Paunak 17 - Tedim Bible

¹ Kitawng kawmkawmin pawipi sungah an nekna sangin lungnuam takin mohkeu themkhat nekna hoihzaw hi.

² A pil silapa in a topa’ ta hai tungah aana nei-in a topa’ gamh pawlkhat a luah hi.

³ Kham le ngunte mei sungah kize-et a, mihingte’ lungsim Topa in ze-et hi.

⁴ Migilote in gitlohna thu bek mah ngaihin nei uh a, zuautheite in zuauthu mah ngaihin nei hi.

⁵ A zawngte a simmawh pa in amah a Piangsak pa a simmawh hi a, midangte’ tuahsiatna-ah a lungdam mipa in gim thuak hamtang ding hi.

⁶ Tute pen puteekte a dingin minthanna lukhu hi a, tate pen pate’ minthanna ahi hi.

⁷ Miliante in zuauthu gen ngei lo a, mihaite in na-a kimang kam pau ngei lo hi.

⁸ Sumgolh a zangte in ai bangin ngaihsun uh a, a deih khempeuh uh a ngahsak dingin ngaihsun uh hi.

⁹ Mi’ khialhna a maisakte midangte in itin lawm hau uh a, mi’ khialhna ciaptehna pen lawm taanna ahi hi.

¹⁰ Mihai khat zavei a kisatna sangin mipil khat khatvei tai-na in bunzaw hi.

¹¹ Thusia bekbek a deih tawntung migilote kiangah, a gilo kamtai pa bangin sihna tung ding hi.

¹² Mihaite a hai gamtatna uh i tuahkhak sangin a no a kilaksak vompi hang khat tuak lehang hoihzaw lai hi.

¹³ Thuhoih kimlai thusia tawh a thukte’ inn sungah cikmahin thusia veng cih om ngei lo hi.

¹⁴ Kitot i kipat ciangin tui lipi cinna phung kehsakkhak tawh kibang hi. Tua ahih manin a nasiat ma-in kitot khawlpak in.

¹⁵ Migilote khahkhongna, thuman mite mawhsakna, a nih tuakin Topa in deih lo hi.

¹⁶ Mihai pa in thu ngaihsun thei lo ahih manin pilna zonna ding sum tampi a zat hangin a phattuamna om lo hi.

¹⁷ Lawm citak in a tawntungin hong it a, i sanggamte pen i lungkhamna a hong thuakpih dingin a piang ahi hi.

¹⁸ Thu a ngaihsun thei lo mihaite bek midang’ leiba lohsak dingin kipia ngam hi.

¹⁹ Khialh ding a utte lungkham ding a ut hi a, kihisak-a kam paupaute buaina ding a zongzong ahi hi.

²⁰ Lungsim hoih lote in lungdam mu lo uh a, mi a khem theite in lungkhamna tuak uh hi.

²¹ Tapa hai pen a pa’ lungkhamna hi a, ta hai a nei pa a lung dam lo hi.

²² Maitaina in ci damsak a, maigum tawntungna in guhtui teepkang hi.

²³ A ginalo thukhente in sumgolh sangsim uh a, a thukhenna uhah thuman om nawn lo hi.

²⁴ Mipilte in a hoihpenin gamtatna ding thei uh a, mihaite in a cih nading thei lo uh hi.

²⁵ Ta hai in a pa dahsak a, a nu lungkhamsak hi.

²⁶ A thuman mi gimpiak ding hoih lo a, mihoihte satna pen thukhialhna ahi hi.

²⁷ Thu a thei taktakte in gengen khol lo a, a paupau khol lote thumu taktak hizaw hi.

²⁸ Mihaite pau loin om leh a pil mahin kingaihsun hi. Thungaihsun thei na hihna a kilat nadingin pau loin om khinkhian in.