Paikhiatna 20 - Tedim Bible

Thupiak Sawmte

¹ Pasian in hih thute khempeuh gen a,

² “Kei pen salsuahna Egypt gam panin note a hong paikhiatpih Topa na Pasian uh ka hi hi.

³ “Keimah longal pasian dang na bia kei ding uh hi.

⁴ “A kiseek milim hitaleh, tunga vantung hitaleh, nuai-a leisung hitaleh, leinuai-a om tui sungah hitaleh a om na khat peuhpeuh a sun khat peuhpeuh note a dingin na bawl kei ding uh hi.

⁵ Tuate’ mai-ah na kun kei ding uh a, tuate na bia kei ding uh hi. Bang hang hiam cih leh keimah note’ Topa Pasian, a aam Pasian ka hi a, kei hong mudahte’ tungah pate’ mawhna tate’ tungah khang thum khang lina dongin thuk-in,

⁶ ahih hangin kei hong itin ka thupiakte a zui mi a tul tampite tungah itna kip a lak pa ka hi hi.

⁷ “Topa note’ Pasian’ min a sia lamin na zang kei ding uh hi. Bang hang hiam cih leh Topa in ama min a zang khialte gim pia ding hi.

⁸ “Sabbath ni a siangtho-a zat ding phawk un.

⁹ Ni guk sung nomau’ na semin na nasep ding khempeuh uh na hih ding uh hi.

¹⁰ Ahi zongin a ni sagih ni pen Topa note’ Pasian’ Sabbath ni ahi hi. Tua ni-in note, na tapate, na tanute, na nasempate, na nasemnute, na ganhing uh ahi a, peemtate in ahi zongin na bangmah na sem kei ding uh hi.

¹¹ Bang hang hiam cih leh a ni guk sung tengin Topa in van le lei, tuipi le tuate sunga om khempeuh bawl a, a ni sagih ni tawlnga hi. Tua ahih ciangin Topa in Sabbath ni thupha pia-in siangthosak hi.

¹² “Topa na Pasian un note hong piak leitang tungah na khan uh a sau theih nadingin na nu le na pa uh zahtak un.

¹³ “Mi na that kei ding uh hi.

¹⁴ “Nulepa mawhna na bawl kei ding uh hi.

¹⁵ “Na na gu kei ding uh hi.

¹⁶ “Na vengte uh langkhatah a man loin teci na pang kei ding uh hi.

¹⁷ “Na vengte uh inn na deihgawh kei ding uh hi. Na vengte uh zi hitaleh, ama nasempa hitaleh, ama nasemnu hitaleh, ama bawngtal hitaleh, ama la hitaleh, na vengte a’ ahi na khat peuhpeuh na deihgawh kei ding uh hi,” a ci hi.

Mite’ Launa

¹⁸ Tu-in mite khempeuh in vangingte, peengkul aw, le mual meikhu thu a theihtel uh ciangin, lau-in a ling uh hi. Amaute a gamla-ah ding uh a,

¹⁹ Moses kiangah, “Nangmah in kote kiangah thu hong gen in; kote in ka ngai ding uh hi. Ahi zongin kote si kha ding ka hih uh ciangin ko tungah Pasian hong gensak kei in,” a ci uh hi.

²⁰ Moses in mite kiangah, “Lau kei un; bang hang hiam cih leh note khialkha loin amah na kihtak theih nadingun note’ tungah a laktel dingin Pasian hong pai ahi hi,” a ci hi.

²¹ Pasian’ omna meii sah nai-ah Moses a pai laitakin mite a gamla-ah a ding uh hi.

Biakna tau tawh kisai Thute

²² Topa in Moses kiangah, “Nangmah in Israel mite tungah hih bangin na gen ding hi: ‘Vantung panin note kong hopihna note mahmah in na thei khin uh hi.

²³ Note in kei tawh nong biakkhop dingun ngun pasian-te le kham pasian-te na bawl kei ding uh hi.

²⁴ Note in keima a dingin lei tawh biakna tau khat bawl unla, tua tungah na meihal biaknate uh le thunuama na biaknate uh, na tuute uh le na bawngtalte uh pia un. Keima min a kiphawk nading munin ka bawlna peuhmahah note kiangah keimah hong pai-in note thupha kong pia ding hi.

²⁵ Note in keima a dingin suang tawh biakna tau na bawl uhleh, a kiseek suang tawh na bawl kei ding uh hi. Bang hang hiam cih leh na nazatte uh tawh na va suk uhleh a ninsak na hi uh hi.

²⁶ Tua tungah na seelsim uh a kidawk khak loh nadingin ka biakna tau tung kahtoh nading kahlei a kulin na sang bawl kei ding uh hi,’ ci in.