Micah 7 - Tedim Bible

Israel-te’ Gamtatsiatna

¹ Kei a kamsia hi’ng! Singgah le leenggah a heu hun laitakin a gilkial mipa tawh ka kibang hi. Leenggah nek ding om nawn lo a, ka lunggulhgulh theigah beita hi.

² Leitungah mihoihteng bei khinta a, Pasian’ tungah a thuman mi kuamah om nawn lo hi. Mihoihteng si khinta hi. Mi khempeuh in mi thah ding bek ngaihsun uh a, a kuamah peuh in a mipihte thah ding bek hanciam uh hi.

³ A sia lama gamtat ding siam mahmah uh a, uliante le thukhente in sumgolh ngenin, miliante in amau’ deihteng pulak uh a, kipawlin vaihawm khawm uh hi.

⁴ Amaute lakah a hoihpenin a kineite, lingkung bang hi a, a thutang pena kineite, ling hiam bang hi lel uh hi. Pasian in amaute a hilhkholh bangin, gim a piak ding hun hong tungta a, a lungman’ hun ding uh hong hita hi.

⁵ Na vengte’ thu upin nei kei inla, na lawmte zong muanin nei kei in. Na ang a lum na zi kiang nangawnah thu na gen ding kidawm in.

⁶ Tuhun ciangin tapate in a pate haibawl a, tanute in a nute langpan’ uh a, mote in a teeknu uh langneih uh hi. Mi khat a dingin ama innkuanpihte mah a gal a suak mawk hi.

Topa in Khuavak le Suahtakna Pia

⁷ Ahi zongin ke’n ahihleh Topa mah ka en ding a, kei hong suaktasak Pasian ka ngak ding hi. Ka Pasian in ka thu hong ngai ding hi.

⁸ Ka galte aw, kei tungah lungdam kei un. Ka puk hangin ka thokik veve ding hi. Khuamial sungah ka om hangin Topa in khuavak hong pia ding hi.

⁹ Topa tungah khialkhin ka hih manin ama hehna tawlkhat ka thuak ding hi. Ahi zongin a tawpna-ah kei hong huh ding a, a man lopi-in a hong kibawlna teng hong bawlphat sakin, amah in hong honkhia ding hi.

¹⁰ Tua hun ciangin ka galte in hih thu hong mu ding uh a, “Na Topa Pasian, koi-ah om ahi hiam?” ci-in a hong tawng ka galte a maizum ding uh hi. Amaute guallel ding uh a, kongzing buannawng bangin a kisikgawp mu-in, kei ka nuam ding hi.

¹¹ Jerusalem khuamite aw, na khuapi kulh uh a kiciankik ding hun hong tung ding a, tua hun ciangin na gamgi uh nakpitakin kikhan ding hi.

¹² Nisuahna lam Assiria gam pan hitaleh, leitaw lam Egypt gam pan hitaleh, a gamlapi tuipi khen’ pan le a gamlapi mualte- mun khempeuh panin na mite uh hong ciahkik ding uh hi.

¹³ Ahi zongin a tungah a teng mite’ gitlohna hangin, leitung pen sehnel gamkhing a suak ding hi.

Topa in Israel-te A Khasiatna

¹⁴ Topa aw, nangma tuu ahi na mite hong cing in. Gamnuam leihoihna sungah amau guakin om uh hi. Tanglai huna mah bangin, Bashan le Gilead gam nuamah amaute gamtasak in.

¹⁵ Egypt gam pan na paikhiat hun lai uh bangin, amau a dingin a lamdang nate ka bawl ding hi.

¹⁶ Minam dangte in hih thu mu ding uh a, minam thahat hinapi-in a maizum ding uh hi. Lamdang sa-in kam khat zong pau lo ding uh a, hih thu a zakzakna-un a bil uh ngong liang ding hi.

¹⁷ Amaute in gul bangin leivui namin, a bokvak ganhingte bangin hong awmtal ding uh a, a bukna uh munmuanhuaite panin lau-in a lingsa-in hong pusuak ding uh a, Topa Pasian hong kihta ding uh hi.

¹⁸ Topa aw, nang tawh a kibang Pasian dang om lo a, a omlai na mite’ mawhna nangmah in na maisak hi. Nang na heh paisuak kei a, na itna kip nong lak hi.

¹⁹ Kote nong khasiat kik ding a, ka mawhnate uh hong sawpkhiat sakin, tuipi taw-ah nong paihsak ding hi.

²⁰ Ka pu ka pate uh tungah na ciamsa bangin, Abraham’ suanlekhakte ahi nangma mite tungah na cihtakna le nong itna kip nong lak ding hi.