Paikhiatna 29 - Tedim Bible

Aaron le A Tapate Apna

¹ “Amaute in keima tungah siampi na a sep theih nadingun amaute na sianthosak nadingin amaute’ tungah na hih ding thute: Bawngtalno khat le a sitbaang lo tuutal nih,

² le silngo sawh loh anlum, sathau a kihel silngo sawh loh mohte, sathau tawh a kizut silngo sawh loh mohphengte la in. Tuate pen mangbuhnel tawh na bawl ding hi.

³ Lawh khat sungah tuate koihin tuate a lawhin paipihin, a bawngtal le a tuutal nih zong na paipih ding hi.

⁴ “Kikhopna buk kongkhakah Aaron le a tapate na paipih ding a, tui tawh amaute na sil ding hi.

⁵ Nangmah in puante la-in, puantungsilh le siampi puantualpi, siampipuan le awmdal, Aaron silhsakin, hoihtakin a kigan siampipuan gakna tawh amah na gak ding hi.

⁶ Ama lu tungah dialpi khim sakin, dialpi tungah kumpi lukhu siangtho na khusak ding hi.

⁷ Nangmah in nilh sathau la-in, ama lu tungah sungin amah na nilh ding hi.

⁸ “Tua ciangin nangmah in ama tapate paipihin, amaute, puantungsilh na silhsak ding a,

⁹ kawnggakte tawh amaute gakin, amau’ lu tungah a lukhute uh na gak ding hi. Siampi nasepna pen a kip tawntung ngeina ahih manin amau a’ hi ding hi. Tua bangin Aaron le a tapate na kipsak ding hi.

¹⁰ “Tua ciangin kikhopna buk mai-ah bawngtal na paipih ding hi. Aaron le a tapate in bawngtal lu tungah amau’ khut nga ding uh a,

¹¹ Topa’ mai, kikhopna buk kongkhakah nangmah in a bawngtal na go ding hi.

¹² Bawngtal sisan tawmkhat la-in na khutme tawh biakna tau kite na nuh ding a, si a omlai teng biakna tau bulah na sungkhia ding hi.

¹³ A gilpi tuam a thau khempeuh le a sin tunga a utok le a kal nihte le a kal tuam a thau na la ding a, biakna tau tungah tuate na hal ding hi.

¹⁴ Ahih hangin bawngtal sa le a vun le a ekte, giahphual pua lamah mei tawh na hal ding hi. Tua pen khialhna hanga biakna ahi hi.

¹⁵ “Tua ciangin nangmah in tuutalte khat la-in, Aaron le a tapate in tuutal lu tungah amau’ khut nga ding uh a,

¹⁶ nangmah in tuutal go-in, a si la-in biakna tau kimkotah na theh ding hi.

¹⁷ Tua ciangin tuutal semnenin, a sungkua le a khete silin, a sabakte le a lu tawh tuate koihin,

¹⁸ biakna tau tungah tuutal a bupin na hal ding hi. Tua pen Topa’ tungah meihal biakna hi a, a gim namtui, Topa’ tungah mei tawh kihal biakna ahi hi.

¹⁹ “Nangmah in tuutal adang khat na la ding hi. Aaron le a tapate in tua tuutal lu tungah amau’ khut nga ding uh a,

²⁰ nangmah in tuutal go-in, a si tawmkhat la-in Aaron’ taklam bil dawn le ama tapate’ taklam bil dawnte le amau’ taklam khutpi dawnte le amau’ taklam khepi dawnte nuhin, si a omlai teng biakna tau kiimah na theh ding hi.

²¹ Tua ciangin biakna tau tunga a om si tawmkhat le nilh sathau la-in Aaron le ama puante tung le a tapate le a puante tungah na theh ding hi. Tua ciangin amah le a puante le a tapate le a puante a siangtho hi ding hi.

²² “Nangmah in tuutal thau, a mei, a gilpi tuam a thau, a sin pan a utok, a kal nihte, a kal tuam a thau, le a taklam phei (bang hang hiam cih leh tuate pen kipsakna tuutal ahi hi)

²³ le Topa’ mai-ah a om silngo sawh loh anlum lawh sung panin anlum khat, sathau tawh a kibawl anlum bek khat, le moh pheng khat na la ding hi.

²⁴ Hihte khempeuh Aaron’ khutsung le a tapate’ khut sungah na koih ding a, Topa’ mai-ah vei-a piak dingin na vei ding hi.

