Paunak 15 - Tedim Bible

¹ Kam nemin dawnna in hehna damsak a, kam khauh in hehna piangsak hi.

² Mipilte in pilna thu gen a, mihaite in haina thu gen hi.

³ Topa’ mit in mun khempeuh mu a, misia, mipha, hong encik kim hi.

⁴ Kam khum in nuntakna piangsak a, kam sia in lung gimsak hi.

⁵ A pa’ hilhna a ngai nuam lote mihai hi a, hilhna a mang nuamte mipil ahi hi.

⁶ Thuman mite’ neihsa kip a, migilote’ hauhna in lungkham a guan hi.

⁷ Mipilte’ kampauna in pilna khangsak a, mihaite’ lungsimah thuman lohna bek om hi.

⁸ Topa in migilote’ biakpiakna kihhuai sa a, thuman mite’ thungetna-ah lungdam hi.

⁹ Topa in migilote’ gamtatna kihhuai sa a, thuman a deih mite a it hi.

¹⁰ A gamta khial mite nakpitakin kithuhilh a, thukihilhna a mang nuam lote in sihna thuak ding uh hi.

¹¹ Sihna gam sungah a omte nangawn Pasian in mu ahihleh, mihingte’ ngaihsutna tel muhzaw kan ding hi lo ahi hiam?

¹² A kihisak mite in kithuhilhna ngai nuam lo uh a, mipilte kiangah thu dong ngei lo uh hi.

¹³ Lungdamna in maitaisak a, lungkhamna in maigumsak hi.

¹⁴ Thungaihsun theite in pilna zong uh a, mihaite ahihleh a theih lohna uh tawh lungkim uh hi.

¹⁵ Mizawngte lungkham tawntung uh a, a lungdam mite in nuntak nuamsa mahmah uh hi.

¹⁶ Hau napi-in lungkham sangin zawng napi-in Topa zahtakna hoihzaw tham hi.

¹⁷ Kitawngtawng kawmin sameh limpen nekna sangin ki-it diamdiamin anteh meh nek hoihzaw hi.

¹⁸ Lungtomna in kitotna piangsak a, lungduaina in kilemna piangsak hi.

¹⁹ Mi thadahte in mun khempeuhah haksatna tuak a, mi thumante in haksatna tuak kha lo hi.

²⁰ Ta pilte in a pa lungdamsak a, ta haite bek in a nu simmawh hi.

²¹ Mihaite in a hai mah uh lungdampih a, mipilte ahihleh a manin gamta uh hi.

²² Lim ngaihsut loin sepna tawh bangmah piang zo lo a, limtakin geelna tawh maa kitunzo bek hi.

²³ A hun mahin dawnpah theihna lungkimhuai a, a kilawm kammal tawh dawnpah theihna hoihzaw kan hi.

²⁴ Mipilte in nuntakna lampi zuito uh a, sihna lampi zuisuk lo uh hi.

²⁵ Topa in mi kiphasakte’ inn phelkhiatsak a, meigongte’ neihsa hutpih hi.

²⁶ Topa in migilote’ ngaihsutna kihhuaisa a, midikte’ kampaunate hoih a sa hi.

²⁷ A man loin sum ngahna in innsung lungkhamsak a, sumgolh a deih lote a nuntak sauvei nuam hi.

²⁸ Mihoihte in a kampau ding ngaihsun phot a, migilote’ paupakna pen thusia tawh kizom hi.

²⁹ Topa in midikte’ thungetna ngai a, migilote’ thungetna thudon lo hi.

³⁰ Maitaina in lung nuamsak a, thuhoih zakna in lung damsak hi.

³¹ Kithuhilhna zuih theihna pen mipilte’ lakah kihel theihna ahi hi.

³² Kihilh ding a ut lote amahmah a kisusia hi a, kithuhilh ding a utte pil semsem ding hi.

³³ Topa zahtakna pen pilna mah hi pah a, kiniamkhiatna in pahtawina hong ngahsak hi.