Paikhiatna 11 - Tedim Bible

Tacil Sih nading Kigenkhol

¹ Topa in Moses kiangah, “Faro le Egypt tungah gimna khat ka tungsak lai ding a, tua khit ciangin hih lai mun panin amah in note hong paisak ding hi. Amah in note hong paisak ciangin note hong hawlkhia mang khin ding hi.

² Pasal peuhmah in a vengte kiang pan, numei peuhmah in zong a vengte’ kiang mah panin ngun le kham kizepnate a nget theih nadingun mite’ zakin thu gen in,” a ci hi.

³ Topa in Egypt mite’ muhna-ah mite maipha pia hi. Tua tham loin, mipa Moses pen Egypt leitang tung, Faro’ nasemte’ muhna, le mite’ muhna-ah lian mahmah hi.

⁴ Moses in Faro’ kiangah, “Topa in hih bangin ci hi: Zankim pawlin Egypt mite’ lakah ka pai ding hi.

⁵ Kumpi tokhom tunga tu Faro’ tacil a kipanin an gawina nunga a om nasem numei tacil dong le ganhing tacil khempeuh, Egypt gam sungah tacil khempeuh si ding hi.

⁶ Cikmahin tua bang a om ngei lo, cikmah ciangin zong a omkik ngei lo ding kahna lianpi Egypt leitang tung khempeuhah om ding hi.

⁷ Ahih hangin Egypt mite le Israel mite a kilamdangin Topa in bawl hi, ci-in na theih nadingun Israel mite, mihing hitaleh ganhing hitaleh, ui khat nangawn zong tau lo ding hi, ci hi” a ci hi.

⁸ Tua ciangin Moses in Faro’ kiangah, “Na uliante khempeuh keima kiangah hong paisukin, keima kiangah hong kun ding uh a, ‘Nang le nangmah hong zui khempeuh paikhia un,’ hong ci ding uh hi. Tua khit ciangin kei ka paikhia ding hi,” ci thuah lai hi. Tua ciangin Faro’ kiang panin amah a heh mahmahsa-in a paikhia hi.

⁹ Tua ciangin Topa in Moses kiangah, “Egypt tungah nalamdang tam ka bawl theih nadingin Faro in na thu hong ngai lo lai ding hi,” a ci hi.

¹⁰ Moses le Aaron in hih na lamdangte khempeuh Faro’ mai-ah a bawl uh hi. Topa in Faro’ lungsim khauhsak a, amah in Israel mite a leitang panin paikhiasak lo hi.