Nahum 1 - Tedim Bible

Topa’ Phulakna

¹ Hih pen Nineveh khua tawh kisai thu genna hi a, Elkosh khuami Nahum’ maangmuhna a kiciamtehna lai ahi hi.

² Topa Pasian in amah a demte koihkhong lo a, amah a langpangte gim pia-in a galte thukkik hi.

³ Topa lungduai mahmah a, a vang zong lian mahmah a, ahih hangin mimawhte khahkhong ngei lo hi. A paina peuhpeuhah huihpi nungin pingpei kipei a, ama paina hanga leivui leeng meiipi kai tawh kibang hi.

⁴ Amah in tuipi a tai ciangin tuipi kangcip pah a, gunpite zong kangcipsak hi. Bashan gam keugawpin Karmel Mual kausan a, Lebanon Mual a om pakpalhte a vul hi.

⁵ Ama mai-ah mual liante ling a, mual neute a tuisuak hi. Ama mai-ah leitang kicim a, leitung le a tunga om khempeuh a ling uh hi.

⁶ Ama hehna kua in nangzo ding a, ama lunghamna kua in thuakzo ding ahi hiam? A hehna, meikuang bangin hong khahkhia a, ama mai-ah suangtumpite kitamzan hi.

⁷ Topa hoih hi; lungkham hunin a mite huh a, amah a beel mite limtakin a kem hi.

⁸ Tuikhang in a suksiat bangin a langte susiagawp a, a galte khempeuh khuamial sungah a nawtkhia hi.

⁹ Bang hangin Topa sawm ngam na hi hiam? Amah in nang hong susia ding hi. Amah a su peuhpeuh a dingkikzo om ngei lo hi.

¹⁰ Amaute, linglom bangin om uh a, zulesa tawh kidiahin a om laitakun ham bangin kihaltum ding hi.

¹¹ Nineveh khuapi aw, gitlohna tawh thu vaihawmin, Topa a sawm mite, nang’ sungah om hi lo ahi hiam?

¹² Topa in ama mite tungah hih bangin thu gen a, “Assiria mite thahatin a tam mahmah hangin, amaute kisusia-in maimang ding uh hi. No ka mite na hih uhleh, khatvei lai-in kong gimsak khit hangin tu-in note kong gimsakkik nawn kei ding hi.

¹³ Note’ tungah Assiria mite’ aana neihna ka beisak ding a, note hong khihna sikkhaute ka sutat ding hi,” ci hi.

¹⁴ Topa in Assiria mite tawh kisai-in hih bangin thu pia hi: “Note na cimang ding uh a, na pasian-te uh biakinn sunga om milimte ka susia ding hi. Note siahuai lua na hih manun na hankhuk ding uh a bawlbawl ka hi ta hi,” a ci hi.

Nineveh Khuapi A Kiatna ding Thu

¹⁵ En un, mualtungah kamtai pa hong tai a, gualzawhna ding thupha hong gen ding ahi hi. Judah mite aw, pawi bawl unla, Pasian’ tungah na ciam bangun gamta un. Bang hang hiam cih leh migilote kisusiacip khin a, na gam uh hong simkik nawn lo ding hi.