Mattiu 4 - Tedim Bible

Jesuh A Kize-etna

¹ Tua ciangin Dawimangpa’ ze-etna a thuak dingin Kha Siangtho in gamlakah Jesuh a paipih hi.

² Jesuh in sun sawmli le zan sawmli sung an ne loin omkhin ahih manin a gil a kial hi.

³ Tua ciangin ama kiangah Dawimangpa hong pai a, “Pasian’ Tapa na hih takpi le hih suangte anlum a suah nadingin thu pia in,” a ci hi.

⁴ Ahi zongin Jesuh in, “Lai Siangtho sungah, ‘Anlum bek tawh mite nungta lo a, Pasian genkhiat thute tawh nungta zaw hi,’ ci-in kigelh hi lo ahi hiam?” ci-in a dawng hi.

⁵ Tua ciangin Dawimangpa in gamlak panin Jerusalem khua-ah Jesuh paipih a, biakinn khumzang a sangpen munah a kahtohpih khit ciangin,

⁶ “Pasian’ Tapa taktak na hih le Lai Siangtho sungah, ‘Pasian in nang a hong kem dingin a vantung mite hong sawl ding hi. Na khete le suang a kitahkhak loh nadingin vantung mite in a khut uh tawh nang hong dom ding hi,’ ci-in kigelh ahih manin, hih lai panin tuaksuk in,” a ci hi.

⁷ Jesuh in, “Lai Siangtho mahah, ‘Na Topa Pasian na ze-et kei in,’ ci-in gen hi lo ahi hiam?” ci-in a dawng hi.

⁸ Tua ciangin Dawimangpa in mual sang mahmah khatah Jesuh paipihto a, leitung kumpi gam khempeuh le a hoihna teng a lah khit ciangin,

⁹ “Ka mai-ah kunin kei hong bia lecin hihte khempeuh nangma tungah kong pia ding hi,” a ci hi.

¹⁰ Jesuh in, “Satan aw, taikhia in. Lai Siangtho in, ‘Na Topa Pasian bek bia inla, ama na bek sem in,’ ci hi lo ahi hiam?” ci-in a dawng hi.

¹¹ Tua ciangin Dawimangpa paikhia a, vantung mite hong pai-in Jesuh huhin an a vak uh hi.

Jesuh in Galilee gamah A Nasep Kipan

¹² Jesuh in Johan a kimatna thu a zak ciangin Galilee gam sungah va kihem hi.

¹³ Galilee gam Nazareth khua-ah omsuak loin paikhia leuleu a, Zebulun le Naftali gam sung Galilee Tuili gei-a om Kapernaum khua-ah a va teng hi.

¹⁴ Tua bangin a va tenna pen kamsangpa Isaiah thugen a tun nading ahi hi. Tua a genna-ah,

¹⁵ “Gentail mite’ tenna Galilee gam sung, Jordan Gun galkhat, Tuipi lampangah a om Zebulun le Naftali gam!

¹⁶ Khuamial sunga a teng mite in khuavak lianpi mu ding uh hi. Sihna gam khuamial sungah a teng mite tungah khuavak hong taang ding hi,” ci hi.

¹⁷ Tua hun a kipan Jesuh in thuhilh ding kipan a, “Vantung ki-ukna hong naita ahih manin kisikin na omzia uh kheel un,” ci-in thu a hilh hi.

Jesuh in Ngabeng Mi Li Sam

¹⁸ Galilee Tuili gei-ah Jesuh a pai laitakin ngabeng Peter a kici Simon le a nau Andru, ngen tawh nga khuhin a om a mu hi.

¹⁹ Jesuh in amaute kiangah, “Kei hong zui un; nga mat bangin pawl tampi a ngah thei mi kong suaksak ding hi,” ci hi.

²⁰ Amau tegel in zong a ngente uh nusia-in Jesuh a zui pah uh hi.

²¹ Tua lai panin a paikhiat khit uh ciangin Zebedi tapa James le Johan-te unau, a pa uh tawh gunkuang sungah ngen puahin a om mu leuleu a, amau tegel zong a sam hi.

²² Amau tegel in zong gunkuang le a pa uh nusia-in Jesuh a zui pah uh hi.

Jesuh in Mihonpi tungah Na Sem

²³ Galilee gam sung khempeuhah Jesuh pai kawikawi a, amau’ kikhopna innte-ah thu hilhin, vantung ki-ukna hangin lungdamna thute hilh a, natna tuamtuam a nei cina khempeuh a damsak hi.

²⁴ Syria gam sung khempeuhah ama thu kizel ahih manin dawivei mi, sibup mi, khutzaw khezaw mi a kipanin natna satna a tuamtuam a nei mi khempeuh ama kiangah hong kipuak a, amah in a vekpi-in a damsak hi.

²⁵ Galilee gam, Khuapi Sawmte gam, Jerusalem khua, Judea gam le Jordan Gun galkhat gam panin mi tampi tak in Jesuh a zui uh hi.