Mattiu 19 - Tedim Bible

Kimakna tawh kisai Jesuh’ Genna

¹ Jesuh in a thugen a man khit ciangin Galilee gam panin paikhia-in Judea gam Jordan gun galkhatah a pai hi.

² Mihon tampi in amah zui uh a, tua munah cinate a damsak hi.

³ Farisi mite pawlkhat Jesuh kiangah hong pai uh a, amah a mawhsak theih nading uh a deihna-un, “Thu khat peuhpeuh hangin zi maktheih ding mah ahi hiam?” ci-in a dong uh hi.

⁴ Jesuh in, “Lai Siangtho sungah, ‘A kipat cil-in a Piangsak pa in numei le pasal a bawl hi,’ ci hi.

⁵ Tua ciangin, ‘Hih thu hangin pasal in a nu le a pa nusia-in a zi tawh kigawm ding a, amau tegel pumkhat a bang ding uh hi,’ ci-in na kigelh hi.

⁶ Tua ahih manin amaute nih hi nawn loin khat ahi ta uh hi. Tua ahih manin Pasian in a gawmsa mite, kuamah in khen kei ta hen,” ci-in a dawng hi.

⁷ Tua ciangin Farisi mite in, “Tua ahihleh bang hangin Moses in mi khatpeuh makna lai gelh sakin a zi masak thei ahi hiam?” ci-in a dot uh ciangin

⁸ Jesuh in, “Note, hilhzawhin na om loh manun Moses in hih bangin ngeina a omsak thei ahi hi. Ahi zongin a kipat cil-in tua bang na hi lo hi.

⁹ Note kiangah kong genin-ah: Mi khatpeuh in midang tawh a zi a mawhna lobuang, a zi a mak a, numei dang tawh a ten leh numei tunga mawh ahi hi,” ci-in a dawng hi.

¹⁰ Tua ciangin a nungzuite in Jesuh kiangah, “Nupa thu tua bang ding ahihleh kiteng vet kei lehang hoihzaw ding hi,” a ci uh hi.

¹¹ Ahi zongin Jesuh in, “Hih ngeina pen mi khempeuh in a zuihzawh ding hi lo a, Pasian in a tuaci dingin a sehte bek in a zuizo ding uh ahi hi.

¹² Mi pawlkhat a pianpihin gehsa bang om a, pawlkhatte a kigettawm om a, pawlkhatte pen vantung ki-ukna hangin geh bangin a om hi. Geh bangin a omzote om ta hen,” a ci hi.

Jesuh in Naupangnote Thupha Pia

¹³ Tua ciangin mi pawlkhat in a naupangte uh tungah Jesuh in a khut nga-in thu a ngetsak nading deihin a naupangte uh a hong paipih uh hi. Ahi zongin a nungzuite in tua mite na taii uh hi.

¹⁴ Jesuh in, “Vantung ki-ukna pen naupangte tawh a kibang mite a’ ding ahih manin, tua naupangte ka kiangah hong paipihsak unla, khaktan kei un,” a ci hi.

¹⁵ Tua ciangin Jesuh in naupangnote tungah a khut nga-in thupha a piak khit ciangin a paikhia hi.

A Hau Tangvalpa

¹⁶ Khatvei, Jesuh kiangah mi khat hong pai a, “Sia aw, nuntak tawntungna ka ngah nadingin bang gamtat hoih gamta ding ka hi hiam?” ci-in a hong dong hi.

¹⁷ Jesuh in, “Bang hangin bang hoih hiam cih thu hong dong na hi hiam? A hoih khat bek om hi. Nuntak tawntungna sungah na lutnop leh thukhamte na zui in,” ci-in a dawng hi.

¹⁸ Amah in, “Bang thukhamte ahi hiam?” ci-in a dot ciangin Jesuh in, “Mi that kei in; numei tungah mawh kei in; mi neihsa gu kei in; zuauthu gen kei in;

¹⁹ na nu na pa zahtak in; nang na ki-it bangin na vengte na it in, cihnate ahi hi,” a ci hi.

²⁰ Tua ciangin tangvalpa in, “Hihte khempeuh ka zuihsa ahi hi; bang kisam lai ding ka hi hiam?” a cih ciangin

²¹ Jesuh in, “Mi cingtaak na hihnop leh pai-in na neihsate va zuak inla, na sum khotte, mizawngte tungah va pia lecin, vantungah sum na hau ding hi. Tua ciangin hong pai inla kei hong zui in,” a ci hi.

²² Tangvalpa in hih thu a zak ciangin, amah hau mahmah ahih manin, mai khingin a paikhia hi.

²³ Tua ciangin Jesuh in a nungzuite kiangah, “A mantak a kong genin-ah: Mihau khat pen vantung ki-ukna sungah a lut ding haksa mahmah ding hi.

²⁴ Adang khat hong gen leuleu ning: Pasian ukna sungah mihau khat a lut ding sangin phim bilvang sungah kalaoh khat a lut ding baihzaw lai hi,” a ci hi.

²⁵ Nungzuite in hih thu a zak uh ciangin lamdangsa mahmah uh a, “Kua in hotkhiatna ngahzo ding ahi hiam?” a ci uh hi.

²⁶ Ahi zongin Jesuh in amaute enin, “Mihingte’ hihzawh ding hi lo mah hi; ahi zongin Pasian in na khempeuh hihthei hi,” a ci hi.

²⁷ Tua ciangin Peter in, “Kote in na khempeuh nusia-in nang ka hong zui uh hi. Tua ahih ciangin bang ngah ding ka hi uh hiam?” ci-in a dot ciangin

²⁸ Jesuh in amaute kiangah, “Ke’n limtak a kong genin-ah: A hong tung ding hun thak sungah a minthanna tokhom tungah Mihing Tapa a tut hun ciangin kei a hong zui note zong, tokhom sawm le nihte tung mahah tu-in Israel minam sawm le nihte tungah thukhenin na om ding uh hi.

²⁹ Keima hangin a inn, a sanggam numei, a sanggam pasal, a nu, a pa, a tate, a leitang, khat peuhpeuh a nusiate in a zah zakhat ngahkikin, nuntak tawntungna zong a ngah ding uh hi.

³⁰ Ahi zongin tuhun laitakin a lian mi tampite tua hun ciangin a neu suak ding a, tuhun laitakin a neu tampite tua hun ciangin a lian hi ding uh hi.