Paikhiatna 13 - Tedim Bible

Tacil Apna

¹ Topa in Moses kiangah,

² “Keima tungah tacil khempeuh hong ap in. Israel mite’ lakah, mihing hitaleh ganhing hitaleh, naubu a hong masa pen peuhpeuh keima-a’ ahi hi,” a ci hi.

Silngo Sawh loh Anlum Pawi

³ Moses in mite tungah, “Salsuahna Egypt gam panin na paikhiat uh hih ni phawk un. Bang hang hiam cih leh Topa in vangliatna tawh hih mun panin note hong paikhiatpih hi. Silngo sawh anlum kine lo ding hi.

⁴ Abib kha, tuni-in note a paikhia na hi uh hi.

⁵ Amah in note tungah piak dinga na pate’ tungah a ciam, bawngnawi le khuaizu a luanna leitang, Kanaan mite, Hit mite, Amor mite, Hiv mite, le Jebus mite’ leitangah Topa in note hong paipih ciangin hih kha sungin hih bangin na hih ding uh hi.

⁶ Note in silngo sawh loh anlum ni sagih sung na ne ding uh a, a ni sagih ni-in Topa pahtawina pawi khat om ding hi.

⁷ Silngo sawh loh anlum ni sagih sung kine ding hi. Note’ tungah silngo sawh anlum kimu lo ding a, note’ huang sung khempeuhah silngo kimu lo ding hi.

⁸ Tua ni-in na tate uh kiangah, ‘Egypt panin ka paikhiat lai-un Topa in ko a’ dinga hong hihsakna hang hi,’ ci-in na gen ding uh hi.

⁹ Na kam un Topa’ Thukham a gen tawntung theih nadingin hih pen na khut tung uhah lim, na taltang tung uhah phawkna khat hi ding hi. Bang hang hiam cih leh Topa in a vangliatna tawh hih mun panin note hong paikhiatpih hi.

¹⁰ Tua ahih ciangin note in a kiseh hunin kum khat pan kum khat, hih biakna ngeina kip na zui ding uh hi.

Tacil

¹¹ “Amah in note le na pate uh tungah a ciam bangin, Topa in Kanaan leitangah note hong paipih hun ciang le note tungah tua gam hong piak ciangin,

¹² note in naubu a hong masa khempeuh Topa a dingin na tuam koih ding uh hi. Na ganhing uh a tacil a pa khempeuh zong Topa a’ hi ding hi.

¹³ La a tacil peuhmah tuuno khat tawh na tanh ding uh hi. Na tat kei ding uhleh a ngawng na kuaitan ding uh hi. Note’ tapate’ lak panin tacil peuhmah na tanh ding uh hi.

¹⁴ Hong pai ding hunah na tapa in, ‘Hih pen bang a cihnopna ahi hiam?’ ci-in nang hong dot ciangin, nangmah in ama kiangah, ‘Salsuahna, Egypt panin Topa in vangliatna tawh kote hong paikhiatpih hi.

¹⁵ Bang hang hiam cih leh Faro in kote paisak ding a nial tentan ciangin Egypt gam sunga tacil khempeuh, mihing tacil le ganhing tacil khempeuh Topa in that hi. Tua ahih ciangin naubu a hong masa a pa khempeuh Topa’ tungah biakna-in ka pia uh hi. Ahih hangin ka tapate uh sung pan tacil khempeuh ka tanh uh hi,’ na ci ding hi.

¹⁶ Tua pen na khut tunga om ciaptehna lim ahih kei leh na mitte’ kikal-a talsuante bang hi ding hi. Bang hang hiam cih leh Topa in a vangliatna tawh Egypt panin eite hong paikhiatpih hi,” a ci hi.

Meii Khuam le Mei Khuam

¹⁷ Faro in mite a paisak ciangin, lampi tom pen hitaseleh, Pasian in Filistia gam tawnin amaute paipih lo hi. Bang hang hiam cih leh Pasian in, “Amaute in gal a tuah ciangin mite kisikin Egypt-ah ciahkik kha ding hi,” a ci hi.

¹⁸ Ahih hangin Pasian in San Tuipi lam manawhin sehnel gam lamah mite kot paipih hi. Israel mite gal a do dingin a kithawisa-in Egypt leitang panin a paito uh ahi hi.

¹⁹ Moses in Josef’ guhte paipih hi. Bang hang hiam cih leh ama guhte a puak ding uh Josef in Israel mite thupi takin kiciamna bawlsak khin hi. “Pasian in note hong hotkhiat ciangin note in hih lai panin keima guhte na pua ding uh hi,” na ci khin hi.

²⁰ Sukkoth panin amaute pai lai uh a, sehnel gam nawl, Etham-ah giahphual sat uh hi.

²¹ Amaute, sun hitaleh zan hitaleh khualzinin a pai theih nadingun sunin amaute lam a lak dingin meii khuam khat tawh, zanin amaute khuavak a pia dingin mei khuam khat tawh, amaute’ mai-ah Topa a pai hi.

²² Sunin meii khuam le zanin mei khuamte, mite’ mai-ah om tawntung hi.