²⁵ Tua ciangin amau’ khutsung panin tuate na la ding a, Topa’ mai-ah a gim namtui dingin biakna tau tungah mei tawh kihal biakna banah na hal ding hi. Tua pen Topa’ tungah mei tawh kihal biakna ahi hi.

²⁶ “Nangmah in Aaron a kikipsakna tuutal sa-iik la-in Topa’ mai-ah vei-a piak dingin na vei ding hi. Tua pen nangma tanh hi ding hi.

²⁷ “Kipsakna sa pen Aaron le ama tapate a’ ding ahih ciangin, kipsakna tuutal panin a kipia, a kivei siampite’ tanh a phei le vei-a piak sa-iikte na siangthosak ding hi.

²⁸ Tua pen Aaron le ama tapate a dingin Israel mite’ tung panin a kaih tawntung ding uh ahi hi. Bang hang hiam cih leh thunuama amau’ biakna panin Israel mite in a piak ding siampite’ tanh ahi hi. Tua pen Topa’ tungah amau’ piak ahi hi.

²⁹ “Aaron’ biakna puan siangthote pen ama sih khit ciangin a tapate’ tungah kipia ding a, amaute sathau kinilhin a kikipsak nading ahi hi.

³⁰ Ama za luahin siampi na a sem a tapa in siangtho munah nasem dingin kikhopna bukah a pai ciangin ni sagih sung tuate silh ding hi.

³¹ “Nangmah in kipsakna tuutal la-in a siangtho biakna mun khatah a sa na huan ding hi.

³² Aaron le a tapate in kikhopna buk kongkhakah tuutal sa le lawh sunga om anlum ne ding uh hi.

³³ Amaute in amaute a kikipsak nading le a siangthosak dingin kilemna a kibawlna tua ante ne ding uh a, ahih hangin a pualam mi in tuate ne thei lo ding hi. Bang hang hiam cih leh tuate pen a siangtho biakna an ahi hi.

³⁴ Kipsakna sate khat peuhpeuh ahi a, anlum ahi zongin, zingsang ciang dong a omlai leh nangmah in a omlaite mei tawh na hal ding hi. Tuate pen biakna an siangtho ahih manin kine lo ding hi.

³⁵ “Tua bangin nang kong thupiakte khempeuh tawh kituakin Aaron le ama tapate’ tungah na hih ding a, ni sagih sung tawntung amaute ki-apna na bawl ding hi.

³⁶ Kilem nadingin mawhna hanga biakna-in ni simin bawngtal khat na pia ding hi. Siangthosak nadingin sathau na nilh ciang le kilemna na bawl ciangin biakna tau a dingin khialhna hanga biakna khat zong na pia ding hi.

³⁷ Biakna tau a dingin ni sagih sung kilemna bawlin na siangthosak ding hi. Tua ciangin biakna tau a siangtho pen suak ding a, tua biakna tau a lawng peuhpeuh a siangtho suak ding hi.

Nisim Biakna

³⁸ “Tu-in biakna tau tungah na piak tawntung dingte hih bang ahi hi: Nisimin a kizomin kum khat a pha tuuno nihta hi ding hi.

³⁹ Tuuno khat zingsang lamin na pia ding a, adang tuuno khat nitak lamin na pia ding hi.

⁴⁰ Tuuno a masa tawh annel lawh khat le a oliv thau hai khat tawh a kihel leh tuibuah dingin leenggahzu hai khat hi ding hi.

⁴¹ Tuuno adang khat nitakin na pia ding a, zingsang a mah bangin a gim namtui ding, Topa’ mai-ah mei tawh kihal biakna-in an tawh biakna le tuibuah tawh na pia khawm ding hi.

⁴² Nang tunga thu kong gen nading, nang tawh ka kituah nading mun, Topa’ mai kikhopna buk kongkhakah na khang tawntungun a kipia tawntung ding meihal biakna hi ding hi.

⁴³ Tua lai-ah Israel mite tawh ka kituah ding a, keima vang in tua mun siangthosak ding hi.

⁴⁴ Keimah in kikhopna buk le biakna tau ka siangthosak ding a, keima siampi na a sem dingin Aaron le a tapate zong ka siangthosak ding hi.

⁴⁵ Israel mite lakah keimah tengin amau’ Pasian ka hi ding hi.

⁴⁶ Amaute’ lakah keimah ka tenna hangin Egypt leitang panin amaute a paikhiatpih Topa amau’ Pasian ka hihna amaute in hong thei ding uh hi. Kei pen Topa amau’ Pasian ka hi hi.