Mattiu 26 - Tedim Bible

Makaite in Jesuh Thahsawm

¹ Jesuh in hih thute a hilh khit ciangin a nungzuite kiangah,

² “Na theihsa uh mah bangin tuzawh ni nih khit ciangin Paisan Pawi hun hong tungta ding hi. Tua ciangin singlamteh tungah thah dingin Mihing Tapa kipia ding hi,” a ci hi.

³ Tua ciangin siampi lianpen Kaiafas inn-ah siampi liante le upate kikhawm uh a,

⁴ kuama theih lohin Jesuh simmatin a thahtheih nading uh a vaihawm uh hi.

⁵ Amaute in, “Buaina lianpi hong omkha thei ding ahih manin hih pawi hun sungin hih kei ni,” a ci uh hi.

Bethany khua-ah Jesuh Sathau Kinilh

⁶ Bethany khua-a miphak ahi ngei Simon inn-ah Jesuh a om laitakin,

⁷ numei khat in a manpha mahmah sathau namtui suangngo thawl a dim khat hong tawi-in Jesuh kiangah hong pai a, Jesuh an ne-in a tut laitakin a lu tungah a buaksuk hi.

⁸ Ahi zongin nungzuite in a muh uh ciangin heh uh a, “Bang hangin hih sathau namtui mawk beisak ahi hiam?

⁹ Hih sathau kizuak leh sum tampi tak kikhawng ding a, mizawngte huhna-in kipia thei ding hi,” a ci uh hi.

¹⁰ Ahi zongin Jesuh in hih thu phawk ahih manin amaute kiangah, “Hih numei bang nuammawh na hi uh hiam? Kei tungah a kilawm mahmahin amah hong gamta hi.

¹¹ Mizawngte pen note tawh hong omkhawm tawntung ding a, ahi zongin note tawh kei ka hong omkhawm tawntung kei ding hi.

¹² Keima tungah hih bangin sathau hong buak ciangin ka luanghawm kivui nadingin a hong bawlbawl ahi hi.

¹³ Note kiangah a mantak a kong genin-ah: Keima hangin a piang ding lungdamna thu a kigenna leitung khempeuhah hih numei kiphawkin a gamtatnate kigengen ding hi,” a ci hi.

Jesuh Lehhek ding Judas Thukim

¹⁴ Tua ciangin sawm le nihte sung panin Iskariot’ tapa Judas a kici mipa siampi liante kiangah va pai a,

¹⁵ “Note’ khut sungah amah hong pia leng, note in kei bang tawh hong guai ding na hi uh hiam?” a cih ciangin ngun peek sawmthum a pia uh hi.

¹⁶ Tua hun a kipanin amah a lehhek theih nading hunhoih a zongpah hi.

Jesuh in A Nungzuite tawh Paisan Pawi An Ne

¹⁷ Silngo Sawh loh Anlum Pawi a kipat ni-in nungzuite in Jesuh kiangah, “Paisan Pawi annek ding koilai takah hong bawlsak le ung deih na hi hiam?” ci-in a dong uh hi.

¹⁸ Jesuh in, “Jerusalem khua sungah va pai unla, tua mipa kiangah, ‘Siapa in, “Ka hun hong naita hi. Na inn-ah ka nungzuite tawh Paisan Pawi an ka hong ne ding uh hi,” ci hi,’ va ci un,” a ci hi.

¹⁹ Nungzuite zong Jesuh gen bangin gamta uh a, Paisan Pawi an ding a bawl uh hi.

²⁰ A nitak ciangin Jesuh le sawm le nihte an ne dingin a tukhawm uh hi.

²¹ Amaute an ne-in a om laitakun Jesuh in, “Note khat in kei na hong lehhek ding uh hi,” a cih ciangin

²² amaute dah mahmah uh a, amaute in a banbanin, “Topa aw, kei ka hi hiam?” ci-in a dong uh hi.

²³ Jesuh in, “Ankuang ka sawk khawmpih pa in kei hong lehhek ding hi.

²⁴ Mihing Tapa ahihleh Lai Siangtho sungah a kigelhsa mah bangin a si ding ahi hi; ahi zongin Mihing Tapa a lehhek pa in gimna thuak ding hi. Tua mipa pen a piang vet lo hileh ama a dingin hoihzaw ding hi,” a ci hi.

²⁵ Jesuh a lehhek pa Judas in, “Topa aw, kei ka hi hiam?” a cih ciangin, “Na ci khin hi,” ci-in Jesuh in a dawng hi.

Nekkhawm Bawlna A Pianna

²⁶ Tua bangin an a nek laitakun, Jesuh in anlum la-in lungdamna a kohkhit ciangin balnen a, a nungzuite kiangah pia-in, “La unla ne un; hih pen ka pumpi ahi hi,” a ci hi.

