Paikhiatna 6 - Tedim Bible

¹ Ahih hangin Topa in Moses kiangah, “Tu-in Faro’ tungah ka bawl ding na mu ding hi. Bang hang hiam cih leh amah in ut lopipi-in amaute sawlkhia ding hi. Amah in ut lopipi-in ama leitang panin amaute hawlkhia taktak ding hi,” a ci hi.

Moses a Kisapkhiatna Kigenkik

² Pasian in Moses kiangah, “Kei pen Topa ka hi hi.

³ Abraham, Isaac, le Jakob-te’ tungah Vanglian Pasian-in ka kilang a, ahih hangin Topa ahi keima min tawh amaute’ tungah kei ka kitheisak kei hi.

⁴ Amaute tawlkhat sung a tenna leitang ahi Kanaan gam amaute’ tungah piak dingin amaute tawh ka thuciamna zong ka kipsak hi.

⁵ Tua tham loin Egypt mite in salin a neih Israel mite’ thumna ka zazo a, ka thuciamna ka phawkzo hi.

⁶ Tua ahih ciangin Israel mite’ tungah, ‘Kei pen Topa ka hi hi. Egypt mite’ na na sepna uh panin note kong paikhiatpih ding hi. Amau’ sal hihna panin note kong khahkhia ding a, a thahat ka khut zanin thukhenna nasep lian tawh note kong honkhia ding hi.

⁷ Keima mi dingin note kong la ding a, kei pen note’ Pasian ka hi ding hi. Egypt mite’ sila hihna panin note a hong paikhiatpih pa, Topa na Pasian uh ka hihna note in na thei ding uh hi.

⁸ Abraham, Isaac, le Jakob-te’ tunga ka ciam leitangah note kong paipih ding hi. Tua leitang na neih dingun note’ tungah kong pia ding hi. Kei pen Topa ka hi hi, ci hi,’ ci in,” a ci hi.

⁹ Moses in tua bangmahin Israel mite tungah a gen hi. Ahih hangin amau’ lungsim kitapna le a salsuahna sung uhah a gimna uh hangin amaute in Moses’ thu ngai lo uh hi.

¹⁰ Tua ciangin Topa in Moses kiangah,

¹¹ “Pai-in va tum inla, ama leitang panin Israel mite a paikhiatsak nading Egypt kumpipa Faro’ kiangah va gen in,” a ci hi.

¹² Ahih hangin Moses in Topa kiangah, “En in, Israel mite nangawn in ka thu hong ngai lo uh hi. Tua ahih ciangin bangci-in thugen siam lo keima thu, Faro in hong ngai ding ahi hiam?” a ci hi.

¹³ Ahih hangin Topa in Moses le Aaron tungah thu gen a, Egypt gam panin Israel mite a paikhiatpih dingin note ka hong sawlna thu, Israel mite le Egypt kumpipa Faro’ tungah va gen un, ci-in a hanthawn hi.

Moses le Aaron Khangsimna

¹⁴ Hihte pen amau’ beh lutangte ahi hi: Israel’ ta a suak masa Reuben’ tapate: Hanok, Pallu, Hezron, le Karmi ahi hi. Hihte pen Reuben-te beh ahi hi.

¹⁵ Simeon’ tapate: Jemuel, Jamin, Ohad, Jakhin, Zohar, le Kanaan numei’ tapa Shaul ahi hi. Hihte pen Simeon-te beh ahi hi.

¹⁶ Hihte pen amau’ khang tawh kizui-in Levi’ tapate’ min ahi hi: Gershon, Kohath, le Merari hi a, Levi kum za le kum sawmthum le sagih nungta hi.

¹⁷ Gershon’ tapate: Amau’ innkuan tawh kizui-in Libni le Shimei ahi hi.

¹⁸ Kohath’ tapate: Amram, Izhar, Hebron, le Uzziel hi a, Kohath kum za le kum sawmthum le thum nungta hi.

¹⁹ Merari’ tapate: Mahli le Mushi ahi hi. Hihte pen amau’ khang tawh kizui-in Levi-te beh ahi hi.

²⁰ Amram in ama pa’ sanggamnu Jokhebed zi-in la a, tua nu in amah tawh Aaron le Moses nei hi. Amram kum za le kum sawmthum le sagih nungta hi.

²¹ Izhar’ tapate: Korah, Nefeg, le Zikri ahi hi.

²² Uzziel’ tapate: Mishael, Elzafan, le Sithri ahi hi.

²³ Aaron in Amminadab’ tanu, Nahshon’ sanggamnu Elisheba zi-in la hi. Tua nu in amah tawh Nadab, Abihu, Eleazar, le Ithamar nei hi.

²⁴ Korah’ tapate: Assir, Elkanah, le Abiasaf hi a, hihte pen Korah-te beh ahi hi.

²⁵ Aaron’ tapa Eleazer in Putiel’ tanute khat zi-in la hi. Tua nu in amah tawh Finehas nei hi. Hihte pen a innkuan kuanin Levi mite’ beh lutangte ahi hi.

²⁶ “Egypt gam panin Israel mite a honpi-in paikhiatpih in,” Topa in a cihna mite pen hih Aaron le Moses ahi uh hi.

²⁷ Egypt gam panin Israel mite paikhiatpih nading thu Egypt kumpipa Faro’ tunga thu a gente pen hih Moses le Aaron ahi uh hi.

Moses le Aaron tungah Topa’ Genna

²⁸ Egypt gamah Moses kiangah Topa in thu a gen ni-in,

²⁹ Topa in Moses kiangah, “Kei pen Topa ka hi hi. Na tunga kong gen khempeuh Egypt kumpipa Faro’ tungah gen in,” a ci hi.

³⁰ Ahih hangin Moses in Topa kiangah, “En in, kei pen thugen a siam lo mi ka hi hi. Tua ahih ciangin bangci-in Faro in ka thu hong ngai ding ahi hiam?” a ci hi.