Mattiu 27 - Tedim Bible

Jesuh, Pilat Mai-ah

¹ A zingsang ciangin siampi liante le upate in Jesuh a thah nading uh a vaihawm uh hi.

² Sikkhau tawh khihin paipih uh a, tua gam sungteng a uk Pilat mangpa khut sungah a ap uh hi.

Judas A Sihna

³ A lehhek pa Judas in Jesuh a si dingin thu a kikhenna a muh ciangin kisikkik ahih manin siampi liante le upate kiangah a ngun peek sawmthumte va paipih kik a,

⁴ “Mawhna a nei lo mipa a si dingin lehhek kha ka hih manin ka mawh hi,” a va ci hi. Ahi zongin amaute in, “Kote tawh bang kisai nawn ding ahi hiam? Nangma tavuan ahi hi,” a na cihsan uh hi.

⁵ Tua ciangin amah in biakinn sungah a ngun peekte lawnin paikhia a, amahmah a gui-awk hi.

⁶ Ahi zongin siampite in tua ngun peekte tawm uh a, “Hih sumte pen mi thah nadingin a kipia sum ahih manin biakinn sumkholna-ah koih dingin kilawm lo hi,” a ci uh hi.

⁷ Tua ahih manin amaute a kikup khit uh ciangin khualmi a site a kivui nadingin beelseek pa’ lo a lei uh hi.

⁸ Tua ahih manin tu dongin tua lo pen, “Mi Thahna Lo,” a kici hi.

⁹ Tua ahih manin kamsang Jeremiah in, “Israel mite pawlkhat in ama man dingin a seh tua ngun peek sawmthum la uh a,

¹⁰ Topa in kei tungah a hong gen mah bangin, beelseek pa’ lo lei nadingin a pia uh hi,” ci-in a genkholhna a tung ahi hi.

Pilat in Jesuh Thu Dong

¹¹ Tu-in gam ukpa Pilat mai-ah Jesuh kidingsak ahih manin amah in, “Nang, Jew mite’ Kumpipa na hi hiam?” ci-in a dot ciangin Jesuh in, “Nang zong tua mah nong ci hi,” ci-in a dawng hi.

¹² Ahi zongin siampi liante le upate in mawhsakna thu a gen hangun Jesuh in a dawng kei hi.

¹³ Tua ciangin Pilat in Jesuh kiangah, “Amaute in nang a hong mawhsaknate za lo na hi hiam?” a ci hi.

¹⁴ Ahi zongin Jesuh in amah a kimawhsaknate kam khat beek dawng het lo ahih manin Pilat in lamdang a sa mahmah hi.

Jesuh a Si dingin Thu Kikhen

¹⁵ Paisan Pawi hun simin Rom gam ukpa in mihonte’ deih thongkia mi khat a khah a ngeina ahi hi.

¹⁶ Tua hun laitakin a gilo mahmah Barabbas a kici mi khat thongkia-in a om hi.

¹⁷ Tua ahih manin mihonte hong kikhop ciangin Pilat in amaute kiangah, “Barabbas le Khrih a kici Jesuh, koizaw ka khah ding deih na hi uh hiam?” ci-in a dong hi.

¹⁸ Bang hang hiam cih leh Jesuh a hazat man bekun ama kiangah a paipih ahihna thu teltakin a thei hi.

¹⁹ Tua banah, thukhen zumah thusitin a om hunsung mahun, a zi in thu zasak a, “Tuzan ka mang sungin ama hangin nakpitakin gimna thuak ka hih manin, mawhna nei lo tua mipa bangmah cihkha kei in,” a ci hi.

²⁰ Barabbas khahin Jesuh a thah nadingin Pilat kiangah a nget nadingun siampi liante le upate in mihonte a hanthawn uh hi.

²¹ Tua ciangin Rom gam ukpa in mihonte kiangah, “Hih mi nihte, koi pen ka khah ding deih na hi uh hiam?” ci-in a dot leuleu ciangin amaute in, “Barabbas,” a ci uh hi.

²² Tua ciangin Pilat in, “Tua ahihleh Khrih a kici Jesuh pen bangcih ding ka hi hiam?” a cih ciangin amaute khempeuh in, “Singlamteh tungah thatsak in,” a ci uh hi.

