Paunak 18 - Tedim Bible

¹ Midangte tawh a kipawlthei pha lote amah bek thupi a kisate hi a, midangte’ cih khempeuh man a sak khat beek om lo hi.

² Mihaite in thu a teltheih zawhna ding uh kin lo uh a, pil si, a kicih theih nading deihna bek tawh thu gen uh hi.

³ Mawhna bawl leeng maizumna tawh kizom pah a, minsiatna ngah leeng mindaina tawh kizom pah hi.

⁴ Mihingte’ kampau pen pilna kipatna suak thei a, tuipi bangin thuk-in luitui bangin a siang hi.

⁵ Mimawhte angvanin diksak a, midikte mawhsak ding thuman lo hi.

⁶ Mihaite in kitotna ding a pat ciangin hong sat un, ci-in a ngenngen ahi hi.

⁷ Mihaite a pau ciangin amau’ siatna ding mah a pau hi a, amau’ kampau mah awkpih uh hi.

⁸ Gensiatna pen anlim mahmah tawh kibang a, thakhatin i sungah kihupsuk hi.

⁹ Na a susia mite a hoih loh zah mahin a thadahte zong mihoih lo ahi hi.

¹⁰ Topa’ min pen tausang muanhuai tawh kibang a, thuman mite in belin lungmuangin om thei uh hi.

¹¹ Khuapi kiima kulhpi in amah a hut bangin a hauhna in amah a hu dingin mihau pa in ngaihsunkha hi.

¹² A kiniamkhiatte in zahtakna ngah uh a, a kihisakte pen siat ding a manawh hita hi.

¹³ A thu za khin nai lopi-in dawnkikna pen haina le maizumna ahi hi.

¹⁴ Mihingte’ lungsim in cinatna thuakzo sak a, mihing lungsim kisia leh cih nading om nawn lo hi.

¹⁵ Thungaihsun theite in a pilna uh behlap a, pilna a ngah nadingun mipilte in a bil uh tawh limtakin ngai uh hi.

¹⁶ Letsong in a piapa a dingin lampi honsak a, miliante tawh kimusak thei hi.

¹⁷ Thukhenna zumah a lang pa in a thuk mateng a gen masa pa a thuman tawh kibang hi.

¹⁸ Thugen a siam tuak mi nih zum sungah a kiseel ciangin kiciamna bek in thu khenzo hi.

¹⁹ Sanggamte na huhna in khuapi muanhuai bangin hong hu a, sanggam tawh kitotna in kidon lohna piangsak hi.

²⁰ Mi khat in a kampauna hangin gilvahna ngah ding a, a thugenna hangin nuntakna ngah ding hi.

²¹ Kampauna in sihna ahi a, hinna ahi zongin piangsak thei a, i kampauna bangin a piangte san loh phamawh hi.

²² Zi a muzote na hoih a mu hi a, Topa’ maipha a ngah ahi hi.

²³ Mizawngte a pau ciangin thumna kam zang a, mihaute in a dawn ciangin kihihsakna kam zang hi.

²⁴ Lawm pawlkhatte sauvei kimang lo a, lawm pawlkhatte sanggam sangin kipzaw hi.