Paunak 13 - Tedim Bible

¹ Ta pil in a pa’ hilhna mang a, a kihisak mi in a khial min pua nuam lo hi.

² Mihoihte in a kam siamna bangun thaman sang a, mizuaute pen siattat ding bek ut uh hi.

³ Pau a ki-ipzo mi in a nuntakna a hu hi a, a mawk paupau mi pen amah a kisiasak tawm ahi hi.

⁴ Thadah mi in a deih ngahzo lo a, nasep hahkat mi in a deih khempeuh ngahzo hi.

⁵ Thuman mi in zuauthu deih lo a, a gilo mi in gensiatna le mindaina ding bek a pau hi.

⁶ Thumanna in midikte hu a, gitlohna pen mawhneite’ pukna ahi hi.

⁷ Mi pawlkhatte, zawng napi-in kihausak uh a, mi pawlkhatte, hau napi-in kizawngsak uh hi.

⁸ Mihau pa’ sum hauhna in a nuntakna tankhiazo a, mizawng pa in a kitatna ding bangmah nei lo hi.

⁹ Thuman mite khuavak bangin taang lela a, migilote meivak bangin mitpak hi.

¹⁰ Hilh ding ut lo, kihihsakna in kitotna bek piangsak thei a, hong kithuhilh ding utna pen a hoihzaw ahi hi.

¹¹ Ol takin hauhpakna oltak mahin kiamkik pah a, haksapi-in hauhtohna khangto semsem hi.

¹² Lamet tun lohna in lungsim cinasak a, deihna tangtunna pen lungdamna ahi hi.

¹³ Thu kihilh ding ut lohna pen siat ding utna hi a, thu kihilhna zuihna pen lungnopna ahi hi.

¹⁴ Mipilte’ thuhilhna pen nuntakna tuinak bang hi a, sihna thang tawh kipelhna ahi hi.

¹⁵ Thungaihsut theihna maipha ngahna hi a, zuautatna in lungkhamna bek piangsak hi.

¹⁶ Thungaihsun theite pilna tawh gamta a, mihaite in a haina taangko hi.

¹⁷ Kamtai ginalo in mi lungkhamsak a, a citak thupuak pa in mi lungdamsakkik hi.

¹⁸ Thukihilhna a zui lo mi in zawnna le mindaina ngah a, thukihilhna a zui mi in minphatna le pahtawina a ngah hi.

¹⁹ Deihna ngahna in lungsim nuamsak a, siat gamtatna panin mihaite pialkhia nuam lo hi.

²⁰ Mipil tawh kikhawl lecin na pil ding a, mihai tawh kikhawl lecin gimna na thuak ding hi.

²¹ Tuahsiatna in mawhneite sulzuih kawikawi a, midikte tuahpha kawikawi hi.

²² Midikte in a tu a tate’ luah ding gamh nei uh a, mawhneite’ neihsate ahihleh midikte a’ ding hi lel hi.

²³ Lo thak panin mizawngte’ khamkhop ding an piangkha ding a, ahi zongin thuman lohna hangin tua nangawn maimang thei ding hi.

²⁴ A ta a tai nuam lote a ta mudah hi a, a ta a itte in limtakin thuhilhin a tai hi.

²⁵ Thuman mi in a kham ding nei-in gilvah a, a gilo mi in nektawm ding nei loin a gil a kial hi.