²³ Tua ciangin amah in, “Amah in bang gamtat khialhna nei ahi hiam?” ci-in a dot ciangin, “Singlamteh tungah thatsak in,” ci-in a awng ngeingai uh hi.

²⁴ A gengen hangin bangmah phattuamna om loin buaina piangzaw kha ding, ci-in Pilat in a theih ciangin, tui la-in mihonpi’ muhin a khut sil a, “Hih mipa a sihna thu-ah kei ka kihel kei hi. Note in thei ta un,” a ci hi.

²⁵ Tua ciangin mi khempeuh in, “Hih mipa’ sihna hangin gimthuakna, kote a kipanin ka suan ka khakte dongun ka thuak ding uh hi,” ci-in a dawng uh hi.

²⁶ Tua ciangin amaute’ deihna bangin Barabbas khah a, Jesuh ahihleh a sat khit ciangin singlamteh tungah thah dingin a piakhia hi.

Galkapte in Jesuh Simmawh Bawl

²⁷ Tua ciangin Pilat’ galkapte in ama omna kumpi inn-ah Jesuh paipih uh a, tua lai-ah galkap khempeuh a hong kikaikhawm uh hi.

²⁸ Tua lai panin Jesuh’ puan suahkhiatsak uh a, puansan khat a silhsak uh hi.

²⁹ Kumpi lukhu lim dingin ling vialin a lu-ah khusak uh a, a khut taklamah pumpeeng khat a tawisak uh hi. Tua ciangin ama mai-ah khukdin uh a, “Jew mite’ Kumpipa aw,” ci-in zahpihna tawh a hopih uh hi.

³⁰ Tua ciangin cilphih uh a, a pumpeeng tawisak uh la-in a lutang a sat uh hi.

³¹ Tua bangin a simmawh bawl khit uh ciangin a puansan silhsak uh suahkhia leuleu-in ama puan mah silhsakkik uh a, singlamteh tungah thah dingin a paikhiatpih uh hi.

Singlamteh tungah Khaina

³² Tua bangin a pai laitakun Sairin khuami Simon kici mi khat tawh kituak uh a, amah lammatin Jesuh’ singlamteh a puasak uh hi.

³³ Lutang guh a cihnopna Golgotha a kici mun a tun uh ciangin,

³⁴ zatui kha tawh a kihel leenggahzu a dawn dingin a pia uh hi. Ahi zongin Jesuh in a ciapkhit ciangin a dawn nuam kei hi.

³⁵ Singlamteh tungah Jesuh a khai khit uh ciangin a puante kua in a koi ngah ding cih a theih nadingun suang lawnin ai san uh a, a puan teng a hawm uh hi.

³⁶ Tua ciangin amaute tu-in Jesuh a en uh hi.

³⁷ Tua ciangin amah a mawhsakna uh, “Hih pa, Jew mite’ Kumpi Jesuh ahi hi,” cihna lai gelhin ama lutang sanah a suang uh hi.

³⁸ Tua ciangin mi that nih, Jesuh’ taklamah khat, a veilamah khat tawh zong a khaikhawm uh hi.

³⁹ Tua ciangin amah a va mukha mi peuhmah in a lu uh peisanin,

⁴⁰ “Biakinn susia-in ni thum sungin a lamkik ding pa aw, nang le nang kihonkhia in. Pasian’ Tapa na hihtakpi leh singlamteh tung panin hong kumsuk in,” ci-in a zahko uh hi.

⁴¹ Tua bangmahin siampi liante in Thukham hilh siate le upate tawh zahko-in,

⁴² “Amah in midangte honkhia thei napi-in amahmah kihonkhia thei lo hi. Amah, Israel mite’ Kumpi ahi hi. Tu-in singlamteh tung panin hong kumsuk leh i um ding hi.

⁴³ Amah in, ‘Kei, Pasian’ Tapa ka hi hi,’ ci ahih manin, amah in Pasian muanin a nei hi. Pasian in a hotnop leh tu-in honkhia ta hen,” a ci uh hi.

