Paikhiatna 27 - Tedim Bible

Meihal Biakna Tau

¹ “Biakna tau ding singkha sing tawh bawl in. Pi sagih le alang sau-in pi sagih le alang mah na zaisak ding hi. Biakna tau a ning kikim ding a, a tun pi li le alang hi ding hi.

² A kiu lite-ah ki na bawl ding hi. A kite pen a biakna tau tawh sakhat hi ding a, sumngo tawh na zut ding hi.

³ Ama a dingin vut koih nading beelte le kawbiate, kuangte, sikkate le vutluahna peekte na bawl ding a, a nazat khempeuh sumngo tawh na bawl ding hi.

⁴ Ama a dingin siklen, a vang simsiam zong sumngo tawh na bawl ding hi. Siklen tung, a kiu lite-ah sumngo kual li na bawl ding hi.

⁵ Siklen in biakna tau kimciang a batsuk theih nadingin biakna tau zawl nuai panin na bulh ding hi.

⁶ Biakna tau a dingin singkha sing zawlte bawlin sumngo tawh tuate na zut ding hi.

⁷ A kipuak ciangin biakna tau pang nihte-ah a zawlte a om theihna dingin a kualte’ vang sungah a zawlte kikhum ding hi.

⁸ Singpekte tawh kuak nei-in biakna tau na bawl ding a, mualtung a nang tungah hong kilaksa bangin kibawl ding hi.

Biakbuk Tual

⁹ “Biakbuk tual na bawl ding hi. A tual in leitaw lam pangah pang khat a dingin pi za le sawmnga a sau, a kopin a kikhuk khau hoih tawh a kigan a kikhai suk dalna puan nei ding hi.

¹⁰ A khuam sawmnih le a bullen sawmnih pen sumngo tawh a kibawl hi ding a, ahih hangin khuampi tunga vankhainate le a gaknate pen ngun tawh a kibawl hi ding hi.

¹¹ Leilu lampang a ding zong a sauna tua bangmah hi-in, a kikhai suk dalna puan pi za le sawmnga sau ding a, a khuam sawmnih le a bullen sawmnih pen sumngo tawh a kibawl hi ding hi. Ahi zongin khuampi tunga vankhainate le a gaknate pen ngun tawh a kibawl hi ding hi.

¹² Nitumna lam pangah buktual a vailam a dingin khuampi sawm le bullen sawmte tawh pi sawmsagih le nga a sau a kikhai suk dalna puan om ding hi.

¹³ A mailam, nisuahna lam buktual a vailam pi sawmsagih le nga hi ding hi.

¹⁴ Kongpi pang khat-a ding a kikhaisuk dalna puan pi sawmnih le nih le alang hi ding a, khuampi thum le bullen thumte tawh hi ding hi.

¹⁵ A pang langkhatah a kikhaisuk dalna puan pen pi sawmnih le nih le alang hi ding a, khuampi thum le bullen thumte tawh hi ding hi.

¹⁶ Buktual a kongpi dingin a dum, a dupsan, a ausan khau a kopin a kikhuk khau hoihte tawh a kigan, phim tawh kikhui-in a kizem, pi sawmthum a sau kongpuankhai khat om ding a, tua in khuampi li le bullen li nei ding hi.

¹⁷ Buktual kiima khuampi khempeuh ngun tawh kibawl gakna tawh kigak ding a, a vankhainate ngun hi-in a bullente sumngo hi ding hi.

¹⁸ Buktual a dung pi za le sawmnga, a vai pi sawmsagih le nga, a sanna pi sagih le alang hi-in, a kopin a kikhuk khau hoih tawh a kigan a kikhaisuk dalna puan le sumngo bullente tawh hi ding hi.

¹⁹ Biakbuk nazat ding peuhmahte le a khetphimte khempeuh le buktual a khetphimte khempeuh sumngo tawh a kibawl hi ding hi.

Meivak Vilna

²⁰ “Meivak a kuangin a om tawntung theih nadingin mei a vak ding oliv gah a kisuzan, sathau siangtho, Israel mite in nang kiangah hong paipih nadingun thu na pia ding hi.

²¹ Kikhopna buk sung, thuciamna singkuang mai-a dalna puan pualamah, Aaron le ama tapate in nitak a kipan zingsang dong Topa’ mai-ah vil ding uh hi. Tua pen Israel mite in amau’ khang tawntungin a zuih ding uh ngeina kip khat hi ding hi.