²⁷ Tua ciangin hai la a, lungdamna a kohkhit ciangin amaute tungah pia-in, “Na vekpi-un dawn un.

²⁸ Mi tampite’ mawhna a mai nadingin a luangkhia, Pasian’ thuciamna a kipsak, ka sisan ahi hi.

²⁹ Note kiangah kong genin-ah: Ka Pa’ Ukna sungah note tawh leenggahzu thak ka dawnkik ni matengin leenggahzu ka dawnkik nawn kei ding hi,” a ci hi.

³⁰ Tua ciangin la khat sa uh a, Oliv Mual tungah a pai uh hi.

Peter’ Nial ding Kigenkhol

³¹ Tua ciangin Jesuh in amaute kiangah, “Lai Siangtho sungah, ‘Tuucingpa ka satlum ding a, a tuute kithehthang ding hi,’ ci-in a kigelh mah bangin note khempeuh in tu nitakin kei na hong taisanmang khin ding uh hi.

³² Ahi zongin hong kithawh kiksak khit ciangin Galilee gam sung note mai-ah ka pai ding hi,” a ci hi.

³³ Peter in, “Adang khempeuh in hong taisan zongin ke’n kong nusia ngei kei ding hi,” a ci hi.

³⁴ Jesuh in, “Tuzan mahmahin ak a khuan’ ma-in kei, thumvei tak na hong nial ding lamtak phawk in,” a ci hi.

³⁵ Ahi zongin Peter in, “Nang tawh sihkhawm nading ciang dong ahi zongin kong nial ngei het kei ding hi,” a ci veve hi. Tua mah bangin nungzui dang khempeuh in zong a ci ciat uh hi.

Gethsemane-ah Jesuh in Thu Ngen

³⁶ Tua ciangin Jesuh a nungzuite tawh Gethsemane a kici munah pai-in amaute kiangah, “Hua lamah pai-in thu ka va nget kal sungteng hih lai-ah na om un,” a ci hi.

³⁷ Tua ciangin Peter le Zebedi tapa tegel tonpih a, dahin a lunggim hun ding a kipan hi.

³⁸ Amaute kiangah, “Ka lungsim dahna hangin ka si dektak hi. Hih lai-ah na om unla hong ngak un,” a cih khit ciangin

³⁹ tawmkhat pai lai-in leilakah bokin thu ngen a, “Pa aw, ahi thei ding ahihleh hih thuak nading tawh hong kipelhsak in. Ahi zongin kei’ deihna bang hi loin nangma deihna bang hizaw ta hen,” a ci hi.

⁴⁰ A nungzui thumte kiangah hong paikik ciangin amaute na ihmu uh hi. Amah in Peter kiangah, “Nai khat sung nangawn hong ngakzo lo liang na hi uh hiam?

⁴¹ Ze-etna-ah na puk khak loh nadingun thu ngen un. Lungsim in ze-etna nang nuam napi-in pumpi in nangzo lo hi,” a ci hi.

⁴² Tua ciangin a nihveina va paikikin thu ngen a, “Pa aw, keima thuak lohin ahi thei lo ding ahihleh nangma deihna bang hi ta hen,” a ci hi.

⁴³ A nungzuite kiangah hong paikik ciangin, a ihmut uh suaklua mahmah ahih manin na ihmu leuleu uh hi.

⁴⁴ Tua ahih manin amaute kiang panin paikhia kikin, a kibang mahin a thumveina thu a ngen hi.

⁴⁵ Tua ciangin a nungzuite kiangah hong paikik a, “Ihmu-in tawlnga hithiat lailai na hi uh hiam? Mawhnei mite’ khut sungah Mihing Tapa a kipiak ding hun hong tungta hi.

⁴⁶ Tho un, pai ta ni. Kei hong lehhek ding pa hong naita hi,” a ci hi.

Jesuh a Kilehhekna le a Kimatna

⁴⁷ Tua bangin Jesuh in thu a gen laitakin sawm le nihte sung panin Judas hong tung a, siampi liante le upate in a hong sawl, namsau le molhtum a tawi mihonpi tawh hong tonkhawm hi.

⁴⁸ A lehhek pa in mihonte kiangah thu na ma gen a, “Ka nap pen pa amah hi ding hi; man un,” ci-in a lim ding a hilhkhol hi.

⁴⁹ Judas zong Jesuh kiangah hong paipahin, “Topa aw, thupha ngah ta in,” ci-in hopihin limnap mahmah hi.

⁵⁰ Jesuh in, “Lawm aw, hih dingin na ngim pen hihpak in,” ci-in a dawng hi. Tua ciangin mihonte in Jesuh manin a lencip uh hi.

⁵¹ Jesuh tawh a omkhawm mite khat in a namsau dokin siampi lianpen pa’ nasempa a sat leh, a bil a satkhia hi.

⁵² Tua ciangin Jesuh in ama kiangah, “Na namsau a paai-ah siatkik in. Namsau a zangte namsau mah tawh si ding hi.

