Paikhiatna 2 - Tedim Bible

Moses’ Suahna

¹ Tu-in Levi’ suante khat in Levi numei khat mah zi-in la hi.

² Tua numei gai-in tapa khat nei a, nau hoih khat hi, ci-in a muh ciangin, kha thum sung a seel hi.

³ Amah in naungek a seel zawh nawn loh ciangin ama a dingin pumpeeng tawh kibawl lawh khat phansak a, tua lawh pen buan le kultal tui tawh a zut hi. Tua sungah naungek sialin gun gei-a phaikungte lakah a koih hi.

⁴ Amah bang a kicih hiam cih a thei dingin a gamla panin mun khatah a sanggamnu a ding hi.

⁵ Tu-in Faro’ tanu a kisil dingin gun-ah hong pai a, a nasem numeite gun gei-ah a vak lai takun amah in phaikungte lakah a lawh mu a, tua lawh a la dingin a nasem numei khat a sawl hi.

⁶ Amah in a hon ciangin naungek mu hi. Naungek kap ahih manin tua nu in hehpihhuai sa a, “Hih naungek, Hebru mite’ ta khat ahi hi,” a ci hi.

⁷ Tua ciangin a sanggamnu in Faro tanu kiangah, “Keimah pai-in Hebru numeite lak panin nang a dingin naupang hong khoisak dingin naucing khat ka va sapsak ding hiam?” a ci hi.

⁸ Faro’ tanu in ama kiangah, “Va pai in,” a ci hi. Tua ahih ciangin numeino pai-in naupang’ nu va sam hi.

⁹ Faro’ tanu in ama kiangah, “Hih naupang la inla, kei a dingin hong khoisak in; na thaman kong pia ding hi,” a ci hi. Tua ahih ciangin nupi in naupang la-in a khoi hi.

¹⁰ Naupang khang a, amah in Faro tanu’ kiangah paipih a, amah pen tua nu’ tapa a suak hi. Amah in a min Moses a phuak hi. Bang hang hiam cih leh amah in, “Tui sung panin amah ka kai khia hi,” a ci hi.

Midian-ah Moses Tai

¹¹ Ni khat, Moses a khan khit ciangin, ama mipihte kiangah pai-in amau’ gimnate va mu hi. Egypt mi khat in ama mipih Hebru mi khat a sat zong a mu hi.

¹² Amah khuadak kawikawi a, kuamah mu lo ahih manin Egypt mipa thatin sehnel sungah a seel hi.

¹³ A zing ciangin amah paikik a, Hebru mi nih na kilai uh hi. Amah in a gamta khial mipa kiangah, “Bang hangin na lawm sat na hi hiam?” a ci hi.

¹⁴ Amah in dawngin, “Kote’ tungah ulian ding le thukhen dingin kua in nang hong koih ahi hiam? Egypt mipa na thah bangin kei thah ding hong sawm na hi hiam?” a ci hi. Tua ciangin Moses lau a, “A thu hong kithei taktak hi,” ci-in ngaihsun hi.

¹⁵ Faro in tua thu a zak ciangin Moses thah dingin a zong hi. Ahih hangin Faro kiang panin Moses tai-in Midian gam a tung hi. Ni khat amah tuikhuk gei khatah tu hi.

¹⁶ Tua laitakin Midian siampi Jethro in tanu sagih nei hi. Amaute hong pai-in tui tawi uh a, a pa uh’ tuuhonte tui pia dingin kuangzawn dim uh hi.

¹⁷ Tuucing dangte hong pai-in amaute hawlkhia hi. Ahih hangin Moses dingto-in amaute huh a, a tuuhonte uh tui piaksak hi.

¹⁸ A pa uh kiangah amaute a tun ciangun amah in, “A bangci-a tuni-a hong hici ciah baih na hi uh hiam?” a ci hi.

¹⁹ Amaute in, “Egypt mi khat in tuucing dangte’ khutsung panin kote hong honkhia a, ko a dingin tui nangawn hong tawisakin tuuhonte tui pia hi,” ci uh hi.

²⁰ Amah in a tanute kiangah, “Amah koi lai-ah om ahi hiam? Bang hangin tua mipa nusia na hi uh hiam? Amah in an hong nek theih nadingin va sam un,” a ci hi.

²¹ Moses zong tua mipa kiangah om ding lungkim a, amah in Moses tungah a tanu Zipporah a pia hi.

²² Tua nu in tapa khat nei a, amah in a min Gershom a phuak hi. Bang hang hiam cih leh amah in, “Gam dangah peemta ka hi hi,” a ci hi.

²³ Tua zawh kum tampi khit ciangin Egypt kumpipa si hi. Israel mite a salsuahna sung uhah amau’ kikona Pasian kiang tung hi.

²⁴ Pasian in amau’ thumna za hi. Pasian in Abraham, Isaac, le Jakob tawh a thuciamna a phawk hi.

²⁵ Pasian in Israel mite mu a, amaute’ omzia zong a thei hi.