Nahum 3 - Tedim Bible

¹ Zuauna le mi thahna tawh a kidim khuapi, van top ding tampi a omna khuapi, tu-in a siacip ding hita hi.

² Ngai un! Sakol kisatna a ging, leengpei kigawi, sakol koplenna kheging, sakol leeng a tuan lauhlauh gingte!

³ Sakol tung tuangte’ galsimna, namsau phia zalzal! Teipi tee zalzal! Misi luanghawmte simzawh ding hi lo, kiciangin vum venvan! Tuate tung mah tawnin gal kido!

⁴ Nineveh khuapi in a paktatna hangin gim thuak hi. Ngaihbaang mel pua-in bum siamna nei a, minamte zolin a khem hi.

⁵ Tua ahih manin Vanglian Topa in hih bangin ci hi: “Nineveh khuapi aw, gim kong pia ding hi. Na nik kong hawkkhiatsak ding a, minamte in na guak omna hong mu ding uh a, na zumhuaina teng hong mu ding uh hi.

⁶ Nang hong huatbawlin ninbulom tawh kong kidimsak ding a, mite in lamdangsakna tawh nang hong en ding uh hi.

⁷ Nang hong mu khempeuh nungkik gaihin, ‘Nineveh khuapi siacip ta hi; kua in khasiat ding ahi hiam?’ ci ding uh hi. Ahi zongin nang a hong hehnem nuam kuamah om lo ding hi,” ci hi.

⁸ Nineveh aw, Thebes khuapi sangin a ginazaw kisa zenzen na hi hiam? Amah zong, a kimkotah tui in umcih a, amah a dal ding nei a, a kulh dingin a kimkotah tui om hi.

⁹ Nail Gun dung, gam khempeuh uk khin ahih manin genzawh lohin a vang lian hi. Put mite le Libya mite zong ama pawl ahi hi.

¹⁰ Tua bang hinapi-in, Thebes khuamite kipuakhia-in sal a suak uh hi. Konglak mun citengah a tate uh kisatlum hi. A miliante, sikkol kibulhin kipuakhia a, amau a man a galte un amaute a hawm uh hi.

¹¹ Nineveh khuapi aw, nang zong zukham bangin khua na phawk kei ding a, na galte kiang panin tai-in bukna na zong ding hi.

¹² Na kulh muanhuaite pen theigah min zun mahmah tawh kibang ding a, a kung sing lecin a gah na kamsung a hong tu tawh kibang ding hi.

¹³ Na galkapte, numei bang hi lel ding a, na galte a lut zawh loh nadingin na gam sung kihu zo lo ding hi. Na kulhkongpi zawlte mei in kangtum ding hi.

¹⁴ Hong ki-umcihna na nan nadingin tui tawi-in na kulhte ciang beh inla, leiseek-a seek dingin buan cilin, leiseekna kuang a baihsa-in nei talecin zong,

¹⁵ tua bang na hih laitakin mei in hong kangtumin galte in hong vatlum ding hi. Kauphe honpite in an a nektum bangin nang na beimang ding hi. Kauphe bangin tampi tak na pha khin uh hi.

¹⁶ Vana aksi sangin a tamzaw sumbawl mi na om khinta uh hi. A kha zalin a leengmang kauphe honpi bangin tu-in amaute om nawn lo uh hi.

¹⁷ Na uliante uh ahihleh, phalbi hun lai-in kulh tungah a bawm miamua, ni a suah ciangin leengkhia mangin, a omna mel a kithei nawn lo kauphe hon tawh kibang uh hi.

¹⁸ Assiria kumpipa aw, na gam sung a ukte si ta a, na uliante ihmu paisuak uh hi. Na mite, mualtung tengah kithehthang a, inn-ah a kaikhawm ding kuamah om nawn lo hi.

¹⁹ Na liammate, a dam theih nading om lo a, na meimate a dam thei lo pawl ahi hi. Na thuakna thu a za mi khempeuh in lungdamin a khut uh beeng ding uh hi. Bang hang hiam cih leh na gitlohna a thuak kha lo kuamah om lo hi.