⁴⁴ Tua mah bangin amah tawh a kikhai khawm mi thatte in zong a zahko uh hi.

Jesuh’ Sihna

⁴⁵ Sun nai sawm le nih hun a kipanin nitak nai thum dong, nai thum sung, tua gam sung khempeuhah khim a zing hi.

⁴⁶ Nitak nai thum hun pawl laitakin Jesuh nakpitakin kiko a, “Ka Pasian, ka Pasian, bang hangin kei hong nusia na hi hiam?” a cihna ahi, “Eloi, Eloi, lama sabakthani,” a ci hi.

⁴⁷ A gei-ah a om a pauna a za mite pawlkhat in, “Hih mipa in Elijah a sam ahi hi,” a ci uh hi.

⁴⁸ Tua ciangin amaute khat va tai-in tuihupna la-in leenggahzu-hau sungah a diahkhit ciangin pumpeeng dawnah henin Jesuh’ hup dingin a tahto hi.

⁴⁹ Ahi zongin adangte in, “Khawl dih un; amah a honkhia dingin Elijah hong pai hiam ngak dih ni,” a ci uh hi.

⁵⁰ Tua ciangin Jesuh nakpitakin kiko kikin a si ta hi.

⁵¹ Tua laitakin biakinn sung deina puan, a lu panin a taw dongin kikekin phelnih a suak hi. Zin zong lingin suangtumpite kitam hi.

⁵² Hankhukte zong kihong a, Pasian’ mi a sisa tampite zong kithokiksak hi.

⁵³ Hankhuk panin amaute paikhia uh a, sihna panin Jesuh a thawhkik khit ciangin, amaute zong khuapi siangtho sungah hong lut uh a, mi tampi in a mu uh hi.

⁵⁴ Jesuh enin a om galkap bupa le galkapte in zinlinna le a thupiangte a muh uh ciangin lamdangsa mahmah uh a, “Hih pa, Pasian’ Tapa taktak mah ahi hi,” a ci uh hi.

⁵⁵ Galilee gam panin Jesuh hong zui-in amah a huh, a gal et numei tampi zong a om hi.

⁵⁶ Tua numeite lakah Magdala khuami Mary, James le Josef’ nu Mary, le James le Johan’ nu ahi, Zebedi’ zi, a kihel uh ahi hi.

Jesuh A Kivuina

⁵⁷ A nitak ciangin Arimathea khuami, Jesuh thu a um, mihau ahi Josef a kici mi khat,

⁵⁸ Pilat kiangah va pai-in Jesuh’ luang a va ngen hi. Pilat in Josef’ ngetna bangin Jesuh’ luang a kipiak nadingin thu a pia hi.

⁵⁹ Josef in zong Jesuh’ luang la-in, dialpuan thak tawh a tun khit ciangin,

⁶⁰ suang a kikhuak thak ahi ama hankhuk sungah a vui hi. Tua ciangin suangtum lianpi khat hualin a han kongvang hucipin a ciah hi.

⁶¹ Magdala khuami Mary le adang Mary zong a hankhuk mai ngatin a tu uh hi.

Han Cingte

⁶² A zing ciang, Sabbath ni-in Pilat kiangah siampi liante le Farisi mite hong pai uh a,

⁶³ “Topa aw, hih mi khem pa in a nuntak lai-in, ‘Ni thum khit ciangin ka hingkik ding hi,’ ci-in a thugenna ka thei uh hi.

⁶⁴ Tua ahih ciangin ni thum sung a han hoihtakin a kicin nadingin thu pia in. Tua hikeileh a nungzuite in a luanghawm gukhia-in mite kiangah, ‘Sihna panin hingkik khin hi,’ cikha ding uh ahih manin a mi khem masakna uh sangin a khem nunungna uh hong husiazaw lai kha ding hi,” a ci uh hi.

⁶⁵ Pilat in amaute kiangah, “Galkapte cingsak unla, a muanhuai theithei dingin na siam bangun hih un,” a ci hi.

⁶⁶ Tua ahih ciangin amaute pai uh a, a han hukna suang limtakin a ciamteh khit uh ciangin galkapte a cingsak uh hi.