi.

⁵ Thuman gen lo teci in gim tuak pelmawh ding a, zuaugen mi suakta lo ding hi.

⁶ A cingh mihau pa’ maipha ngah ding ki-ut ciat a, na a piak mi khempeuh ama lawm ahi hi.

⁷ Mi khempeuh in a sanggam zawng pa uh mudah ciat ahih manin a lawmte in a taisatna a thu lamdang hi lo hi.

⁸ Pilna a zongpa in ama phattuamna ding a zong hi a, thu a thei mipa’ sepna maavang ding hi.

⁹ Thuman lo teci in gim tuak pelmawh ding a, zuaugen mi in sihna thuak ding hi.

¹⁰ Mihaite a nop lua-in a nuntak ding kilawm lo a, silate in miliante a uk ding kilawm lo zaw lai hi.

¹¹ Pilna in mi lungduaisak a, mi’ hong hehsaknate kiphawkmawh bawlna in minthanna ahi hi.

¹² Kumpipa’ hehna humpinelkai hawk bangin lauhuai a, ama pahtakna lopa tunga daitui taak bangin deihhuai hi.

¹³ Tapa hai pen a pa’ lungkhamna hi a, zi phunphun pen a theu thei lo guahciin tawh kibang hi.

¹⁴ Inn le neihsate pen pate’ tung panin a kiluah hi a, zi pil ahihleh Topa bek in hong pia thei hi.

¹⁵ A thadahte lumlum a, a mawk omte a gil kial hi.

¹⁶ Thukham a zuite a khansau ding a, thukham a zui lote si ding hi.

¹⁷ Mizawngte tungah a piate in Topa’ tungah a pia hi a, Topa in a cingin amaute tungah lohkik ding hi.

¹⁸ Thu hong mantheih lai-in na ta thuhilh in; na hilh kei leh a siatna ding a deih na hi hi.

¹⁹ Migilo pa ama thuak ding gimna mah thuaksak zaw in. Honkhia lecin na hotkhiatkik zelzel kul ding hi.

²⁰ Thu kigente ngai-in hong kihilhte mang lecin mai lamah na pil ding hi.

²¹ Mihing’ ngaihsutna-ah thu tampi om a, ahi zongin Topa’ deihna tawh a kituakte bek kimang ding hi.

²² Duhhopna pen mindaina hi a, zuau gen pa hihna sangin mizawng hihna hoihzaw lai hi.

²³ Topa a zahtakte a khansau a, lungkim takin nuamsa-in om uh a, siatna bangmah tuak kha lo uh hi.

²⁴ A thadah mi in a khut tawh ankuang sawksukin a kam sungah a tuttohkik ding nangawn ut lo liang hi.

²⁵ Thu thei lote in satna bek tawh pilna ngahzo a, thungaihsun theite in taina lel tawh pilna ngahzo uh hi.

²⁶ A pa nawtgawpin a nu a notkhia tapa pen zumna le mindaina a piangsak tapa ahi hi.

²⁷ Thuhilhna a mang nuam lo tapa pen pilna a thei kha lo ding tapa ahi hi.

²⁸ Mi a susia nuam teci in thuman gen nuam lo a, migilote in gitloh tatna nuamsa uh hi.

²⁹ Mi a thusim lote in ciangduai thuak uh a, mihaite in satna thuak uh hi.