Micah 4 - Tedim Bible

Topa’ Ukkimna Nuam

¹ Mailam hunah Topa’ biakinn a omna mual, a sangpen mual hong suak ding a, minam tampi in hong zuan ding uh hi.

² Minam tampite hong pai-in, “Israel mite’ Pasian’ biakinn, Topa’ mualah va paito ni. Tua lai-ah ama deihna hong hilh ding a, ama deihna bangin i gamta ding hi,” ci ding uh hi. Bang hang hiam cih leh Zion panin thuhilhna hong gingkhia a, Jerusalem panin Topa’ thu hong paikhia hi.

³ Amah in minam tampite’ thu khensak ding a, Israel gam panin a gamla pekah a om, minam vangliante’ thu khensak ding hi. Amaute in a namsaute uh lokhawhna tu-in seek ding uh a, a teipite uh singhiang heuhna temkawi-in seek ding uh hi. Minam khatlekhat kido nawn lo ding uh a, galkidona theikha nawn lo ding uh hi.

⁴ A kuamah peuh lungnuamin a leenggui phung le a theikung nuai-ah tu hithiat ding a, kuamah in patausak nawn lo ding hi. Bang hang hiam cih leh Vanglian Topa mahmah in hih thu hong gen khinta hi.

⁵ Bang hang hiam cih leh midangte in amau’ pasian ciat bia-in a thu mang ding uh a, ahi zongin eite in ahihleh eima Topa Pasian mah a tawntungin bia-in ama thu i mang ding hi.

Salsuahna panin Israel-te A Kihotkhiatna

⁶ Topa in hih bangin ci hi: Keimah in gim ka piak ahi, sala om gimna a thuak mite, ka kaihkhop kik hun hong tung ding hi.

⁷ Amaute, a cimawhin gamlapi-ah om uh a, ahi zongin keimah in amaute pansa kikin, minam vanglian khatin ka bawlkik ding hi. Tua hun a kipan a tawntungin Zion mual panin amaute ka uk paisuak ding hi.

⁸ Pasian in a mite a etna Jerusalem khuapi aw, nidanga na vangliatna na ngahkik ding a, kumpi khuapi na suakkik ding hi.

⁹ Bang hangin tu-in nakpitakin kap a, numei nausuak ding bangin na sa na hi hiam? Kumpi nei lo a, na thulamlakte si ahi hiam?

¹⁰ Jerusalem khuamite aw, numei nausuak ding bangin na tha uh san un. Tu-in kumpi khuapi nusia-in, gam sung khua-ah a teng ding na hita uh a, Babylon khuapi a zuan ta ding na hi uh hi. Ahi zongin tua lai panin note hong kihonkhia-in, na galte uh khutsung panin Topa in hong khahkhia ding hi.

¹¹ Note a hong sim dingin minam tampi hong kikhawm uh hi. Amaute in, “Jerusalem kisusia ding a, i mit in hih khuapi a siasa-in mu ding hi,” a ci uh hi.

¹² Ahi zongin hih minamte in Topa’ lungsim tawng thei lo uh a, ancilna phualah anphalte kaihkhop bangin amaute kaikhawmin, a cilgawp ding ahihlam phawk lo uh hi.

¹³ Topa in hih bangin ci hi: Jerusalem khuamite aw, kipan unla, na galte uh sugawp un. Sumngo khe le sik ki a nei bawngtal bangin note kong thahatsak ding hi. Minam tampite na sugawpzo ding uh a, amau’ neihsa teng keima-a’ na suaksak ding uh a, amau’ hauhna teng leitung buppi’ Topa’ neihsa na suaksak ding uh hi.