Paunak 10 - Tedim Bible

Mipha le Misia Etkakna

¹ Hihte pen Solomon’ paunakte ahi hi: Ta pil in a pa lungdamsak a, ta hai in a nu dahsak hi.

² Thuman loin ngahna-ah phattuamna om lo a, thumanna in sih nading pan hong hon hi.

³ Topa in mihoihte a gilkialin koih lo a, migilote a duh uh nesak lo hi.

⁴ Thadahna in zawnna hi a, thanuamna in hauhna hi.

⁵ A hunin an a lapa mipil hi a, anlak hunin a ihmu pa in maizumna a ngah hi.

⁶ Mihoihte in thupha ngah a, migilote in thusia bekbek gen hi.

⁷ Mihoihte kiphawkphawk a, migilote kimangngilh pah hi.

⁸ Mipilte in thuhilhna mang a, a hai paute in lungkhamna tuak hi.

⁹ Thuman mite lungnuamin om hithiat a, thuman lote kiman hi.

¹⁰ Khialhna kimuhmawh bawlna in buaina piangsak a, hang takin hilh ngamna in nopna piangsak hi.

¹¹ Mihoihte’ kampaute pen nuntakna tuinak bang a, migilote in thusia bekbek gen uh hi.

¹² Muhdahna in kitotna piangsak a, itna in mawhna khempeuh maisak hi.

¹³ Thungaihsun theite’ kam sungah pilna om a, mihaite’ nungzangah ciangduai kinga hi.

¹⁴ Mipilte in a pilna uh behlapin, mihaite a pau ciangin thusia tawh kizom pahpah hi.

¹⁵ Hauhna in mihaute hu a, zawnna in mizawngte siasak hi.

¹⁶ Mihoihte’ thaman nuntakna hi a, migilote’ thaman siatna ahi hi.

¹⁷ Kihilhna manna nuntak lampi zuihna hi a, hilhna man’ nop lohna lampi lauhuai zuihna ahi hi.

¹⁸ Mi a mudahte bek in zuauthu gen a, mi a gensiate mihai ahi hi.

¹⁹ Kam tam paute tampi khial a, pau iptheite mipil hi.

²⁰ Mihoihte’ thugente nguntang bang a, migilote’ ngaihsutnate in bangmah man lo hi.

²¹ Mihoihte’ thugente in mi tampi nuamtuamsak a, mihaite in a hai sihpih uh hi.

²² Topa’ thupha in mite hausak a, dahna le gimna tawh piakhawm lo hi.

²³ Mihaite in gamtatsiat ding nuamsa uh a, thungaihsun theite in pil gamtatna nuamsa uh hi.

²⁴ Migilote tungah a kihtaktak uh tung a, mihoihte in a deihdeih uh ngah uh hi.

²⁵ Huihpi a nun’ ciangin migilote leenmang a, thuman mite lungmuangin om tawntung uh hi.

²⁶ Leenggahtui thuk in ha kimsak a, meikhu in mit a siipsak bangin, mi thadah in a cial pa a nasak hi.

²⁷ Topa zahtakna in khan sausak a, migilote khansih hi.

²⁸ Mihoihte’ lametna lungdamna hi a, migilote’ lametna a hawmpi ahi hi.

²⁹ Topa in midikte hu a, migilote a susia hi.

³⁰ Midikte lungmuang takin om tawntung ding uh a, migilote in omna ding mun ngah zo lo ding uh hi.

³¹ Midikte in pilna thu gen uh a, thu hoih lo a gente’ leii ki-attan ding hi.

³² Midikte in a gen ding uh thuhoih thei a, migilote in thusia bekbek gengen uh hi.