⁵³ Ka Pa kiangah ngen hi leng, vantung galkapte hon sawm le hon nih val, thakhat thu-in hong puakpah theih ding lamtak thei lo na hi hiam?

⁵⁴ Tua bangin kivaikhak hi zenzen leh Lai Siangtho in tu-a bangin a pian nading a gen pen bangci tuntheih ding ahi hiam?” a ci hi.

⁵⁵ Tua ciangin Jesuh in mihonte kiangah, “Gal le sa bangin hong ngaihsun a, keimah a man dingin namsau le molhtum tawh hong kuan na hi uh hiam? Nisimin biakinn sungah thu ka hilh niloh a, ahi zongin kei nong man kei uh hi.

⁵⁶ Ahi zongin Lai Siangtho sungah kamsangte’ thugente a tuntheih nadingin hih bangin a hong gamta na hi uh hi,” a ci hi. Tua ciangin a nungzuite khempeuh in Jesuh nusia-in a taisan uh hi.

Jesuh, Uliante Mai-ah

⁵⁷ Tua ciangin Jesuh a man mite in siampi lianpen pa Kaiafas kiangah hong paipih uh a, tua lai-ah Thukham hilh siate le upate a kikhawm uh hi.

⁵⁸ Peter in siampi lianpen pa’ inntual ciang dong Jesuh’ nung galzuih a, bang thu a piang hiam cih a theih nadingin inntualah palikte kiangah a om hi.

⁵⁹ Siampi liante le uliante in Jesuh a thahtheih nadingun zuau teci a pang ding mi a zong uh hi.

⁶⁰ Teci tampi in hong gen hangin thahtheih nading zuau teci pang ding kimu lo hi. A tawpna ciangin mi nih in thu hong gen a,

⁶¹ “Hih mipa in, ‘Pasian’ Biakinn susia-in ni thum sungin ka lamkik thei ding hi,’ ci hi,” a hong ci uh hi.

⁶² Tua ciangin siampi lianpen pa hong dingin, “Hih hong mawhsakna thu tawh kisai-in na gen ding om lo ahi hiam?” ci-in a dot hangin

⁶³ Jesuh pau loin a om hi. Tua ciangin siampi lianpen pa in, “Pasian’ Tapa, Khrih na hih leh na hihloh nong gen nadingin a nungta Pasian’ min tawh khauhtakin ka hong sawl hi,” a ci hi.

⁶⁴ Tua ciangin Jesuh in, “Nangmah in tua mah na ci khin hi. Ahi zongin note khempeuh kiangah ka hong genin-ah: Vanglianpa’ taklamah Mihing Tapa omin meii tungah a hong pai na mu ding uh hi,” a ci hi.

⁶⁵ Tua ciangin siampi lianpen pa in a puan balkek a, “Pasian’ tungah a paukhial zo hi. Bang thudang kisam nawn ahi hiam? A paukhialhna na za uh hi.

⁶⁶ Note in tu-in bangci ngaihsut na hi uh hiam?” ci-in a dot ciangin amaute in, “Thah dingin a kilawm hi,” ci-in a dawng uh hi.

⁶⁷ Tua ciangin amaute in a maitang cilphih uh a,

⁶⁸ “Nang Khrih aw, kua in hong beeng ahi hiam, hong gen dih in,” a ci uh hi.

Peter in Jesuh Nial

⁶⁹ Tua bangin inntualah Peter a tut laitakin siampi lianpen pa’ nasem numei khat in ama kiangah, “Nang zong Galilee mi Jesuh tawh a kikhawl na hi hi,” a ci hi.

⁷⁰ Ahi zongin Peter in nial a, “Na thugen ka thei kei hi,” ci-in a dawng hi.

⁷¹ Tua ciangin Peter zong inntual pualamah a paikhiat leh numei dang khat mah in mu ahih manin a gei-a omte kiangah, “Nazareth khuami Jesuh tawh hih mipa kikhawl hi,” a ci hi.

⁷² Peter in zong nialkik a, “Hua mipa ka theih taak leh,” ci-in a kiciam hi.

⁷³ Tuazawh a sawt loin a gei-a omte khat in Peter kiangah, “Na kampau zia uh kibang ahih manin nang zong hua mite tawh a kipawl mah na hi takpi hi,” a ci leuleu hi.

⁷⁴ Tua ciangin Peter kiciam a, “Hua mipa ka thei kei hi. Zuauthu ka gen taak leh Pasian in kei hong dawm kei ta hen!” a ci hi. Tua khitzawh phetin ak hong khuangta hi.

⁷⁵ Tua ciangin, “Ak a khuan’ ma-in kei thumvei na hong nial ding hi,” ci-in Jesuh in a gen thu, Peter in phawkkik ahih manin paikhia-in nakpitakin a kap hi.